ބީއެމްއެލްއިން ކުރިއަށް ގެންދާ 5 ބޯހިޔާވަހިކަމުގެ މަޝްރޫއެއްގެ އަމަލީ މަސައްކަތް ފަށައިފި
ލިޔުންތެރިޔާ
ޚަދީޖާ އަރުފާ
ބޭންކް އޮފް މޯލްޑިވްސް (ބީއެމްއެލް) ގެ ސަބްސިޑަރީ ކުންފުންޏެއް ކަމަށްވާ "ބީއެމްއެލް އެފޯޑަބަލް ހޯމް ލީސިންގ" އިން ހިންގާ ބޯހިޔާވަހިކަމުގެ ފަސް މަޝްރޫއެއްގެ އަމަލީ މަސައްކަތް ރަސްމީކޮށް ފަށައިފިއެވެ.
މި މަޝްރޫއުތަކުގެ މަސައްކަތް ފެށުމަށް އިއްޔެ ހުޅުމާލޭގައި ބޭއްވި ހާއްސަ ރަސްމިއްޔާތެއްގައި މިނިސްޓަރ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރ ޑރ. ޢަބްދުالله މުއްޠަލިބާއި، ބީއެމްއެލްގެ ޗެއާޕަރސަން އަޙްމަދު ޢަލީ ޙަބީބުގެ އިތުރުން ބީއެމްއެލްގެ ސީއީއޯ އަދި މެނޭޖިންގ ޑިރެކްޓަރ މުޙައްމަދު ޝަރީފް ބައިވެރިވެވަޑައިގެންނެވިއެވެ.
މިއީ މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އެކުލަވާލާފައިވާ 'އިންކްލޫސިވް ނޭޝަނަލް އެފޯޑަބަލް ހައުސިންގ' (އައިއެންއޭއެޗް) ފްރޭމްވޯކްގެ ދަށުން ކަނޑައަޅާފައިވާ ލަނޑުދަނޑިތައް ހާސިލްކުރުމަށް ބީއެމްއެލް އެފޯޑަބަލް ހޯމް ލީސިންގ ކުންފުނިން ކުރަމުންދާ މަސައްކަތުގެ ތެރެއިން ކުރިއަށްގެންދާ މުހިންމު މަޝްރޫއުތަކެކެވެ.
މި މަޝްރޫއުތައް ހަވާލުކޮށްފައިވަނީ އެމްއެމްއޭގެ އިންކްލޫސިވް ނޭޝަނަލް އެފޯޑަބަލް ހައުސިންގ ސްކީމްގެ ގަވަރނަންސް އަދި ރިސްކް ސްޓޭންޑަރޑްތަކާ އެއްގޮތަށް ކުރިއަށްގެންދިޔަ އިވެލުއޭޝަން މަރުހަލާއަށްފަހު ހޮވުނު ރާއްޖެއާއި ރާއްޖޭން ބޭރުގެ ކުންފުނިތަކާއެވެ.
އެގޮތުން މި މަސައްކަތް ހަވާލުކޮށްފައިވާ ދިވެހި ކުންފުނިތަކަކީ އަމީން ކޮންސްޓްރަކްޝަން، އެފްޑަބްލިއު ކޮންސްޓްރަކްޝަން އަދި ރަޝީދު ކާޕެންޓްރީ އެންޑް ކޮންސްޓްރަކްޝަން (އާރުސީސީ) އެވެ. ބޭރުގެ ކުންފުނިތަކުގެ ތެރެއިން މި މަސައްކަތުގައި ބައިވެރިވަނީ ބެއިޖިންގ އަރބަން ކޮންސްޓްރަކްޝަން ގްރޫޕް (ބީޔޫސީޖީ) އަދި ޗައިނާ މެޝިނަރީ އިންޖީނިއަރިންގ ކޯޕަރޭޝަން (ސީއެމްއީސީ) އެވެ.
މި ފަސް މަޝްރޫއުގެ ދަށުން ހުޅުމާލޭ ފޭސް 1، ފޭސް 3 އަދި ވިލިމާލޭގައި ޖުމްލަ 3,200 އަށްވުރެ ގިނަ ހައުސިންގ ޔުނިޓް ބިނާކުރުމަށް ވަނީ ހަމަޖެހިފައެވެ. މި ޔުނިޓްތަކަކީ ނިސްބަތުން ކުޑަ ކުއްޔެއްގައި ދޫކުރެވޭ، އަދި ކުލި ދައްކައި ޚަލާސްކުރުމުން މިލްކުވާ ގޮތަށް ހަމަޖެހިފައިވާ ތަންތަނެވެ.
މި މަޝްރޫއުތަކަކީ ރާއްޖޭގެ ބޯހިޔާވަހިކަމުގެ ޑިމާންޑަށް ބޮޑު ލުޔެއް ގެނެސްދީ، ސަރުކާރުގެ ބޯހިޔާވަހިކަމުގެ ގައުމީ ސްޓްރެޓެޖިކް އަމާޒުތަކަށް ވާސިލްވުމަށް އެޅޭ މުހިންމު ފިޔަވަޅެކެވެ. އަދި މިއީ ދެމެހެއްޓެނިވި މާލީ ނިޒާމެއްގެ ތެރެއިން ރައްޔިތުންނަށް ހެޔޮ އަގުގައި އަމިއްލަ ބޯހިޔާވަހިކަން ހޯދައިދިނުމަށް ބޭންކް އޮފް މޯލްޑިވްސް އާއި އެ ކުންފުނިން ދޭ އަހައްމިއްޔަތުކަން ހާމަކޮށްދޭ މަސައްކަތެކެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
