އަލް ނަސްރު ބަލިކޮށް އަލް ހިލާލް އިން ރިޔާދު ސީޒަން ކަޕްގެ ޗެމްޕިއަންކަން ހޯދައިފި

ސައުދީ އަރަބިއާގައި މިހާރު ކުރިއަށްދާ ރިޔާދު ސީޒަން ކަޕްގެ ފައިނަލުގައި ބުރާސްފަތި ދުވަހުގެ ރޭ 2-0 ގެ ނަތީޖާއަކުން އަލް ނަސްރު ބަލިކޮށް އަލް ހިލާލް އިން ޗެންޕިއަންކަން ހޯދައިފި އެވެ.

މިއަހަރުގެ ރިޔާދު ސީޒަން ކަޕްގައި ތިން ޓީމު ވާދަކޮށްފައިވާއިރު، އޭގެ ތެރޭގައި ހިމެނެނީ އަލް ނަސްރު، އަލް ހިލާލްގެ އިތުރުން އިންޓަ މިއާމީ އެވެ. އަދި މުބާރާތް ކުރިއަށް ގެންގޮސްފައިވަނީ ލީގު އުސޫލުން ކޮންމެ ޓީމެއް ކޮންމެ ޓީމަކާއި އެއް މެޗު ކުޅެ އެންމެ ގިނަ ޕޮއިންޓް ހޯދާ ޓީމަކަށް ޗެންޕިއަންކަން ލިބޭގޮތަށެވެ.

މުބާރާތުގައި އިންޓަ މިއާމީ އިން ކުޅުނު ފުރަތަމަ މެޗުގައި 4-3 ގެ ނަތީޖާއަކުން އަލް ހިލާލް އަތުން އެޓީމު ބަލިވިއިރު، ދެވަނަ މެޗުގައި އަލް ނަސްރު އަތުން އެޓީމު ބަލިވީ 6-0 ގެ ތަފާތުބޮޑު ނަތީޖާއަކުންނެވެ. މިއާއެކު މިމެޗަށް ނުކުތްއިރު ލަނޑުގެ ތަފާތުން ކުރީގައި އޮތީ އަލް ނަސްރު އެވެ. އަދި މިމެޗު އެއްވަރުވި ނަމަވެސް ޗެންޕިއަން ލިބޭނީ އަލް ނަސްރު އަށެވެ.

މެޗުގެ ފުރަތަަމަ ހާފުގައި އަލް ހިލާލްގެ ފަރާތުން ތަފާތު މޮޅު ކުޅުމެއް ފެނިގެންދިޔަ އިރު، މިހާފުގައި އެޓީމުން ވަނީ ލަނޑުޖަހާނެ ރަގަޅު ގިނަ ފުރުސަތުތަކެއް ތަނަވަސްކޮށްފައެވެ. އެގޮތުން މެޗުގެ 17 ވަނަ މިނެޓުގައި އެޓީމުން ވަނީ ލަނޑެއް ކާމިޔާބުކޮށް މެޗުގެ ލީޑު ހޯދާފައެވެ. މިލަނޑު އެޓީމަށް ކާމިޔާބުކޮށްދިނީ ސާބިއާގެ މިޑްފީލްޑަރު  ސާޖް މިލިންކޮވިޗް-ސަވިޗް އެވެ.

މިއީ އެޓީމުގެ ޑިފެންޑަރު ސައުދު އަބްދުލްހާމިދު ތަނަވަސްކޮށްދިން ފުރުސަތެއްގައި އަލް ނަސްރުގެ ޕެނަލްޓީ އޭރިއާ ތެރޭގައި މުޅިން ހުސްކޮށް ހުރެ ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ. އަދި މިމެޗުގައި އެޓީމުން ކާމިޔާބުކުރި ދެވަނަ ލަނޑު ފުރަތަމަ ހާފުގެ 30 ވަނަ މިނެޓުގައި ކާމިޔާބުކޮށްދިނީ އެޓީމުގެ ކެޕްޓަން ސާލިމް އަލް ދައުސަރީ އެވެ. މިއީ އެޓީމުގެ ބްރެޒިލް ފޯވާޑް މަލްކޮމް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މިހާފުގައި އަލް ނަސްރުގެ ކެޕްޓަން ކްރިސްޓިއާނޯ ރޮނާލްޑޯގެ އިތުރުން ޓަލިސްކާއަށް ވެސް ވަނީ ލަނޑުޖަހާނެ ރަގަޅު ފުރުސަތުތަކެއް ލިބި ބޭނުން ނުކުރެވިފައެވެ. އަދި މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 2-0 ގެ ނަތީޖާއަކުން އަލް ހިލާލް ކުރީގައި އޮވެގެންނެވެ.

މެޗުގެ ދެވަަނަ ހާފުގައި އަލް ނަސްރުން ވަނީ އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ. އަދި މިހާފުގައި ނަތީޖާގެ ފަރަގު ކުޑަކުރުމަށް އެޓީމުގެ ކެޕްޓަން ކްރިސްޓިއާނޯ، ސަޑިއޯ މާނޭ އަދި މިޑްފީލްޑަރު އޮޓާވިއޯ އަށް ވެސް ވަނީ ވަރަށް ހުސް ފުރުސަތުތަކެއް ލިބި ބޭނުން ނުކުރެވިފައެވެ.