ފަހު ވަގުތު އުމްރާދަތުރު ކެންސަލްކުރި ގުރޫޕްގެ މައްސަލަ ފުލުހުން ބަލަން ފަށައިފި
ލިޔުންތެރިޔާ
ޚަދީޖާ އަރުފާ
'އުމްރާއަށް ގެންގޮސްދޭނެ ކަމަށް ބުނެ އަލް އަބްރާރު ޕްރައިވެޓް ލިމިޓެޑް' ގުރޫޕުން މީހުން އަތުން ފައިސާ ނެގުމަށްފަހު، ފަހު ވަގުތު ދަތުރު ކެންސަލްކުރި މައްސަލަ ފުލުހުން ބަލަން ފަށައިފިއެވެ.
މި މައްސަލާގައި ”ވޮއިސް“އަށް މައުލޫމާތު ދެއްވަމުން ފުލުހުންގެ މީޑިއާ އޮފިޝަލް ވިދާޅުވީ، މި މައްސަލަ މިއަދު ފުލުހުންނަށް ހުށަހަޅާފައިވާ ކަމަށެވެ.
އަދި މިކަމާ ގުޅިގެން ބަލަންޖެހޭ ކަންކަން ބަލަމުން އަންނަ ކަމަށްވެސް ބުންޏެވެ.
އަލް އަބްރާރު ގުރޫޕުން ރަމަޟާން މަހުގެ ފަހު 15 އެއްގައި އުމްރާއަށް ދިއުމަށް 110 މީހުން ފައިސާ ދައްކާފައިވެއެވެ. ނަމަވެސް، ފުރަން އޮތް ދުވަހު ކުއްލި ބައްދަލުވުމެއް ބާއްވައި، ސަރަހައްދީ މަޝްރަހު އޮތް ގޮތުން ރިސްކެއް ނަގަން ބޭނުން ނުވާ ކަމަށް ބުނެ އެ ގުރޫޕުން ވަނީ ދަތުރު ކެންސަލްކޮށްފައެވެ.
މިކަމާ ގުޅިގެން "ދުވަސް" ނޫހަށް މައުލޫމާތު ދިން އުމްރާވެރިއަކު ބުނީ، ދަތުރު ކެންސަލްކުރި ނަމަވެސް އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސަޢީދާ ގުޅުމުން، އުމްރާވެރިންދާ ސަރަހައްދުގައި އެއްވެސް ނުރައްކަލެއް ނެތް ކަމަށާއި، ކަންކަން ހަމަޖެހިފައިވާނަމަ ފުރުވާލުމަށް އެންގެވި ކަމަށެވެ. އަދި އެ ގުރޫޕުން އުމްރާއަށް މީހުން ގެންދަން މިނިސްޓްރީގެ ހުއްދައަށް އެދިފައި ނުވާ ކަމަށާއި، މައްކާއިން ހޮޓެލްވެސް ބުކްކޮށްފައި ނުވާކަން އެނގިފައިވާ ކަމަށް އޭނާ ބުންޏެވެ.
އަބްރާރު ގުރޫޕްގެ އެމްޑީ އައްފާން ބުނީ، ހުއްދައަށް އެދި މިނިސްޓްރީއަށް މެއިލް ކުރި ކަމަށާއި ނަމަވެސް އެ މެއިލް ނުދިޔައީ ކަމަށެވެ. އެހެންނަމަވެސް، އެ މެއިލް ނުވަތަ ޓިކެޓާއި ހޮޓެލް ބުކިންގެ ލިޔެކިޔުންތައް ދެއްކުމަށް އޭނާ ވަނީ އިންކާރުކޮށްފައެވެ. ސަބަބެއް ކަމަށް ބުނީ ފުލުހުންނާއި މިނިސްޓްރީން މައްސަލަ ތަހުގީގު ކުރަމުންދިއުމެވެ.
ފައިސާ ދެއްކި މީހުންނަށް ރިފަންޑް ދޭނެ ކަމަށް އެ ގުރޫޕުން ބުނި ނަމަވެސް، އެ ފައިސާ ދެނީ ޓިކެޓަށްވާ ބައި ކަނޑާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
