ފަސް ގާޒީއެއްގެ މައްސަލަ ބަލަން ޖޭއެސްސީން ނިންމައިފި
ޑްރަގު ކޯޓުގެ ގާޒީ އާދަމް އާރިފުގެ އިތުރުން ހަތަރު ގާޒީއެއްގެ މައްސަލަ ބަލަން ޖުޑިޝަލް ސާވިސް ކޮމިޝަން (ޖޭއެސްސީ) އިން މިއަދު ނިންމައިފިއެވެ.
ޖޭއެސްސީން މިރޭ ބޭއްވި ނޫސްވެރިންގެ ބައްދަލުވުމުގައި އެ ކޮމިޝަނުގެ ޑިރެކްޓަރު ހަސަން ޒަހީނު ވިދާޅުވީ، ފަސް ގާޒީންގެ ތެރޭގައި ހިމެނޭ ޑްރަގް ކޯޓުގެ ގާޒީ އާދަމް އާރިފުގެ މައްސަލަ ބަލަން ޖޭއެސްސީން ތިންމެންބަރުންގެ ކޮމެޓީއެއް ނަގާފައިވާކަމަށެވެ.
އޭގެ އިތުރުން މައްސަލަ ބަލަން ނިންމާފައިވަނީ ރ. މާކުރަތު މެޖިސްޓްރޭޓް ކޯޓުގެ މެޖިސްޓްރޭޓް އަދުނާން ހުސައިނާއި، ގއ. ކަނޑުހުޅުދޫ މެޖިސްޓްރޭޓް ކޯޓުގެ އިސް މެޖިސްޓްރޭޓް ހަސަން ދީދީއާއި ތުލުސްދޫ މެޖިސްޓްރޭޓް ކޯޓުގެ މެޖިސްޓްރޭޓް އައިނާން އަލީ އާއި ފުވައްމުލަކު މެޖިސްޓްރޭޓް ކޯޓުގެ މެޖިސްޓްރޭޓް ހުސައިން ރަޝީދާ ބެހޭގޮތުން ހުށަހަޅާފައިވާ ޝަކުވާގެ މައްސަލައެވެ.
އެމައްސަލަތައް ބަލަން ޖޭއެސްސީން މިއަދު ބޭއްވި ބައްދަލުވުމުގައި ނިންމާފައިވާ ކަމަށް ޒަހީނު ވިދާޅުވިއެވެ.
އަދި މިއަދުގެ ބައްދަލުވުމުގައި ރ. އިންނަމާދޫ މެޖިސްޓްރޭޓް ކޯޓުގެ އިސް މެޖިސްޓްރޭޓް އަލީ ނަޝީދާ ގުޅޭގޮތުން ހުށަހެޅި ޝަކުވާއެއް ބެލުމަށްފަހު އޭނާއަށް ނަސޭހަތް ދިނުމުގެ ފިޔަވަޅު އަޅަންވެސް ކޮމިޝަނުން ވަނީ ނިންމާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
