ގަލެނޯ ފަހުވަގުތު ކާމިޔާބުކުރި ލަނޑާއެކު އާސެނަލް އަތުން މޮޅުވެ، ޕޯޓޯ އިން ކުއާޓާގެ ފުރުސަތު ބޮޑުކޮށްފި

ޔުއެފާ ޗެމްޕިއަންސްލީގު ރައުންޑް އޮފް 16 ގެ ފުރަތަަމަ ލެގުގައި ބުދަދުވަހުގެ ރޭ ރަށުން ބޭރުގައި 1-0 ގެ ނަތީޖާއަކުން ޕޯޓޯ އަތުން އާސެނަލް ބަލިވެއްޖެ އެވެ.

ޕްރެމިއާ ލީގުގައި މިވަގުތު ރަނގަޅު ފޯމެއްގައި އޮތް އާސެނަލް އިން އެންމެ ފަހުން ކުޅުނު ފަސް މެޗުން މޮޅުވެފައިވާއިރު، މި ފަސް މެޗުގައި އެޓީމުން ވަނީ 21 ލަނޑު ކާމިޔާބު ކޮށްފައެވެ.

މެޗުގެ ފުރަތަަމަ ހާފުގައި ގިނަވަގުތު ބޯޅަ ހިފަހައްޓައިގެން ކުޅެ އާސެނަލް އިން މެޗު ޑޮމިނޭޓުކުރި ނަމަވެސް، މިހާފުގައި ޕޯޓޯގެ ގޯލާއި އަމާޒުކޮށް އެޓީމަށް އެންމެ ހަމަލާއެއް ވެސް ފޮނުވާލެވިފައެއް ނުވެއެވެ. އަދި މިހާފުގައި ޕޯޓޯ އިން އެންމެ ހުސް ފުރުސަތެއް ލިބުނީ އެޓީމުގެ ބްރެޒިލް މިޑްފީލްޑަރު ގަލެނޯ އަށެވެ.

ނަމަވެސް ފުރަތަަމަ ހާފުގެ 21 ވަނަ މިނެޓުގައި އާސެނަލްގެ ޕެނަލްޓީއޭރިއާ ތެރޭގައި މުޅިން ހުސްކޮށް ހުރެ އޭނާ ފޮނުވާލި ހަމަލާ އަމާޒުވީ ގޯލުގެ އަރިމަތީ ދަނޑިއަށެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މެޗުގެ ދެވަަނަ ހާފުގައި ދެޓީމުގެ ފަރާތުން ދާދި ހަމަހަމަ ކުޅުމެއް ފެނިގެންދިޔައިރު، މިވަގުތު ޕްރެމިއާ ލީގުގައި ރަނގަޅު ފޯމެއްގައި އޮތް އާސެނަލް އަށް މިހާފުގައި ވެސް ޕޯޓޯގެ ގޯލާއި އަމާޒުކޮށް އެންމެ ހަމަލާއެއް ވެސް ފޮނުވާލެވިފައެއް ނުވެއެވެ. އަދި މިހާފުގައި ޕޯޓޯ އިން މެޗުގެ ލީޑު ހޯދީ ދެވަނަ ހާފުގެ އިތުރު ވަގުތުގެ ތެރޭގައެވެ. މިލަނޑު އެޓީމަށް ކާމިޔާބުކޮށްދިނީ ބްރެޒިލްގެ މިޑްފީލްޑަރު ގަލެނޯ އެވެ.

މިލަނޑާއެކު މެޗުގެ ކުޅުން ނިމިގެންދިޔައީ 1-0 ގެ ނަތީޖާއަކުން ޕޯޓޯ ކުރީގައި އޮވެގެންނެވެ. އަދި މިދެޓީމުގެ މެދުގައި ކުޅެވޭ ދެވަނަ ލެގުގެ މެޗު އާސެނަލްގެ ދަނޑުގައި ކުޅުމަށް ހަމަޖެހިފައިވަނީ މާޗު މަހުގެ 13 ވަނަ ދުވަހު އެވެ.