މެދުއިރުމަތީގެ ހަނގުރާމައިގެ ޚަބަރުތައް ފެތުރުމުގައި ސަމާލުވުމަށް އެމް.އެމް.ބީ.ސީ އިން އިލްތިމާސްކޮށްފި

ދުނިޔެ ހަނގުރާމައެއްގެ ބިރުވެރި ދުވަސްތަކެއް ކަޑައްތުކުރަމުންދާ މިފަދަ ޚައްޞާސް ދަނޑިވަޅެއްގައި، މީޑިއާތަކުން ޚަބަރާއި މަޢުލޫމާތު ފެތުރުމުގައި ޒިންމާދާރުވުމަށް މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަން (އެމް.އެމް.ބީ.ސީ) އިން އިއްޔެ ވަނީ އިލްތިމާސްކޮށްފައެވެ.

އެމް.އެމް.ބީ.ސީ އިން މިހެން ބުނެފައިވަނީ އިއްެ ނެރުނު ނޫސްބަޔާނެއްގައެވެ.

އެމް.އެމް.ބީ.ސީ އިން ބުނި ގޮތުގައި، މީޑިއާތަކުން ޢާންމުންނާ ހަމައަށް މަޢުލޫމާތު ފޯރުކޮށްދޭންވާނީ ޤާނޫނު ނަންބަރު 16/2025 (މޯލްޑިވްސް މީޑިއާ އެންޑް ބްރޯޑްކާސްޓިންގ ރެގިއުލޭޝަންގެ ޤާނޫނު) ގެ 38 ވަނަ މާއްދާގެ ދަށުން އެކުލަވައިލާފައިވާ "ބްރޯޑްކާސްޓަރުންނާއި މީޑިއާގައި މަސައްކަތްކުރާ ފަރާތްތަކާއި ނޫސްވެރިންގެ ސުލޫކީ މިންގަނޑު" އާ އެއްގޮތްވާ ގޮތުގެ މަތިންނެވެ.

ޚާއްޞަގޮތެއްގައި، މި ދަނޑިވަޅުގައި ޚަބަރު ފެތުރުމުގައި ސުލޫކީ މިންގަނޑުގެ 5 ވަނަ މާއްދާގައި ބަޔާންކޮށްފައިވާ "ޤައުމީ ސަލާމަތާއި ރައްކާތެރިކަން ދެމެހެއްޓުން" މި މާއްދާއަށް ހުރިހާ މީޑިއާތަކުންވެސް ސަމާލުކަން ދިނުމަށް ކޮމިޝަނުން ވަނީ ހަނދާންކޮށްދީފައެވެ. މީގެ އިތުރުން ފެކްޗުއަލް ޕްރޮގްރާމްތައް ގެނެސްދިނުމުގައިވެސް ވަކި އުސޫލުތަކަކަށް ތަބާވުމަށް ވަނީ އަންގާފައެވެ.

މިގޮތުން ސުލޫކީ މިންގަނޑުގެ 6 ވަނަ މާއްދާގެ (ކ) އާ ހަވާލާދީ ކޮމިޝަނުން ބުނެފައިވަނީ، އެކި ފަރާތްތަކުން ހޯދާ ކޮންޓެންޓް ހިމެނުމުގައި، އެ ފަރާތްތަކުން ދެއްކި ވާހަކައިގެ މަފްހޫމް ނުގެއްލޭނެ ގޮތަށް ޚަބަރުތައް ގެނެސްދޭންޖެހޭނެ ކަމަށެވެ. މިއީ ޚަބަރުގެ ތެދުބަހަކަށް ކަންކަން ހާމަކުރުމަށް ބާރުއެޅުމުގެ ގޮތުން ކުރަންޖެހޭ ކަމެއްގެ ގޮތުގައި ބަޔާނުގައި ފާހަގަކޮށްފައިވެއެވެ.

މީގެ އިތުރުން، ނަފްރަތު އުފެއްދުމުގެ ބޭނުމުގައި އަސްލާ އެއްގޮތް ނޫން ގޮތަށް މެނިޕިއުލޭޓް ކޮށްފައިވާ ނުވަތަ ފެބްރިކޭޓް ކޮށްފައިވާ ފޮޓޯއާއި، އޯޑިއޯ އަދި ވީޑިއޯ ބޭނުން ނުކުރުމަށް ސުލޫކީ މިންގަނޑުގެ 14 ވަނަ މާއްދާގެ (ރ) އާ ހަވާލާދީ ވަނީ އިލްތިމާސްކޮށްފައެވެ. މި ހައްސާސް ދަނޑިވަޅުގައި ނޫސްވެރިން އެފަރާތްތަކުގެ ފަރުދީ ޒިންމާ އެންމެ ފުރިހަމައަށް އަދާކުރުމަށްވެސް އެމް.އެމް.ބީ.ސީ އިން ވަނީ ނަސޭހަތްތެރިވެފައެވެ.