އައްޑޫ ބޯޓުން ގެއްލުނު މީހާ ހޯދަން 104 ނޯޓިކަލް މޭލު ސަރަހައްދު ބަލައިފި
ލިޔުންތެރިޔާ
އަބްދުﷲ ހުސައިން
އައްޑޫސިޓީން ފުރައިގެން މާލެ ދަތުރުކުރަނިކޮށް "ސީމެކްސް" ބޯޓުން ގެއްލުނު ފަޅުވެރިޔާ ހޯދުމަށް 104 ނޯޓިކަލް މޭލު ސަރަހައްދެއް ބަލައިފިކަމަށް އެމްއެންޑީއެފުން ބުނެފިއެވެ.
މިކަމާ ގުޅޭގޮތުން އެމްއެންޑީއެފުން ބުނީ، ގެއްލުނު މީހާ ހޯދުމަށް 104 ނޯޓިކަލް މޭލު ސަރަހައްދެއް ބަލާފައިވާއިރު، އަދިވެސް އޭނާގެ ހިލަމެއް ނުވާކަމަށެވެ. ކޯސްޓްގާޑުން އޭނާ ހޯދުމުގެ މަސައްކަތް ފަށާފައިވަނީ ކަނޑުމަގުންނެވެ.
ސީމެކްސް ބޯޓުން ގެއްލިފައިވަނީ، ނޭޕާލް ރައްޔިތެއް ކަމަށްވާ ރާޖް ކުމާރެވެ. ފުލުހުން ބުނި ގޮތުގައި، އޭނާ ގެއްލިފައިވާ ކަމުގެ މަޢުލޫމާތު ރޭގެ ވަގުތެއްގައި ފުލުހުންނަށް ރިޕޯޓްކޮށްފައިވާކަމަށެވެ.
ރާޖް ކުމާރު އުޅަނދުގައި ނެތްކަން އެނގިފައިވަނީ އައްޑޫ ސިޓީއާއި ފުވައްމުލައް ސިޓީއާ ދެމެދު ކަނޑުމަތިން، ފުވައްމުލައް ސިޓީއާ 8 މޭލަށް ކައިރިވެފައިވަނިކޮށް ކަމަށް މަޢުލޫމާތު ލިބިފައިވާ ކަމަށް ފުލުހުން ބުންޏެވެ.
"ބޯޓު އައްޑޫ ސިޓީގައި ރޭ 11:30 އެހައިކަންހާއިރު ފުރި އިރު ރާޖް ކުމާރު ބޯޓުގައި ހުރި. އަދި ރޭ 01:15 ހާއިރު ކެޕްޓަނާ ވާހަކަ ދެއްކިކަން މިހާތަނަށް ލިބިފައިވާ މަޢުލޫމާތުން އެނގޭ" ފުލުހުން ބުންޏެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
