ފެނަބާޗޭގެ ކޯޗު މޮރީނިއޯ މަގާމުން ވަކިކޮށްފި

ތުރުކީގެ ފެނަބާޗޭ އިން އެކުލަބުގެ ކޯޗު ޕޯޗުގަލްގެ ހޯސޭ މޮރީނިއޯ މަގާމުން ވަކިކޮށްފައިވާކަށް އެކުލަބުން ބުނެފިއެވެ.

މީޑިއާ ރިޕޯޓްތައް ބުނާގޮތުގައި ފެނަބާޗޭ އިން އެކުލަބުގެ ކޯޗުކަމުގެ މަގާމުން މިއަދު މޮރީނިއޯ ވަކިކޮށްފައިވަނީ ބުރާސްފަތި ދުވަހުގެ ރޭ ކުޅުނު ޔުއެފާ ޗެންޕިއަންސް ލީގު ޕްލޭއޮފްގައި ޕޯޗުގަލްގެ ބެންފީކާ އަތުން ރަށުން ބޭރުގައި 1-0 ގެ ނަތީޖާއަކުން ބަލިވެ މިސީޒަނުގެ ޗެންޕިއަންސް ލީގުން އެޓީމަށް ފުރުސަތު ނުލިބުމުންނެވެ.

އުމުރުން 62 އަހަރުގެ މޮރީނިއޯ ފެނަބާޗޭގެ ކޯޗުކަމުގެ މަގާމާއި 2024 ވަނަ އަހަރުގެ ޖުލައި މަހު ހަވާލުވީ އިޓަލީގެ ރޯމާގައި ތިން އަހަރު ހޭދަކުދުމަށްފަހު އެވެ. އަދި އޭގެ ކުރިން މޮރީނިއޯ ވަނީ ޔޫރަޕްގެ ނަން މަޝްހޫރު ގިނަ ޓީމުތަކަކަށް އިރުޝާދު ދީފައެވެ. އޭގެ ތެރޭގައި ޕޯޗުގަލްގެ ޕޯޓޯ، ސްޕެއިންގެ ރެއާލް މެޑްރިޑް، އިޓަލީގެ އިންޓަ މިލާން، ޕްރެމިއާ ލީގުގެ ޓޮޓެންހަމް އަދި މެންޗެސްޓާ ޔުނައިޓެޑްގެ އިތުރުން ދެފަހަރެއްގެ މަތިން ޗެލްސީއަށް އިރުޝާދު ދީފައިވެއެވެ.

ކުލަބު ފުޓްބޯޅައިގައި ގިނަ ކާމިޔާބީތަކެއް ހޯދާފައިވާ މޮރީނިއޯގެ ކޯޗިން ކެރިއަރުގައި ޕޯޓޯގެ އިތުރުން އިންްޓަ މިލާނާއެކު ޔުއެފާ ޗެންޕިއަންސް ލީގު ކާމިޔާބުކުރުމުގެ އިތުރުން އޭނާ ވަނީ މެންޗެސްޓާ ޔުނައިޓެޑާއެކު ޔުއެފާ ޔޫރޮޕާ ލީގު އަދި ރޯމާއެކު ޔުއެފާ ކޮންފަރެސް ލީގު ކާމިޔާބުކޮށް ކުލަބު ފުޓްބޯޅައިގެ ޔޫރަޕްގެ އެންމެ ޝަރަފްވެރި ތިން މުބާރާތް އެންމެ ފުރަތަަމަ ކާމިޔާބުކުރި ކޯޗުކަމުގެ ޝަރަފް ހޯދާފައެވެ.