ޖަރުމަނުވިލާތުގައި ރާއްޖެ ތަމްސީލުކުރުމަށް އޭޖެންސީއެއް ހޯދަނީ
ލިޔުންތެރިޔާ
ޚަދީޖާ އަރުފާ
ޖަރުމަނުވިލާތުގައި ރާއްޖެ ތަމްސީލުކުރުމަށް އޭޖެންސީއެއް ހޯދުމަށް މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އިން އިޢުލާންކޮށްފިއެވެ.
އެމްއެމްޕީއާރުސީ އިން ބުނީ ރާއްޖޭގެ ފަތުރުވެރިކަމަށް ޖަރުމަން މީހުން އަހުލުވެރިކުރުމަށާ، އެޤައުމުން ރާއްޖެ އަންނަ ފަތުރުވެރިންގެ އަދަދު އިތުރުކުރުމަށް އެ ގައުމުގައި ރާއްޖެ ތަމްސީލުކުރުމަށް އެޖެންސީއެއް ހޯދަމުންދާ ކަމަށެވެ. އަދި އެޖެންސީ އެގައުނުގައި މަސައްކަތްކިރާނީ އެއް އަހަރު ދުވަހުގެ މުއްދަތައްކަށް ކަމަށެވެ.
އެމްއެމްޕީއާރުސީން ބުނެފައިވާ ގޮތުން، މަޝްރޫއުއަށް ބީލަން ހުށަހަޅާ އެޖެންސީއަކީ ފާއިތުވި ފަސް އަހަރު ތެރޭގައި އެފަދަ މަސައްކަތެއްގެ ތަޖުރިބާ ލިބިފައިވާ އެޖެންސީއަކަށް ވާންޖެހޭނެއެވެ. އަދި އެފަދަ ތަޖުރިބާއެއް ލިބިފައި ނެތް ނަމަ، ނުވަތަ މިކަމަށް އެދި ހުށަހަޅާއިރު ތަޖުރިބާގެ ލިޔުމެއް ނުވަތަ އީމެއިލްއެއް ހުށަހަޅާފައި ނުވާނަމަ ޑިސްކޮލިފައިވާނެ ކަމަށް އެމްއެމްޕީއާރުސީ އިން ބުނެފައިވެއެވެ. އަދި އެފަދަ އެޖެންސީ ވާންޖެހޭނީ ރާއްޖެއާއި ޖަރުމަނުވިލާތުގެ ފަތުރުވެރިކަމުގެ ސިނާޢަތަށް ހޭލުންތެރި ބަޔަކަށް ކަމަށްވެސް ބުނެފައިވެއެވެ.
ޖަރުމަނުވިލާތަކީ ރާއްޖެއަށް އެންމެ ގިނަ ފަތުރުވެރިން ޒިޔާރަތްކުރާ 10 ގައުމުގެ ތެރޭގައި ހިމެނޭ އެއް ގައުމެވެ. ޖަރުމަނުވިލާތު ހިމެނެނީ މި 10 ގައުމުގެ ތެރެއިން 5 ވަނައިގައެވެ. އެ ގައުމުން މި އަހަރުގެ މިހާތަނަށް 96000އަށްވުރެ ގިނަ ފަތުރުވެރިން ޒިޔާރަތްކޮށްފައިވެއެވެ.
މިނިސްޓްރީ އޮފް ޓޫރިޒަމްގެ ތަފާސް ހިސާބުތައް ދައްކާގޮތުގައި އަހަރުގެ މިހާތަނަށް ރާއްޖެއަށް ޖުމްލަ 1.3 މިލިޔަން ފަތުރުވެރިން ޒިޔާރަތްކޮށްފައިވެއެވެ. ސަރުކާރުގެ އަމާޒަކީ މިއަހަރު ނިމުމުގެ ކުރިން ދެ މިލިއަން ފަތުރުވެރިން ރާއްޖެއަށް ގެނައުމެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
