ރަސްމީ ދަތުރަކަށް ޕާސްޕޯޓު ދޫކުރަން އެދުމުން، ބައްސާމް ގެ ޕާސްޕޯޓު ދޫނުކުރުމަށް ކޯޓުން ނިންމައިފި
އޭޝިއަން ފުޓްބޯލް ކޮންފެޑެރޭޝަން (އޭއެފްސީ) ގެ ބައްދަލުވުމަކަށް ގަތަރަށް ދާން ޕާސްޕޯޓް ދޫކުރަން އެދުމުން ވެސް އެފްއޭއެމްގެ ރައީސް ބައްސާމް އަދީލް ޖަލީލް ޕާސްޕޯޓް ދޫނުކުރަން ކްރިމިނަލް ކޯޓުން މިއަދު ނިންމައިފި އެވެ.
ބައްސާމް ގެ ޕާސްޕޯޓު ހިފަހައްޓާފައިވަނީ އޭނާގެ މައްޗަށް ކުރެވުނު މަނީ ލޯންޑްރިން އާއި ހިޔާނާތުގެ ދައުވާގެ ތަހުގީގު މަރުހަލާގެ ތެރޭގައި، މިދިޔަ ޖެނުއަރީ މަހުން ފެށިގެން ޖޫން މަހުގެ 6 އާއި ހިސާބަށެވެ. ނަމަވެސް އޭއެފްސީގެ މި ބައްދަލުވުމަށް ދައުވަތު ލިބުމުގެ ސަބަބުން، ބައްދަލުވުމަށް ދިޔުމަށް ޕާސްޕޯޓް ދޫކުރުމަށް ބައްސާމް އެދިލެއްވުމުން އެ މައްސަލައިގައި ކްރިމިނަލް ކޯޓުން ބުނެފައި ވަނީ ބައްސާމްގެ ޕާސްޕޯޓް ހިފަހައްޓަން ނެރުނު އަމުރު މުރާޖައާ ކުރަން ޖެހޭ ސަބަބެއް ނެތް ކަމަށެވެ.
ކްރިމިނަލް ކޯޓުން މިފަދައިން ނިންމީ އެފްއޭއެމްގެ ފަރާތުން އެހެން މީހަކު ވެސް އެ ބައްދަލުވުމަށް ދިއުމުގެ ފުރުސަތު އޮތުމާއި ބައްސާމްގެ ޕާސްޕޯޓް ދޫކުރަން އޭއެފްސީ އާއި ސްޕޯޓްސް ކޮމިޝަނަރު ނުވަތަ އެފްއޭއެމްއިން ވެސް ރަސްމީކޮށް އެދިފައިނުވާތީއެވެ.
އެފްއޭއެމްގެ ވެރިންގެ މައްޗަށް ކުރެވޭ ތުހުމަތުތަކުގެ ތެރޭގައި ބައްސާމް ގެ މައްޗަށްވަނީ އެފްއޭއެމްއަށް ލިބެންޖެހޭ ފައިސާތަކަކަށް ހިޔާނާތްތެރިވި ކަމަށާއި ފީފާ އިން އެފްއޭއެމް އަށް ދިން ފައިސާތަކެއް އަމިއްލަ އެކައުންޓަށް ޖަމާ ކުރި ކަމުގެ ތުހުމަތު ވެސް ކޮށްފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
