ޗައިނާގެ ބޭންކެއް ރާއްޖޭގައި ގާއިމްކުރުމުގެ މަސައްކަތް ދަނީ ކުރެވެމުން: ވަޒީރު ސައީދު
ޗައިނާގެ ބޭންކެއް ރާއްޖޭގައި ގާއިމްކުރުމުގެ މަސައްކަތް ކުރެވެމުންދާކަމަށް އިގުތިސާދީ ކަންކަމާ ބެހޭ ވަޒީރު މުހައްމަދު ސައީދު ވިދާޅުވެއްޖެއެވެ.
"މޯލްޑިވްސް – ސިޗުއާން ޓްރޭޑު އެންޑު އިންވެސްޓުމަންޓު ކޯރޕަރޭޝަން ކޮންފަރެންސް" ފެށުމުގެ ރަސްމިއްޔާތުގައި ވާހަކަފުޅު ދައްކަވަމުން ވަޒީރު ސައީދު ވިދާޅުވީ، ޗައިނާއާއެކު މިނިވަން ވިޔަފާރީގެ އެއްބަސްވުމަށް އަންނަ މަހުގެތެރޭ އަމަލުކުރަން ފަށަން ތައްޔާރުވަމުންދާކަމަށެވެ.
މިއާއެކު ވިޔަފާރިވެރިންނަށް ހުރި ފުރުޞަތުތައް ދިވެހި ވިޔަފާރިވެރިންނަށް އެނގެން ޖެހޭކަން ފާހަގަކުރައްވަމުން ވަޒީރު ސައީދު ވިދާޅުވީ، މިކަމާއި ގުޅޭ މައުލޫމާތުތައް ވިޔަފާރިވެރިންނަށް ފޯރުކޮށް ދިނުމަށް ވޯކް ޝޮޕްތައް ހިންގުމަށް ނިންމާފައިވާ ކަމަށެވެ.
މިނިވަން ވިޔަފާރީގެ އެއްބަސްވުމުގެ ތެރެއިން ރާއްޖެއަށް ގިނަ ފައިދާތަކެއް ލިބޭނެ ކަމަށާއި، ޗައިނާގެ މިނިވަން ވިޔަފާރީގެ ތެރެއިން ނެގޭނެ އެންމެ ބޮޑު ފައިދާ ރާއްޖެއަށް ނެގޭގޮތަށް ރައީސް ޑރ.މުޢިއްޒު އަމާޒުހިއްޕަވައި، އެކަން ޗައިނާގެ ލީޑާރޝިޕްއާއި ހިއްސާކޮށްފައިވާކަމަށް ވަޒީރު ވިދާޅުވިއެވެ.
މިނިވަން ވިޔަފާރީގެ ފައިދާ ވިޔަފާރިވެރިންނަށް އެންމެ ބޮޑަށް ލިބޭނެ މަގުތައް ހޯދުމަށް ސަރުކާރުން މަސައްކަތްކުރަމުންދާކަން ފާހަގަކުރައްވައި، ވަޒީރު ވިދާޅުވީ، ޗައިނާގެ ބޭންކެއް ރާއްޖޭގައި ހުޅުވުމަށް ރައީސް ޑރ.މުޢިއްޒު ބޭނުންފުޅުވާކަމަށާއި، އެކަމާއި ގުޅޭ މަސައްކަތްތައް ކުރަމުންދާކަމަށެވެ.
"ޕީޕަލްސް ބޭންކު އޮފް ޗައިނާއާއި އެމްއެމްއޭއާއެކު އެއްބަސްވުން ޤާއިމްކުރުމުގެ މަސައްކަތް ދަނީ ކުރެވެމުން. މިކަން މިގޮތަށް ވީމައި، ރާއްޖެއަށް ޗައިނާއިން މުދާ އެތެރެކުރާ ފަރާތްތަކުން، ދިވެހި ބޭންކެއް މެދުވެރިކޮށް ދިވެހި ރުފިޔާއިން ފައިސާ ދެއްކޭނެ ގޮތް ފަހިވެގެންދާނެ."
ވަޒީރު ސައީދު ވިދާޅުވިއެވެ.
ޗައިނާއިން ގެންނަ މުދަލަށް ދިވެހި ރުފިޔާ ބޭނުންކޮށްގެން މުއާމަލާތު ކުރެވޭނެގޮތް ހެދުމަށް ސަރުކާރުން ކުރަމުންދާ މަސައްކަތްތަކާއެކު ޑޮލަރަށް ބަރޯސާވުން ކުޑަކުރެވިގެންދާނެ ކަމަށާއި، ހަމައެކަނި ސިޗުއާން ޕްރޮވިންސްއިންވެސް 19 މިލިޔަން ރުފިޔާގެ ވިޔަފާރީގެ ފުރުޞަތުތައް އެބަހުރި ކަމަށް ވަޒީރު ސައީދު ވިދާޅުވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
