"ކެރޮލައިނާ ރީޕާ" - ދުނިޔޭގެ އެންމެ ކުޅި މިރުސް

އަހަރުމެން ދިވެހިންގެ ތެރެއިން މަދު ބައެއް ފިޔަވައި ދެންތިބި އެންމެންނަކީވެސް އާންމު ގޮތެއްގައި ކުޅިކޮށް ކެއުމަށް ލޯބިކުރާ ބައެއްކަމާމެދު ޝައްކެއް ނެތެވެ.

އެ ގޮތޮން މިފަހަރު މި ބަލާލަނީ ދުނިޔޭގައި މިހާތަނަށް ހެއްދި އެންމެ ކުޅި މިރުހަށެވެ. މި މިރުސް ހައްދާފައިވަނީ އެމެރިކާގެ ކެރޮލައިނާއަށް ނިސްބަތްވާ އެޑް ކަރީއޭވެ.

ކުޅިކޮށް ކާހިތުން މިރުސް ހައްދަން ފަށާފައިވަނީ ކޮލެޖް ދުވަސްވަރުކަމަށާއި މި މިރުސް ހެއްދީ ގޯސްޓް މިރުހައި ގިތެޔޮ މިރުސް ކްރޮސް ބްރީޑްކޮށްގެން ކަމަށް އޭނާ ހާމަކުރިއެވެ.

މި މިރުސް ކެއީމަ ފުރަތަމަ ދޭނީ ފޮނި ރަހައެއް ކަމަށާއި ކުޅި ރަހަ އިހުސާސް ކުރެވެން ފަށާނީ އޭގެ ފަހުން ކަމަށް އެޑް ކަރީ މައުލޫމާތު ދެއެވެ. ކެރޮލައިނާ ރީޕާގެ ނަމުން ނަން ދެވިފައިވާ މި މިރުހަށްވަނީ ދުނިޔޭގެ އެންމެ ކުޅި މިރުހުގެ ގޮތުގައި ގިނިސް ވޯލްޑް ރެކޯޑްސް އިން ޖާގަ ލިބިފައެވެ.

މި މިރުހުގެ ކުޅިކަން ދެނެގަތުމަށް ގަވައިދުން ކެރޮލައިނާގެ ވިންތްރޮޕް ޔުނިވާސިޓީގައި ޓެސްޓްތައް ހައްދާކަމަށް އެޑް ކަރީ ބުންޏެވެ.

އެގޮތުން މިރުހުގެ ކުޅިކަން ދެނެގަތުމަށްޓަކައި ބޭނުން ކުރަނީ 'ސްކޮވީލް ހީޓް' ޔުނިޓްސް ކަމަށާއި ކެރޮލައިނާ ރީޕާސްގައި 1،569،000 ސްކޮވީލް ހީޓް ޔުނިޓް ހުންނަ ކަމަށް އޭނާ ބުންޏެވެ. ހަލަޕީނިއޯގައި 5،000 ސްކޮވީލް ހީޓް ޔުނިޓް ހުންނައިރު ގިތެޔޮ މިރުހުގައި ހުންނަ ކަމަށް ރެކޯޑް ކުރެވިފައިވަނީ 200،000 ސްކޮވީލް ހީޓް ޔުނިޓެވެ.

މިރުސް ކައިގެން ކުޅިވި ކަމުގައި ވިޔަސް އެއީ ހަށިގަނޑަށް ނުރައްކާތެރި ކަމެއް ނޫންކަމަށާއި މިރުސް ކެއުމުން ކުޅިވަނީ ސިކުނޑިން އުފައްދާ ކެމިކަލް ރިއެކްޝަންތަކެއްގެ ސަބަބުން ކަމަށް ކެރޮލައިނާ ރީޕާ މިރުސް އުފެއްދި އެޑް ކަރީ ބުނެއެވެ.

މި މިރުސް ކެއީމަ ހީވަނީ ފަރުބަދައިން ފައިބާ އަލިފާން ކެވޭހެން ކަމަށް ބެއެއް މީހުން ބުނާއިރު، އިރުގަ ދޫލެވޭހެން ހީވާކަމަށްވެސް މި މިރުހުގެ ރަހަ ބެލި މީހުން ބުނެފައި އެބަ ހުއްޓެވެ.