ރާއްޖެޓީވީ އެއްވެސް ޝަރީއަތަކަަށް ނުވައްދަން ނިންމައިފި

ޝަރުއީ ދާއިރާގެ ކަރާމާތަށް ގެއްލުންވާފަދަ ކޮންޓެންޓް ގެނެސްދީފައިވާކަމަށް ބުނެ، ދިވެހިރާއްޖޭގެ އެއްވެސް ޝަރީއަތެއް ކަވަރުކުރަން ރާއްޖެޓީވީއަށް ފުރުސަތު ނުދޭން ޑިޕާރޓްމެންޓް އޮފް ޖުޑީޝަލް އެޑްމިނިސްޓްރޭޝަން (ޑީޖީއޭ) އިން ނިންމައިފިއެވެ.

ޑީޖީއޭ އިން މިހެން ބުނެފައިވަނީ މިއަދުގެ ވަގުތެއްގައި ނެރުނު އިއުލާނެއްގައެވެ. މި އިއުލާނުގައި ވާގޮތުގައި ކޯޓުގެ އަޑުއެހުންތަކާއި ޝަރުއީ ދާއިރާއިން ބާއްވާ ހަރަކާތްތައް ކަވަރު ކުރުމުގެ ފުރުސަތު ރާއްޖެ ޓީވީއަށް ނުދޭން ނިންމީ މިދިޔަ މަހުގެ 31 ވަނަ ދުވަހު އެ ސްޓޭޝަނުން ގެނެސްދިން ޕްރޮގްރާމެއްގައި ފަނޑިޔާރުންގެ ހުރުމަތް ކެނޑޭ ގޮތަށް، އަދި ޝަރުއީ ދާއިރާގެ ކަރާމަތަށް ގެއްލުން ލިބޭ ފަދަ ކޮންޓެންޓް ގެނެސްދީފައިވާތީ ކަމަށެވެ.

ރާއްޖެޓީވީ ޝަރީއަތުގެ މަޖިލީހަށް ނުވަދެވޭ ގޮތަށް ކަނޑައަޅައިފައިވަނީ އެ މައްސަލަ ބަލައި ނިމެންދެން ކަމަށް އިއުލާންގައި ވަނީ ފާހަގަކޮށްފައެވެ.

އިއުލާންގައި ބުނެފައިވާ ގޮތުގައި ރާއްޖެޓީވީއަށް މި ފިޔަވަޅު އަޅާފައިވަނީ  އެ ސްޓޭޝަނުން 2018 އޮކްޓޫބަރު 31 ވަނަ ދުވަހުގެ ހެނދުނު ރާއްޖެ ޓީވީން ގެނެސްދީފައިވާ "ފަށާއިރު" ޕްރޮގްރާމް ހުށަހަޅައިދިން ފަރާތްތަކުން އެ ޕްރޮގްރާމްގައި، ޝަރުޢީ ކޯޓުތަކާއި ފަނޑިޔާރުންގެ، އަދި ވަކިން ޚާއްޞަކޮށް ދިވެހިރާއްޖޭގެ ސުޕްރީމް ކޯޓާއި ދިވެހިރާއްޖޭގެ ސުޕްރީމް ކޯޓުގެ ފަނޑިޔާރުންގެ ޙުރުމަތް ކެނޑޭ އަދި މުޅި ޝަރުޢީ ދާއިރާގެ ކަރާމާތާއި ޤަދަރަށް އުނިކަން ލިބޭ ފަދަ ކޮންޓެންޓް ގެނެސްދީފައިވާކަން ފާހަގަކުރެވިފައިވާތީ އާއި، ރާއްޖެ ޓީވީ ގެ މި ޢަމަލަކީ ކޯޓުގެ ޙުރުމަތް ރައްކާތެރިކުރުމާބެހޭ ޤަވާޢިދު ގެ 4 ވަނަ މާއްދާގެ (ހ) ގެ 1، 8، 15 އަދި 16 ވަނަ ނަންބަރާ ޚިލާފު ޢަމަލެއްކަމަށް ވާތީ ކަމަށެވެ.

މި ނިންމުން ނިންމާފައިވަނީ ސުޕްރީމް ކޯޓުގެ ފަނޑިޔާރުންގެ މަޖިލީހުގެ އިއްތިފާގުންނެވެ. މީގެ ކުރިންވެސް ކޯޓުތަކުން ވަނީ ވަގުތީގޮތުން ބައެއް މީޑިޔާތައް ޝަރީއަތުގެ މަޖިލީހަށް ނުވައްދައި ޝަރީއަތްތައް ބާއްވާފައެވެ.