ފްރާންސް އަދި ނޯވޭ ވެސް އަނެއް ބުރަށް

މިހާރު ކުރިއަށްދާ ފީފާ ވަލްޑްކަޕްގެ ނޮކްއައުޓް ބުރުގެ ޖާގައެއް ފްރާންސް އަދި ނޯވޭ ހޯދައިފިއެވެ.

މުބާރާތުގެ ކުރިއަށް އޮތް ބުރުގެ ޖާގައެއް ފްރާންސް ކަށަވަރުކުރީ ރޭ އިރާގާ ދެކޮޅަށް ކުޅުނުމެޗް 3-0 ގެ ނަތީޖާއަކުން ކާމިޔާބުކޮށްގެންނެވެ. މެޗްގައި އެންމެ ފާހަގަވެގެން ދިޔައީ ފްރާންސްގެ ކެޕްޓަން ކިލިއަން އެމްބާޕޭ އެވެ. އޭނާ ވަނީ މި މެޗްގައި ދެ ގޯލް ޖަހައި މެޗްގެ މޮޅު ކުޅުންތެރިޔާގެ މަގާމުވެސް ހޯދާފައެވެ.

މެޗްގައި ފްރާންސްގެ ފުރަތަމަ ގޯލް އެމްބާޕޭ ޖަހާފައިވަނީ، 14 ވަނަ މިނެޓް ތެރޭގައެވެ. އަދި ދެވަނަ ގޯލް ޖަހާފައިވަނީ، 54 ވަނަ މިނެޓް ތެރޭގައެވެ. ފްރާންސްގެ ތިންވަނަ ލަނޑުޖެހި ޑެމްބެލޭ އެވެ. އެމްބާޕޭ މިމެޗްގައި ޖެހި ދެ ގޯލާއެކު އޭނާ ވަނީ މުބާރާތުގައި މިހާތަނަށް ހަތަރު ލަނޑު ޖަހާފައެވެ.

ރޭ ޖެހި ދެ ގޯލާއެކު އެމްބާޕޭ ވަނީ ވަރލްޑްކަޕްގައި މިހާތަނަށް 15 ގޯލް ކާމިޔާބުކޮށް މިހާތަނަށް ތިންވަނައަށް އެންމެގިނަ ގޯލްޖެހި ކުޅުންތެރިޔާގެ ގޮތުގައި ހިމެނިފައެވެ.

ވަރލްޑްކަޕް ނޮކްއައުޓް ބުރުގެ ޖާގައެއް ނޯވޭ ހޯދާފައިވަނީ، ސެނެގާލް އާ ދެކޮޅަށް ކުޅުނުމެޗް 3-2 ގެ ނަތީޖާއިން ކާމިޔާބުކޮށްގެންނެވެ. މިމެޗްގައި ހާލާންޑް ވަނީ ދެ ގޯލް ކާމިޔާބުކޮށްފައެވެ.