ބްރެޒިލް މޮޅުވެ ގްރޫޕްގެ އެއްވަނަ ހޯދިއިރު، ސްކޮޓްލޭންޑަށް މުބާރާތުން ކެޓުމުގެ ބިރު

ވަރލްޑްކަޕް ގްރޫޕް ސީގައި ރޭ ބްރެޒިލް އާއި ސްކޮޓްލޭންޑް ބައްދަލުކުރިމެޗް ބްރެޒިލް ކާމިޔާބުކޮށް ގްރޫޕްގެ އެއްވަނަ ޓީމްގެ ގޮތުގައި ދެވަނަ ބުރަށް ދަތުރުކޮށްފިއެވެ.

ސްކޮޓްލޭންޑުން މި މެޗަށް ނިކުތީ، ޕޮއިންޓެއް ހޯދައިގެން ނަމަވެސް ބޮޑު މުބާރާތެއްގެ ގްރޫޕް ފިޔަވަހިން ފުރަތަމަ ފަހަރަށް ސަލާމަތްވެވޭނެ ކަމުގެ އުއްމީދުގައެވެ. ނަމަވެސް މިމެޗްގައި ބްރެޒިލުން ވަނީ މޮޅަށްކުޅެ 3-0 ގެ ނަތީޖާއިން މެޗް ކާމިޔާބުކޮށްފަެވެ.

މެޗްގައި ފެނިގެންދިޔަ ފުރަތަމަ ލަނޑު ބްރެޒިލުން ޖަހާފައިވަނީ، ހަތްވަނަ މިނެޓް ތެރޭގައި ރެއާލް މެޑްރިޑުގެ ފޯވާޑް ވިނީޝިއުސް ޖޫނިއާ ކީޕަރު އެންގަސް ގަން ކައިރިން ނައްޓައި ގޯލުގެ ތެރެއަށް ބޯޅަ ފޮނުވާލައިގެންނެވެ. ވިނީޝިއުސް ޖޫނިއާ ދެވަނަ ފަހަރަށް ގޯލު ޖެހި ނަމަވެސް ވީއާރު ބެލުމަށްފަހު ރެފްރީ ނިންމީ އެއީ ގޯލެއް ނޫންކަމަށެވެ. ސަބަބަކީ ލަނޑުޖެހުމުގެ ކުރިން ޖެކް ހެންޑްރީ އަށް ފައުލެއް ކޮށްފައިވާތީ އެވެ.

މެޗްގައި ފެނިގެންދިޔަ ބްރެޒިލްގެ ދެވަނަ ލަނޑު ޖަހާފައިވަނީ، ފުރަތަމަ ހާފްގެ އިތުރުވަގުތުގެ ކުޅުމުގެ ތެރޭގައެވެ.  ދެވަނަ ހާފުގައި ސްކޮޓްލެންޑުން ރަނގަޅު ކުޅުމެއް ދައްކައި ކީރަން ޓިއާނީ ފޮނުވާލި ހަމަލާ ބްރެޒިލް ގޯލްކީޕަރު އެލިސަން ބެކާ ދިފާއުކުރިއެވެ. ބްރެޒިލްގެ ތިންވަނަ ލަނޑު ކާމިޔާބުކޮށްދިނީ ކޫންޔާއެވެ.

ރޭގެ މެޗަށްފަހު ގްރޫޕްގެ އެއްވަނަ ޓީމުގެ ގޮތުގައި ބްރެޒިލް އަނެއް ބުރަށް ދަތުރުކުރިއިރު، ސްކޮޓްލޭންޑަށް ވަނީ މުބާރާތުން އަލްވަދާޢު ކިޔުމުގެ ބިރާ ކުރިމަތިލާންޖެހިފައެވެ.