މެސީގެ ހަތަރު ސަތޭކަވަނަ ލަނޑާއެކު ބާސެލޯނާ މޮޅުވެއްޖެ
ސްޕެނިޝް ލީގުގައި ރޭ ބާސެލޯނާ އަދި އެއިބާ ބައްދަލުކުރި މެޗު 3-0 ކާމިޔާބުކުރީ ބާސެލޯނާއެވެ.
މެޗުގައި ސުއަރޭޒްގެ ފަރާތުން ދެ ލަނޑު ފެނިގެންދިޔަ އިރު ބާސެލޯނާގެ އަނެއް ލަނޑު ކާމިޔާބުރީ މެސީއެވެ. މެސީގެ މި ލަނޑަކީ އޭނާ ސްޕެނީޝް ލީގުގައި ކާމިޔާބުކުރި 400 ވަނަ ލަނޑެވެ. މެސީގެ 400 ވަނަ ލަނޑު ފެނިގެންމިދިޔައީ އޭނާ ލީގުގައި ކުޅުނު 435 ވަނަ މެޗުގައެވެ.
400 ލަނޑާއެކު މެސީވެފައިވަނީ ޔޫރަޕުގެ ގަދަ ފަސް ލީގުގައި އެ އަދަދަށް ލަނޑު ކާމިޔާބުކުރި ފުރަތަމަ ކުޅުންތެރިޔާއަށެވެ. ތަފާތު 37 ޓީމެއް ކޮޅަށް މެސީ ލީގުގައި ލަނޑުޖަހާފައިވާއިރު އޭނާ އެންމެ ގިނައިން ލަނޑު ޖަހާފައިވަނީ ސެވިއްޔާ ކޮޅަށެވެ. ސެވިއްޔާއައި ދެކޮޅަށް މެސީ ކުޅުނު 24 މެޗުގައި އޭނާވަނީ 25 ލަނޑު ޖަހާފައެވެ.
މެސީގެ މި ކާމިޔާބާއެކު އޭނާވެފައިވަނީ ސްޕެނިޝް ލީގުގައި ކުޅެމުން އަންނަ ނުވަތަ ކުޅެފައިވާ 29 ޓީމަށްވުރެ ގިނަ ލަނޑު ޖަހާފައިވާ ކުޅުންތެރިޔަކަށެވެ.
މި މެޗުން ބާސެލޯނާއަށް ލިބުނު ތިން ޕޮއިންޓާއެކު އެޓީމްވަނީ ތާވަލުގެ އެއްވަނައިގަ ފަސް ޕޮއިންޓްގެ ލީޑެއް ނަގާފައެވެ. އެއީ 19 މެޗް ކުޅެގެން ލިބުނު 43 ޕޮއިންޓާއެކީއެވެ. ތާވަލުގެ ދެވަނައިގަ އެޓްލެޓިކޯ މެޑްރިޑް އޮތީ 38 ޕޮއިންޓާއެކީއެވެ.
ރޭ ސްޕެނިޝް ލީގުގައި ރެއާލް މެޑްރިޑްވެސްވަނީ އެޓީމް ކުޅުނު މެޗް ކާމިޔާބުކޮށްފައެވެ. ރެއާލް ބެޓީސްގެ މައްޗަށް ރެއާލް މެޑްރިޑް ކުރި ހޯދީ 2-1 ކުންނެވެ. މި މޮޅާއެކު ރެއާލް މެޑްރިޑްވަނީ 33 ޕޮއިންޓާއެކު ތާވަލުގެ ހަތަރުވަނައަށް ޖެހިލާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
