ޕްރެސްޓަން އަތުން ލިވަޕޫލަށް އުނދަގޫ މޮޅެއް

ކުރިއަށް އޮތް ސީޒަނަށް ތައްޔާރުވުމުގެ ގޮތުން ޕްރެމިއާ ލީގުގެ ޗެންޕިއަން ލިވަޕޫލް ކުޅުނު ފުރަތަމަ މެޗުގަައި މިރޭ ރަށުން ބޭރުގައި ޗެންޕިއަންޝިޕްގެ ޕްރަސްޓަން އާއި ދެކޮޅަށް ކުޅުނު މެޗު 3-1 ގެ ނަތީޖާއަކުން ލިވަޕޫލުން ކާމިޔާބުކޮށްފިއެވެ.

މެޗުގެ ފުރަތަަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، ލިވަޕޫލުން މެޗުގެ ލީޑުހޯދީ ފުރަތަމަ ހާފުގެ 33 ވަނަ މިނެޓުގައެވެ. މިލަނޑު އެޓީމަށް ކާމިޔާބުކޮށްދިނީ އެޓީމުގެ ޒުވާން ޑިފެންޑަރު ކޯނޯ ބްރެޑްލޭ އެވެ. މިއީ އެޓީމުގެ މިޑްފީލްޑަރު ޑޮމެނިކް ސޮބްޒްލައި ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ލިވަޕޫލްގެ ދެވަނަ ލަނޑު ފަހުހާފުގެ 53 ވަނަ މިނެޓުގައި ކާމިޔާބުކޮށްދިނީ ދެވަނަ ހާފުގައި ބަދަލުކުޅުންތެރިއެއްގެ ގޮތުގައި ކުޅެން ނިކުތް އުރުގުއޭގެ ފޯވާޑް ޑާވިން ނުނޭޒް އެވެ.

ޕެރަސްޓަން އިން ނަތީޖާގެ ފަރަގު ކުޑަކުރި ލަނޑު ފަހުހާފުގެ 83 ވަނަ މިނެޓުގައި ކާމިޔާބުކޮށްދިނީ އެޓީމުގެ ޑިފެންޑަރު ލިއަމް ލިންޑްސޭ އެވެ. ނަމަވެސް އޭގެ ފަސް މިނެޓު ފަހުން ލިވަޕޫލްގެ ނެދަލޭންޑްސް ފޯވާޑް ކޯޑީ ގައްލޯ ވަނީ އިތުރު ލަނޑެއް ކާމިޔާބުކޮށް އަލުން އެޓީމަށް ދެލަނޑުގެ ލީޑެއް ހޯދައިދީފައެވެ.

ކުރިއަށް އޮތް ސީޒަނަށް ތައްޔާރުވުމުގެ ގޮތުން ލިވަޕޫލުން އިތުރު ތިން މެޗު ކުޅުމަށް ހަމަޖެހިފައިވާއިރު، އޭގެ ތެރެއިން ފުރަތަމަ މެޗުގައި މިމަހުގެ 26 ވަނަ ދުވަހު އެޓީމުން ނުކުންނީ އޭސީ މިލާނާއި ދެކޮޅަށެވެ. އަދި 30 ވަނަ ދުވަހު ޖަޕާންގެ ޔޮކަހާމާ ދެކޮޅަށް ކުޅުމަށްފަހު އޮގަސްޓް ހަތަރު ވަނަ ދުވަހު އެޓީމުން ނުކުންށާނީ  ސްޕެއިންގެ އެތްލެޓިކް ބިލްބާއޯ އާއިދެކޮޅަށެވެ.