ރޯދަ އެލަވަންސް ނުދިނުމުން ބަދަލުގެ ގޮތުގައި ބައިލައްކަ އެއްހާ ރުފިޔާ ދޭން ޖެހިއްޖެ
ރޯދަ އެލަވަންސް ނުދީ ވަޒީފާއިން ވަކިކުރި މީހަކަށް ބަދަލުގެ ގޮތުގައި ބައިލައްކަ އެއްހާ ދިނުމަށް އަމިއްލަ ކުންފުންޏެއްގެ މައްޗަށް ވަޒީފާއާބެހޭ ޓްރައިބިއުނަލުން ހުކުމްކޮށްފިއެވެ.
ޓްރައިބިއުނަލުން މިއަދު ހުކުމް ކޮށްފައިވަނީ ސ.ހިތަދޫގައި ސެކިއުރިޓީންގެ ޚިދުމަތްދޭ ޝަޒްމީ އިންވަސްޓްމަންޓުގެ މައްޗަށެވެ.
ޝަޒްމީ އިންވެސްޓްމަންޓްގައި ވަޒީފާއަދާ ކުރަމުން ދިޔަ އަހްމަދު ރަޝީދު އެ ކުންފުންޏާއި ދެކޮޅަށް މައްސަލައެއް ޓްރައިބިއުނަލަށް ހުށަހެޅީ ފާއިތުވި ރަމަޟާން މަހުގެ އެލަވަންސް ނުދީ އޭނާ ވަޒީފާއިން ވަކިކުރުމުންނެވެ.
2018 ވަނަ އަހަރުގެ މެއި މަހުގެ ތެރޭގައި ހުށަހެޅި އެ މައްސަލައިގައި ބުނެފައިވާ ގޮތުގައި އަހްމަދް ރަޝީދު ވަޒީފާއިން ވަކިކޮށްފައި ވަނީ އޭނާ ރަމަޟާން މަހުގެ އެލަވަންސް ނުދީގެން އެކަމާއި ގުޅިގެން ޝަކުވާ ކުރުމުންނެވެ.
މިއަދު ޓްރައިބިއުނަލް އިން ކުރި ހުކުމްގައި ވަނީ އަހްމަދު ރަޝީދު ވަޒީފާއިން ވަކިކޮށްފައިވަނީ ޤާނޫނާއި ޚިލާފަށް ކަމަށް ވާތީ އޭނާގެ ވަޒީފާ އަނބުރާ ދިނުމަށް ޝަޒްމީ އިންވެސްޓްމަންޓްގެ މައްޗަށް އަމުރުކޮށްފައެވެ.
އަދި އޭގެ އިތުރުން މައްސަލަ ޓްރައިބިއުނަލަށް ހުށަހެޅި ތާރީޚުން ފެށިގެން ވަޒީފާ އަނބުރާ ހަމަޖެހުމާއި ހަމައަށް ވަޒީފާގައި ހުރެގެން އަހްމަދު ރަޝީދަށް ލިބޭނެ ފައިސާ އާއި ފާއިތުވި ރަމަޟާން މަހުގެ އެލަވަންސް ފައިސާ ވެސް ދިނުމަށް ވަނީ އަމުރުކޮށްފައެވެ.
އަހުމަދު ރަޝީދުގެ މަހު މުސާރަ އަކީ 4500 ރުފިޔާއެވެ. އެހެންކަމުން އޭނާ މައްސަލަ ހުށަހެޅި ތާރީޚުން ފެށިގެން މިހާތަނަށް ކޮންމެ މަހަކަށް އޭނާއަށް ދޭން ޖެހެ މުސާރައިގެ ޖުމްލަ އަދަދު ސާޅީސް ހާސް ރުފިޔާ އަށް އަރާނެއެވެ.
ޓްރައިބިއުނަލްގެ ހުކުމްގައި ބުނެފައިވާ ގޮތުން 14 ދުވަހުގެ ތެރޭގައި ހުކުމާއި އެއްގޮތަށް ޝަޒްމީ އިންވަސްޓްމަންޓުން އަމަލުކުރަން ޖެހޭނެއެވެ.
ރަމަޟާން މަހުގެ އެލަވަންސް ނުދިނުމަކީ ރާއްޖޭގައި ވަރަށް ބޮޑު މައްސަލައެކެވެ. އެހެން ނަމަވެސް މިއީ ރަމަޟާންމަހުގެ އެލަވަންސް އާއި ގުޅުންހުރި މައްސަލައެއްގައި މިހާ ބޮޑު އަދަދެއް ދެއްކުމަށް ވަޒީފާ ދިން ފަރާތެއްގެ މައްޗަށް ހުކުމްކުރި ފުރަތަމަ ފަހަރެެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
