ދިވެހި ރާއްޖެއާ މެދު ދޮގު ވާހަކަތަކެއް ލިޔުމުން އިޓަލީވިލާތުގެ ލިޔުންތެރިއެއް ހޫނުފެނަށް!

2017 ވަނަ އަަހަރު ދިވެހި ރާއްޖެއާ މެދު އިޓަލީގެ ލިޔުންތެރިއެއް ކަމަށްވާ ފްރެންސެސްކާ ބޮއްރީ ޝާޢިރުކޮށްފައިވާ ފޮތަކާމެދު މިއަދު މީސް މީޑިއާގައި ގިނަ ބަޔަކު އަންނަނީ ހިތްހަމަނުޖެހުން ފާޅުކުރަމުންނެވެ.

"ޑެސްޓިނޭޝަން ޕެރަޑައިސް: އަމޮންގް ދަ ޖިހާދިސްޓްސް އޮފް މޯލްޑިވްސް" ނަމަކަށް ކިޔާ މި ފޮތުގައި ދިވެހި މުޖުތަމަޢުއާއި ސަޤާފަތް ސިފަކޮށްދީފައިވަނީ މުޅިން ނުބައިކޮށް ކަމަށް ބުނެ ޓްވިޓާރގައި ޙަރަކާތްތެރިވާ ދިވެހިން އިއްޔެއިން ފެށިގެން ދަނީ ޚިޔާލުފާޅުކުރަމުންނެވެ.

ދިވެހިން ފްރެންސެސްކާގެ ލިޔުމުން ބައިތައް ހިމެނޭގޮތަށް ޓްވީޓްތަކުން އޭނާއަށް ރައްދުދެމުންދާއިރު، ބައެއް މީހުން ވަނީ ފްރެންސެސްކާ އަށް ހަޤީގީ ދިވެހި ރާއްޖެ ދައްކައިދިނުމުގެ މަސައްކަތްކުރަން ތައްޔާރުކަމަށްވެސް ބުނެފައެވެ.

ފްރެންސެސްކާގެ ފޮތުގެ ބޭރުގަނޑުންވެސް އޭނާއަށް ދިވެހި ރާއްޖެ ފަހުމުވެފައިވަނީ އެންމެ ރަނގަޅަކަށް ނޫންކަން ހާމަވެގެންދެއެވެ. އަދި ފޮތުގެ އެތެރޭގައި އޭނާ ލިޔެފައިހުރި ބައެއް ވާހަކަތަށް އެއީ ދިވެހި މުޖުތަމަޢުއެއްގައި ބޮޑުވި މީހަކަށް ޤަބޫލުކުރެވޭނެފަދަ ވާހަކަތަކެއްވެސް ނޫނެވެ.

ފްރެންސެސްކާގެ ލިޔުމާއި ދިވެހި ހަޤީގަތާއިމެދު ހުރި ފަރަޤު ފެނިފައި ގިނަ ބަޔަކު ދަނީ އޭނާގެ ލިޔުމަކީ ޚިޔާލީ ލިޔުމެއްކަމަށް ބުނެ އޭނާއަށް ފާޑުކިޔަމުންނެވެ.

ފްރެންސެސްކާގެ މި ފޮތަށް ރިޢާޔަތްކުރާނަމަ ދިވެހިންނަކީ ޖާހިލިއްޔަ ޒަމާނުން އަރައިގެން ބައެއްހެން ހިޔެއްނުވެއެވެ. އަދި ދިވެހިންނަކީ އަލް-ޤައިދާ ފަދަ އިސްލާމް ދީނުގެ ނަމުގައި ހަރުކަށި ވިސްނުން ގެންގުޅޭ ހަނގުރާމަވެރި ފަރާތްތަކަށް ތާޢީދުކުރާބައެކެވެ.

އައި ފޯނެއް ފެނިގެން ހައިރާންވާފަދަ ބައެއްގެ ގޮތުގައި ފްރެންސެސްކާ ދިވެހިން ސިފަކޮށްފައިވާއިރު، އޭނާ އަސްލުވެސް ޒިޔާރަތްކުރީ މާލެ ސިޓީއަށްތޯ ގިނަމީހުން ދަނީ މީސްމީޑިޔާގައި ސުވާލު އުފައްދަމުންނެވެ.

ދިވެހި ބައެއް ނަން މަޝްހޫރު ސިޔާސީ ފަރާތްތަކެއްގެ ބަސްވެސް މި ފޮތުގައި ހިމެނިގެންދާއިރު، އެ ފަރާތްތަކުގެ ޢިލްމީ ވާހަކައާއި ފްރެންސެސްކާގެ ލިޔުމުގައި އޭނާ ޚިޔާރުކުރި ނެރެޓިވް ނުގުޅޭކަންވެސް ފާހަގަކުރެވެއެވެ.

ޓްވިޓާރގައި ޚިޔާލުފާޅުކުރަމުންދާ ފަރާތްތަކުން ބުނާ ގޮތުގައި، ދުނިޔޭގެ އެކި ހިސާބުތަކުގައި ޙަރަކާތްތެރިވަ އަލް-ޤައިދާ އަދި އައިސިސް ފަދަ ހަރުކަށި ފިކުރުގެ މަދު ބަޔަކު ދިވެހިންގެ ތެރޭ އުޅުނެއްކަމަކު، އެ ކުށް މުޅި ދިވެހި މުޖުތަމަޢުގެ ބޮލުގައި އެޅެންޖެހޭ އެއްވެސް ސަބަބެއް ނެތެވެ. އަދި އެފަދަ ޖަމާޢަތަކުން ހިންގާ ލާއިންސާނީ ޢަމަލުތަކަކީ ދިވެހިން ޒިންމާވާކަށްވެސް ނުޖެހޭނެއެވެ.

މާލެ ސިޓީގައި ފޮތް ފިހާރައެއް ނެތްކަމަށް ތުހުމަތުކޮށް ފްރެންސެސްކާ ލިޔުނު މި ފޮތުގައި، ދިވެހިންނަކީ މުޅި ދުނިޔޭގައިވެސް އަމިއްލަ ސަޤާފީ ކެއުމުގެ ބައެއް ނޯންނަ ހަމައެކަނި ޤައުމުކަމަށް ޤަބޫލުކުރެވޭކަމަށްވެސް އޭނާ ވަނީ ލިޔެފައެވެ.