ޒަކިއްޔާގެ ހަށިގަނޑުގެ އޮޓޮޕްސީ ނުހެދި ސަބަބު ފުލުހުން ހާމަކޮށްފި
ޒަކިއްޔާގެ ހަށިގަނޑުގެ އޮޓޮޕްސީ ނުހެދި ސަބަބު ފުލުހުން ހާމަކޮށްފިއެވެ.
ފުލުހުން ވިދާޅުވީ ނ. ހޮޅުދޫގައި މަރުވެފައި އޮއްވާ ފެނުނު ޒަކިއްޔާ މޫސާގެ ހަށިގަނޑުގެ އޮޓޮޕްސީ ނުހެދީ ތަޙްޤީޤަށް އެކަން ކުރަން ނުފެންނާތީ ކަމަށެވެ. ނަމަވެސް އެކަމުގެ މާބޮޑު ތަފްޞިލެއް ފުލުހުން ނުދެއްވައެވެ.
ބުދަ ދުވަހު ބޭއްވި ނޫސްވެރިންގެ ބައްދަލުވުމެއްގައި ފުލުހުންގެ ޗީފް ސުޕްރިންޓެންޑެންޓް ހަސަން ޝިފާއު ވިދާޅުވި ގޮތުގައި ޒަކިއްޔާގެ ހަށިގަނޑުން ތަޙްޤީޤަށް ބޭނުންވާ ސާމްޕަލްތައް ނަގާފައިވެއެވެ. އަދި އޮޓޮޕްސީ ނުހަދަން ނިންމީ ޑޮކްޓަރުންގެ ފަރާތުން ބޭނުންވާ ރައުޔު ލިބުމުންނެވެ.
ރާއްޖެއިން ބޭރަށް ގެންގޮސްގެން އޮޓޮޕްސީއަކަށް އަޅުގަނޑުމެން ނުދިޔައީ ފުލުހުންގެ ތަހުގީގަށް ހަށިގަނޑުން ނަގަންޖެހޭ ސާމްޕަލްތައް ތަހުލީލުތައް ކޮށް އެ ތަހުލީލުތަކުންނާ އަދި ސްޕެޝަލިސްޓް ޑޮކްޓަރުގެ ފަރާތުން އަޅުގަނޑުމެން ހޯދަން ބޭނުންވި ރައްޔުތައް ހޯދުމަށްފަހު އިތުރަށް އޮޓޮޕްސީ ހަދަންޖެހޭ ސަބަބެއް އޮތް ކަމަށް ތަހުގީގަށް ނުފެންނާތީ
ޗީފް ސުޕްރިޓެންޑެންޓް އޮފް ޕޮލިސް ހަސަން ޝިފާއު ވިދާޅުވިއެވެ.
މި ހާދިސާގެ މަޢުލޫމާތު ފުލުހުންނަށް ލިބިފައިވަނީ 10 ސެޕްޓެންބަރު 2024 ވަނަ ދުވަހުގެ ހެނދުނު 10:10 ހާއިރުއެވެ. ޒަކިއްޔާގެ ހަށިގަނޑު ފެނުނީ އެ ގެއަށް ކުނި ނަގަން ވަތް މުނިސިޕަލް މުވައްޒަފުންނަށެވެ. ހަށިގަނޑު ފެނުނުއިރު ކަރުގައި ވަޅި އަޅާފައިވާއިރު، ކައިރީގައި ގިނަ އަދަދެއްގެ ލޭ ހުއްޓެވެ.
ފުލުހުންގެ ތަޙްޤީޤަށް ޒަކިއްޔާގެ ހަށިގަނޑު މާލެ ގެނެސް، 12 ސެޕްޓެންބަރު 2024 ގައި ވަޅުލާފައިވެއެވެ. ވަޅުލާފައިވަނީ ޒަކިއްޔާގެ އުފަންރަށް ނ.ހޮޅުދޫގައެވެ.
ފުލުހުން ވިދާޅުވީ ތަޙްޤީޤު ކުރިއަށްދާ މައްސަލައަކަށްވާތީ އިތުރު ތަފްސީލު ހާމަކުރެވެން ނެތް ކަމަށެވެ. ނަމަވެސް، ފަހުން މި މައްސަލައިގެ އިތުރު މަޢުލޫމާތުތައް ހާމަކުރާނެ ކަމަށް ފުލުހުން ބުނެފައިވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
