ރައީސްގެ އިލްތިމާސް: ދަރިވަރުންނަކީ ފަތިސް ނަމާދުން ދުވަސް ފަށާ ބައެއްގެ ގޮތުގައި ބައްޓަންކޮށްދެއްވާ
ލިޔުންތެރިޔާ
ޚަދީޖާ އަރުފާ
ފަތިސްނަމާދުން ދަރިވަރުން ދުވަސް ފެށުމަށާއި އެކަން މައިންބަފައިން ކަށަވަރުކޮށް، ދަރިވަރުން އެގޮތަށް ބައްޓަންކޮށްދެއްވުމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު އެދިވަަޑައިގެންފިއެވެ.
ދިރާސީ އައު އަހަރު މިއަދު ފެށިފައިވާއިރު، ހުޅުމާލޭގައި މި އަހަރު އަލަށް ހުޅުވާ، ޝަހީދު ޢަލީ ސުކޫލްގައި ހުޅުވުމުގެ ގޮތުން ބޭއްވި ރަސްމިއްޔާތުގައި ވާހަކަދައްކަވަމުން ދިވެހިންނަކީ މުސްލިމުން ކަމުގައިވާއިރު ދިވެހިން ވާންޖެހޭނީ އެކަން ހަނދާންކޮށް ދީނުގައި އަންގަވާފައިވާ ގޮތަށް ކަންކަން ތަރުތީބު ކުރާ ބަޔަކަށް ކަމަށެވެ. އެގޮތުން ފަރުޟު ފަސް ނަމާދު އޭގެ ވަގުތުގައި އަދާކުރުމަށް އެމަނިކުފާނު ވަނީ އިލްތިމާސްކުރައްވާފައެވެ.
ފަރުޟު ގަސް ނަމާދު ވަގުތުގައި އަދާކުރުމަށް ހުރިހާ ދަރިވަރުންނަށްވެސް އަޅުގަނޑު އިލްތިމާސްކުރަން. ފަތިސް ނަމާދަށް ގަޑިއަށް ހޭލުމަށް. ފަތިސް ނަމާދުން ދުވަސް ފެށުމަށް ހުރިހާ ކުދިންވެސް ޢަޒުމް ކަނޑައެޅުމަށް ރާއްޖޭގެ ހުރިހާ ކުދިންނަށް އަޅުގަނޑު އިލްތިމާސްކުރަން. މައިންބަފައިން ކިބައިންވެސް އެދެން، ހުރިހާ ކުދިންވެސް ދުވަސް ފަށަނީ ގަޑިއަށް ފަތިސް ނަމާދަށް ތެދުވެ، ފަތިސް ނަމާދުންކަން އެއީ މައިންބަފައިންގެ ޒިންމާ ކަމުގައި ކަނޑައަޅައި އެކަން ކަށަވަރު ކުރެއްވުމަށް.
ރައީސުލްޖުމްހޫރިއްޔާ ޑރ.މުހައްމަދު މުއިއްޒު
ރައީސް އިތުރަށް ވިދާޅުވީ، އިސްލާމްދީނުގައި ކަންކަން ބަޔާން ކޮށްފައި އޮންނަނީ ވަރަށް މާތް މަޤުސަދެއްގައި ކަމަށެވެ. އެކަންކަމަކީ ފޮތެއްގައި ލިޔެވި، ޢަމަލީ ގޮތުން އަހަރެމެންގެ ޙަޔާތުން ކޮންމެ ދުވަހަކުވެސް ފެންނަންޖެހޭ ކަމެއް ކަމަށް އެމަނިކުފާނު ވިދާޅުވިއެވެ.
އެހެންވީމާ ދުވަސް ފަށަން އޮންނަ ގޮތަށް ފަށައި، ދުވަހުގެ ބޭނުން އެންމެ ހެޔޮ ގޮތުގައި ހިފާނެ ގޮތަށް ކަންކަން ސްކޫލްތަކުގައިވެސް ތަރުތީބުވެފައި އޮންނަންވާނީ.
ރައީސުލްޖުމްހޫރިއްޔާ ޑރ.މުހައްމަދު މުއިއްޒު
އެގޮތުން ސުކޫލްތަކުގައި ނަމާދު ކުރުމަށް ޚާއްސަ ތަންތަން ހުންނަކަން ފާހަގަކުރައްވައި ރައީސް ވަނީ ނަމާދަށް ފަރުވާތެރިވުމަށް ދަރިވަރުންނަށް ތަކުރާރުކޮށް ނަޞޭޙަތްތެރިވެވަޑައިގެންފައެވެ.
މީގެ އިތުރުން، ދަރިވަރުންނަކީ މައިންބަފައިންނަށް ކިޔަމަންތެރި ޓީޗަރުން ބުނާ ބަސް އަހާ ބަޔަކަަށް ވުމަށް އިލްތިމާސްކުރައްވާފައެވެ.
”އޭރުން އަޅުގަނޑުމެންގެ ތުއްތު ކުދިންގެ މުސްތަގުބަލަށް އެ އެޅިގެންދަނީ ގުޑުވާ ނުލެވޭ ވަރުގެ ވަރުގަދަ ބިންގަލެއް“ ރައީސް ވިދާޅުވިއެވެ.
.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
