ނިމާލް ނިޔާވެއްޖެ ކަމަށް ބުނާ ވާހަކައަކީ ދޮގެއް, ހެޔޮ ދުއާކޮށްދީ
ލިޔުންތެރިޔާ
އަހުމަދު ހަމީދު އާދަމް
ސްޓްރޯކެއް ޖެހި ސީރިއަސް ހާލަތެއްގައި އޮތް ފިލްމީ ތަރި އަހްމަދު ނިމާލް ނިޔާވެއްޖެ ކަމަށް ބުނެ ފެތުރެމުންދާ ވާހަކަތައް ދޮގުކޮށް ހެޔޮ ދުއާކޮށްދޭން އާއިލާއިން އެދިއްޖެ އެވެ.
މީގެ ދެ ދުވަސްކުރީން ސްޓްރޯކެއް ޖެހި ހާލު ދެރަވި ނިމާލަށް އައިޖީއެމްއެޗްގެ އައިސީޔޫގައި ދަނީ ފަރުވާ ދެމުންނެވެ. ނަމަވެސް މިރޭ ނިމާލް, ނިޔާވެއްޖެ ކަމަށް ބުނެ ސޯޝަލް މީޑިއާގައި ގިނަ ބަޔަކު ދަނީ ޕޯސްޓްތައް ކުރަމުންނެވެ.
އެހެން ދިމާވީ ފިލްމު ޑައިރެކްޓަރަކު ލިޔުނު ޕޯސްޓަކާއި ގުޅިގެން ކަމަށް ބެލެވެ އެވެ. އޭގައިވާ ވާހަކައެއް ބަލާލުމެއް ނެތި އެތައް ބަޔަކު އެ ސްޓޭޓަސް ސެއާ ކޮށް ނިމާލް ނިޔާވެއްޖެ ކަމަށް ބުނެ ޕޯސްޓްތައް ކުރަން ފެށީ އެވެ.
ނިމާލްގެ އާއިލާއިން ވަނީ އެ އާއިލާއަށް ވަރަށް އުނދަގޫ މިވަގުތު މިފަދަ ދޮގު ވާހަކަތައް ނުފަތުރަން އެދިފަ އެވެ. އަދި ނިމާލަށް ހެޔޮ ދުއާކޮށްދޭން އެދިފައިވެ އެވެ. ނިމާލްގެ ދޮށި ފިިރިހެން ދަރިފުޅު, ޖުމައިލް ނިމާލް އާއި އާއިލާގެ އެހެން ބައެއް މެންބަރުން ވަނީ ސޯޝަލް މީޑިއާގައިވެސް އެކަން ހާމަކޮށްފަ އެވެ.
ނިމާލަށް މިވަގުތު ފަރުވާ ދެމުންދަނީ އައިޖީއެމްއެޗްގެ އައިސީޔޫގަ އެވެ. ރޭގެ ވަގުތެއްގައި އޮޕަރޭޝަނެއް ވެސް ވަނީ ކޮށްފަ އެވެ. އާއިލާއިން އުންމީދުކޮށްގެން ތިބީ އޮޕަރޭޝަނަށް ފަހު ހާލަތު ރަނގަޅު ވަމުން އަންނާނެ ކަމަށެވެ. އެހެން ކަމުން ވީހާވެސް ގިނަ ބަޔަކު ހެޔޮ ދުއާކޮށް ދިނުމަށް އެދިފައިވެ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
