ޣައްޒާ ހިފަން އިޒްރޭލުގެ ކެބިނެޓް ނިންމި ނިންމުން ރައީސް ކުށްވެރި ކުރައްވައިފި
ލިޔުންތެރިޔާ
އަހުމަދު ހަމީދު އާދަމް
ފަލަސްތީނުގެ ޣައްޒާ ހިފަން އިޒްރޭލުގެ ކެބިނެޓް ނިންމި ނިންމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހަރުކަށި އިބާރާތުން ކުށްވެރި ކުރައްވައިފި އެވެ.
އެމަނިކުފާނު ވަނީ އެކަން ކުށްވެރިކުރައްވާ އެކްސްގައި ޕޯސްޓެއް ކުރައްވާފަ އެވެ. އިޒްރޭލްގެ ކެބިނެޓްގެ އެ ނިންމުން ރައީސް ސިފަ ކުރެއްވީ ބައިނަލްއަގްވާމީ ގާނޫނުތަކާއި ފާޅުކަން ބޮޑުގޮތެއްގައި ހިލާފު ނިންމުމެއްގެ ގޮތުގަ އެވެ.
ރައީސުލްޖުމްހޫރިއްޔާ ވަނީ ޔަހޫދީންގެ މި ނުބައި އެޖެންޑާ ތަންފީޒު ކުރުން ހުއްޓާލުމަށް ހަރުއަޑުން ގޮވާލައްވާފަ އެވެ. އަދި އިޒްރޭލްގެ އަނިޔާވެރިކަން ނިމުމަކަށް ގެނައުމަށް ބައިނަލްއަގްވާމީ ދުނިޔެއަށް ގޮވާލެއްވި އެވެ. މީގެ އިތުރުން ފަލަސްތީނުގެ ބިންތަކަށް ވެރިވެ ގަނެ ތިބެ ޔަހޫދީން ހިންގަމުންދާ އިންސާނިއްޔަތާއި ހިލާފު އަމަލުތަކަށް އިޒްރޭލްގެ ވެރީން ޖަވާބުދާރީ ކުރުވުމަށް ވެސް ރައީސް ވަނީ ގޮވާލައްވާފަ އެވެ.
ރައީސުލްޖުމްހުރިއްޔާގެ ޕޯސްޓްގައި އެމަނިކުފާނު ވަނީ ރާއްޖެ އޮތީ ފަލަސްތީނާ އެކު ކަން ވިދާޅުވާ ވިދާޅުވުން ތަކުރާރު ކުރައްވާފަ އެވެ. އަދި ވިދާޅުވީ ފަލަސްތީނުގެ މިނިވަން ކަމާއި ދެކޮޅަށް އިޒްރޭލުން ހިންގާ ކޮންމެ ކަމަކާއި ދިވެހީން ދެކޮޅު ހަދާނެ ކަމަށެވެ.
އިސްރާއީލު އިސްތިއުމާރީ ބާރުގެ ދަށަށް މުޅި ޣައްޒާ ގެންދާނެ ކަމަށް އިސްރާއީލުން ނިންމި ނިންމުން ދިވެހި ސަރުކާރުން ވެސް ވަނީ އެންމެ ހަރުކަށި އިބާރާތުން ކުށްވެރި ކޮށްފަ އެވެ.
ފޮރިން މިނިސްޓްރީން މިއަދު ނެރެފައިވާ ބަޔާނެއްގައި ބުނެފައި ވަނީ އިސްރާއީލުގެ އިސްތިއުމާރީ ބާރުތަކުން މުޅި ޣައްޒާގެ ހިންގުން ފުރިހަމަ ބާރުގެ ދަށަށް ގެންދަން ނިންމަން އުޅޭ ކަމަށް އިސްރާޢީލުން ހާމަކުރުމަކީ ބައިނަލްއަޤްވާމީ ޤާނޫނާ މުޅިން ހިލާފު ކަމެއް ކަމަށެވެ. އަދި ފަލަސްތީނުގެ އަމިއްލަ ވެރިކަން ހިންގުމަށް އެޅޭ ހުރަހެއްކަމަށާއި ފަލަސްތީނުގެ ސިޔާދަތީ ބާރަށް އަރައިގަތުން ކަމުގައި ދިވެހި ސަރުކާރުން ދެކޭ ކަމަށެވެ.
ދިވެހި ސަރުކާރުން ބައިނަލްއަޤްވާމީ މުޖުތަމަޢުއަށް އިސްރާއީލުގެ މި ނިންމުން ތަންފީޒު ކުރަން ހުއްޓުވުމަށް އިސްރާއީލަށް މަޖުބޫރު ކުރުމަށް އަޅަންޖެހޭ ފިޔަވަޅުތައް އެޅުމަށް ވެސް ވަނީ ގޮވާަލާފަ އެވެ. އަދި އިސްރާއީލުން ފަލަސްތީނުގައި ހިންގާ އަނިޔާވެރި ޢަމަލުތައް ވަގުތުން ހުއްޓުވައި، އިސްރާއީލު ޖަވާބުދާރީ ކުރުވުމަށް ކުރަންޖެހޭ އެންމެހާ މަސައްކަތެއް ކުރުމަށް ވެސް ވަނީ ގޮވާލާފަ އެވެ.
ފަލަސްތީނުގެ ރައްޔިތުން މިނިވަން، މުސްތަޤިއްލު ދައުލަތެއް އުފެއްދުމަށް ކުރަމުންދާ މަސައްކަތްތަކަށް ދިވެހިރާއްޖޭން އަބަދުވެސް ތާއީދު ކުރާނެ ކަމަށް އެ ބަޔާނުގައިވެ އެވެ. އަދި މި ހަމަނުޖެހުމަށް ދެމެހެއްޓެނިވި އަދި ޢަދުލުވެރި، ޞުލްޙަވެރި ޙައްލެއް ލިބޭނީ 1967 ގެ ކުރީގެ ސަރަޙައްދުތަކުގެ މައްޗަށް ބިނާކޮށް، އިރުމަތީ ޤުދުސްއަކީ ވެރިކަންކުރާ ރަށްކަމުގައި ކަނޑައަޅައި، މިނިވަން އަދި މުސްތަޤިއްލު ފަލަސްޠީނު ދައުލަތެއް ޤާއިމްކުރެވި ގެންކަމުގައި ދެކޭ ކަމަށް ވެސް ބުނެފައިވެ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
