މަޖިލިސްގެ ނައިބު ރައީސް މަގާމުން ވަކި ކުރަން ޕީޕީއެމްއުން ހުށަހަޅަނީ

ރައްޔިތުގެ މަޖިލިސްގެ ނައިބު ރައީސް މޫސާ މަނިކު މަގާމުން ވަކި ކުރާން ހުށަހަޅުއްވާނެ ކަމަށް ޕީޕީއެމްގެ ޑެޕިއުޓީ ޕީޖީ ލީޑަރު އިބްރާހިމް ފަލާހް ވިދާޅުވެއްޖެއެވެ.

މިއަދު ބޭއްވި މަޖިލިސް ޖަލްސާގައި އެންޓި ޑިފެކްޝަން ބިލް އުވާލުމުގެ ބިލް ބަލައިގަތުމަށްޓަކައި ބަހުސް ކުރައްވަމުން ފަލާހުވަނީ މަޖިލީހުގެ ނައިބު ރައީސް މޫސަގެ އިތުބާރު ނެތް ކަމުގެ މައްސަލަ ހުށަހެޅުއްވުމުގެ މަސައްކަތް ކުރައްވަމުން ގެންދަވާ ކަމަށް ބުނެފައެވެ.

ޖަލްސާތައް ކުރިއަށްދާ ގޮތާއިމެދު ހިތްހަމަ ނުޖެހުން ފާޅު ކުރައްވަމުން ފަލާހްވަނީ މިހާރު މަޖިލިސް ޖަލްސާތައް ކުރިއަށް ގެންދަވަނީ ބަންދު ދުވަސްތަކުގައި ރޭގަނޑެއް ދުވާލެއް ބެލުމެއް ނެތި މެންބަރުންނަށްވެސް އެނގުމެއް ނެތި ކަމަށް ވިދާޅުވެފައެވެ.

މިކަމަށް އިޝާރަތް ކުރައްވަމުން ފަލާހް ވިދާޅުވީ މިއަދުގެ ޖަލްސާ ބާއްވާނެކަން މެންބަރުންނަށް އެންގުމަށްފަހު ކެންސަލް ކޮށްފަވާކަމަށާއި އޭގެ ފަހުން އަނެއްކާވެސް 11:00 ގައި ޖަލްސާ އޮންނާނެކަން އެނގިވަޑައިގަތީ ޖަލްސާ ފެށެން 15 މިނެޓަށް ވެފައިވަނިކޮށް ފޯނު މެސެޖަކުން ކަމަށެވެ.

މި ވާހަކަތަކަށް ރައްދު ދެއްވަމުން މަޖިލިސްގެ ނައިބު ރައިސް މޫސާ މަނިކު ވިދާޅުވީ އޭނާ އަމަލު ކުރައްވަމުން ގެންދަވަނީ ޕީޕީއެމް އަދި އެމްޑީޕީ ބޭނުންވާ ގޮތަކަށް ނޫންކަމަށެވެ. އަދި ޖަލްސާތައް އޮންނަ ގަޑިތައް ނިންމަވަނީ މަޖިލިސްގެ ރައީސް މަސީހު ކަމަށާއި އޭނާގެ ޒިންމާއަކީ އެކަން މެންބަރުންނަށް އެންގުން ކަމަށްވެސް މޫސަ ވިދާޅުވިއެވެ.

މަޖިލިސްގެ ނައިބު ރައީސް ކަމުން މޫސަ ވަކި ކުރުމަށް ޕީޕީއެމްއިން ހުށަހަޅަން ނިންމާފައިވާއިރު މަޖިލިސްގެ ރައީސް މަސީހުގެ އިތުބާރުނެތް ކަމުގެ މައްސަލަ އިދިކޮޅު މެންބަރުން ވަނީ މަޖިލީހަށް ވައްދާފައެވެ.