އިބޫގެ ފުރަތަމަ ބަޖެޓް: 29 ބިލިއަން ރުފިޔާ!

އިންތިޚާބީ ރައީސް އިބްރާހިމް މުހައްމަދު ސޯލިހުގެ ވެރިކަމުގެ ފުރަތަމަ އަހަރު، 2019ގެ ބަޖެޓެއްގެ ގޮތުގައި 29 ބިލިއަން ރުފިޔާގެ ބަޖެޓެއް ކަނޑައަޅައި، ފާސްކުރުމަަށް ރައްޔިތުންގެ މަޖިލީހަށް ފޮނުވައިފިއެވެ.

މީޑިޔާތަކަށް މައުލޫމާތު ދެއްވި ފިނޭންސް މިނިސްޓްރީގެ އޮފިޝަލެއް ވިދާޅުވީ މިރޭ މަޖިލީހަށް ހުށައަޅާފައިވަނީ ޖުމްލަ 29.6 ބިލިއަން ރުފިޔާގެ ބަޖެޓެއްކަމަށެވެ. މި ބަޖެޓް އެކުލަވާލާފައިވަނީ އިބްރާާހިމް މުހައްމަދު ސޯލިހުގެ ފަރާތްޕުޅުން ހުށައެޅުއްވި ކަންކަންވެސް ހިމެނޭގޮތުންކަމަށްވެސް އޮފިޝަލް ވިދާޅުވިއެވެ. މި ބަޖެޓް މަޖިލީހުގެ ތަޅުމަށް ހުށަހަޅުއްވައިދެއްވާާނީ ފިނޭންސް މިނިސްޓަރ އަހުމަދު މުނައްވަރެވެ.

ބެލެވޭ ގޮތުގައި މި ބަޖެޓްގައި އިބޫގެ ސަރުކާރުގެ ފުރަތަމަ އަހަރުގެ ވައުދުތަކާއި، މުހިންމު ވައުދުތައް ފުއްދުމުގެ މަސައްކަތްތައް ފެއްޓުމާއި ގުޅުންހުރި ހަރަދުތައް ހިމެނޭނެއެވެ. މި ބަޖެޓްއަށް ޚާއްސަ ފޮތެއް ނެރުމަށްވެސް ވަނީ ހަމަޖެހިފައެވެ.

އިބޫގެ ސަރުކާރުގެ ފުރަތަމަ އަހަރުގެ ބަޖެޓްގެ ގޮތުގައި 29 ބިލިއަން ރުފިޔާ ހުށަހަޅުއްވާފައި ވާއިރު، މިއީ މިހިނގާ 2018 ވަނަ އަހަރުގެ ބަޖެޓްއާއި އަޅާބަލާއިރު ބޮޑު އަދަދެކެވެ. މި އަހަރުގެ ބަޖެޓްގެ ގޮތުގައި ރައްޔިތުންގެ މަޖިލީހުން ފާސްކޮށްފައިވަނީ 27 ބިލިއަން ރުފިޔާއެވެ.