ރާއްޖޭގެ ހުރިހާ ރަށެއްގައި އެ ރަށަކަށް ބޭނުންވާ ވަރުގެ ލެބޯޓަރީ އެއް ގާއިމް ކޮށްދޭނަން: ރައީސް މުޢިއްޒު

ރާއްޖޭގައި މީހުން ދިރިއުޅޭ ކޮންމެ ރަށެއްގައި، އެ ރަށެއްގެ ނިސްބަތުން ލެބޯޓަރީ އެއް ގާއިމް ކޮށްދެއްވާނެކަމަށް ވެ ވަޑައިގެންނެވި ވަޢުދު ފުއްދަވާނެ ކަމުގެ ޔަގީންކަން ރައީސުލްޖުމްހޫރިއްޔާ ޑޮކްޓަރ މުހައްމަދު މުޢިއްޒު ދެއްވައިފިއެވެ.

ތ. އަތޮޅަށް ކުރައްވަމުން އަންނަ ރަސްމީ ދަތުރުފުޅުގައި ކަނޑޫދޫއަށް ވަޑައިގެން އެ ރަށުގެ ރައްޔިތުންނާ ވާހަކަފުޅުދައްކަވަމުން އެ މަނިކުފާނު ވިދާޅުވީ ކަނޑޫދޫގެ ހޮސްޕިޓަލުގެ މަސައްކަތް ލަސްވެ އެކަމުގެ ކަންބޮޑުވުން ކައުންސިލުން ފާހަގަކުރައްވާފައިވާ ކަމަށާ، އެހެންކަމުން އެކަން ވޭހާވެސް އަވަހަށް ނިންމަވައި ދެއްވާނެ ކަމަށެވެ. އަދި ހޮސްޕިޓަލު ނިމޭއިރު ލެބޯޓަރީގެ ޚިދުމަތް ވެސް ދެވިގެންދާނެ ކަމަށް ވިދާޅުވި އެވެ.

މިއާއެކު އެމަނިކުފާނު ވަނީ، ރާއްޖޭގެ ހުރިހާ ރަށެއްގައި ލެބޯޓަރީ އެއް ގާއިމް ކުރުމަށް އެމަނިކުފާނު ވެވަޑައިގެންނެވި ވަޢުދު ފުއްދަވައި ދެއްވާނެ ކަމުގެ ޔަގީންކަން ވެސް ދެއްވާފައެވެ.

ދަތުރަށްފަހު ގޮސް، ހޮސްޕިޓަލުގެ މަސައްކަތް އަވަސްކޮށް، ހޮސްޕިޓަލް ނިމިގެންދާނީ ލެބޯޓްރީއަކާއެކު. ލެބޯޓްރީ އަކީ އަޅުގަނޑުމެން ކުރަން ނިންމާފައި ހުރި ކަންކަމުގެ ތެރެއިން ދެން އެންމެ މުހިންމު ކަންތައް. ރާއްޖޭގެ ހުރިހާ ރަށެއްގައި އަޅުގަނޑު ވަޢުދުވިން. އެ ރަށެއްގެ އާބާދީއާއި އެއްވަރަށް، ނިސްބަތުން، އެރަށަކަށް ބޭނުންވާ ސައިޒުގެ ލެބޯޓަރީއެއް ކޮންމެ ރަށެއްގައި ގާއިމް ކޮށްދޭނަމޭ. އެހެންވީމާ މި ރަށުގައި ވެސް، ލެބޯޓަރީ ގެ ޓެސްޓިންގ އަށް ބޭނުންވާ ޚިދުމަތް އަދި ތަމްރީން ލިބިފައިވާ މުވައްޒަފުންނާއި އެކުގައި ގާއިމް ކޮށްދިނުމަކީ އަޅުގަނޑުމެން ކުރާނެ ކަމެއް. އެކަންވެސް އިރާދަކުރެއްވިޔާ ވެގެން ދާނެ.

ރައީސުލްޖުމްހޫރިއްޔާ ޑރ މުހައްމަދު މުޢިއްޒު

ރައީސް މުޢިއްޒު އިތުރަށް ވިދާޅުވީ، ކުރީގެ ސަރުކާރުތަކުން ރައްޔިތުންނަށް ހުވަފެން ދެއްކުމަށް މަސައްކަތްތަކެއް ފަށައިފައިިވާ ކަމަށެވެ. ނަމަވެސް އެ ފަދަ ގިނަ މަސައްކަތްތަކެއް ހުރީ ރަށްރަށުގައި ހުއްޓިފައި ކަމަށާ، އެކަން ނިންމަވައި އެ ހުވަފެންތައް ހަގީގަތަކަށް ހަދައި ދެއްވާނެ ކަމަށްވެސް ރައީސް ވިދާޅުވި އެވެ.

"އިންތިޚާބު އައިމާ އިންތިޚާބަށް ޓަކައި ދަަޅައެއް ދައްކައިލުމަށް ކަޑަޖަހާ އުސޫލުން މިކަހަލަ ކިތަންމެ ކަމެއް ކޮށްފައި އެބަހުރި. އަޅުގަނޑުމެން އިރާދަކުރެވިއްޔާ އެ ކަންކަން ހަގީގަތަކަށް، އެ މަޝްރޫއުތައް ހަގީގަތަކަށް ހަދައިދޭން މި ތިބީ އައިސް،" ރައީސް ވިދާޅުވިއެވެ.

ކަނޑޫދޫގައި ވެސް އެ ފަދަ ކަންކަން ފާހަގަކުރައްވައި އެ ރަށުގައި  ހުއްޓިފައިހުރި މަޝްރޫއެއް ކަމަށްވާ ފެނާއި ނަރުދަމާގެ މަސައްކަތް ޚާއްސަ އިސްކަމެއްދީގެން ނިންމަވައިދެއްވާނެ ކަމަށް ރައީީސް ވިދާޅުވިއެވެ.