މަޖިލިސް އިންތިހާބުގައި ވޯޓުލުމަށް ރީރަޖިސްޓްރީ ވާން ހުޅުވާލި ފުރުސަތު މާދަމާ ހަމަވާނެ
މިއަހަރުގެ މާޗު މަހުގެ 17 ވަނަ ދުވަހު ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ އިންތިހާބުގައި ވޯޓުލުމަށް ރީރަޖިސްޓްރީ ވާން ހުޅުވާލި ފުރުސަތު މާދަމާ ހަމަވާނެ ކަމަށް އިލެކްޝަން ކޮމިޝަން (އީސީ) އިން ބުނެފިއެވެ.
އިލެކްޝަން ކޮމިޝަންގެ ނައިބު ރައީސް އިސްމާއިލް ހަބީބް ވަނީ ސުން ގަޑި ހަމަވުމުގެ ކުރިން އަވަހަށް ރީރަޖިސްޓްރީ ކޮށް، ރީރަޖިސްޓްރީ ވުމުގެ ކުރިން މިހާރު ރީރަޖިސްޓްރީވެފައިވާ ތަން ޗެކްކުރުމަށް އެދިލައްވާފައެވެ.
ރައްޔިތުންގެ މަޖިލީހުގެ އިންތިޚާބުގެ ވޯޓުލާ ދުވަހު އެ މީހަކު ވޯޓުލުމަށްޓަކައި ރަށްވެހިވެފައިވާ ރަށްނޫން ތަނެއްގައި ވޯޓުލުމަށް ރީރަޖިސްޓަރީ ކުރުމަށް އީސީން ހުޅުވާލި ފުރުސަތު ހަމަވާނީ 2024 ފެބުރުއަރީ 7 ވަނަދުވަހުގެ ހަވީރު 4 ގައެވެ.
މަޖިލިސް އިންތިހާބުގައި ރީރަޖިސްޓްރީ ވުމަށް އެ އިދާރާއިން ހުޅުވާލީ މިމަހުގެ 1 ވަނަ ދުވަހުއެވެ.
އޮންލައިން ކޮށް ރީރަޖިސްޓްރީ ފުރާ ފޯމު އީސީ ގެ ވެބައިޓުން ލިބެން ހުންނާނެއެވެ. ފޯމު ފުރަނީ، އޮންލައިންކޮށް ނޫންނަމަ އެ ރަށެއްގެ ކައުންސިލް އިދާރާއިން ފޯމު ލިބޭނެއެވެ.
އީސީ އިން ވަނީ މަޖިލިސް އިންތިހާބުގައި ބަހައްޓާ ވޯޓުފޮށީގެ ނަންބަރާއި، ވޯޓުފޮށީގެ ކޯޑާއި، ވޯޓުލާ ސަރަހައްދާއި، ވޯޓުފޮށި ބަހައްޓާ ރަށާއި ތަނުގެ މައުލޫމާތު މިހާރު އާންމުކޮށްފައެވެ. ވޯޓް ލާން ޖެހެނީ ކޮން ފޮއްޓަކަށްތޯ ޔަގީން ކުރުމަށް އިލެކްޝަންސް ކޮމިޝަންގެ ހޮޓްލައިން 1414 ން އަށް ގުޅުމުންވެސް ނުވަތަ މެސެޖް ކޮށްލުމުންވެސް މައުލޫމާތު ސާފުވެގެން ދާނެ ކަމަށް އީސީ އިން ބުނެއެވެ.
މަޖިލީހުގެ އިންތިހާބުގައި 93 ދާއިރާ އަކަށް ވާދަކުރުމުގެ ފުރުސަތު ވެސް އީސީން މިހާރު ވަނީ ހުޅުވާލައިފައެވެ. މި ފުރުސަތު ހުޅުވާލާފައި ވަނީ މި މަހުގެ 14 ވަނަ ދުވަހުގެ މެންދުރު 2:00 އާ ހަމައަށެވެ. މަޖިލީހުގެ އިންތިހާބަށް ކުރިމަތިލުމަށް އެދޭ މީހުން، ރައްޔިތުންގެ މަޖިލީހުގެ އިންތިހާބަށް ކުރިމަތިލުމަށް އެދޭ ފޯމާއި ތަކެތި ހުށަހަޅަން ޖެހޭނީ އިންތިހާބާ ބެހޭ މަރުކަޒު ނުވަތަ ދަރުބާރުގެ އަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
