ގިނަ ރިސޯޓްތަކުން ޑޮލަރުމާރުކުރުމުގެ ޤަވާއިދަށް ތަބާވޭ: ރައީސް ޑރ.މުއިއްޒު

ގިނަ ރިސޯޓްތަކުން ޑޮލަރު މާރުކުރުމުގެ ޤަވާއިދަށް އަމަލުކުރަމުން އަންނަކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ހއ.އަތޮޅަށް ކުރައްވަމުން ގެންދަވާ ދަތުރުފުޅުގައި ހޯރަފުއްޓަށް ވަޑައިގެން އެރަށުގެ ރައްޔިތުންނާ ވާހަކަދައްކަވަމުން ރައީސް ޑރ.މުއިއްޒު ވިދާޅުވީ، ޑޮލަރު މާރުކުރުމުގެ ޤަވާއިދަށް މިހިނގާ ޖެނުއަރީމަހުން ފެށިގެން އަމަލުކުރަން ފެށިފަހުން ވަރަށް މަދު ރިސޯޓަކުން ފިޔަވައި ގިނަ ރިސޯޓްތަކަކުން ޤަވާއިދާ އެއްގޮތަށް އަމަލުކުރަމުން އަންނަކަމަށެވެ. ރައީސް ވިދާޅުވީ، މިހާތަނަށް 25 މިލިއަނަށްވުރެ ގިނަ ޑޮލަރު ބޭންކުތަކަށް މާރުކޮށްފައިވާކަމަށާއި، އެއީ އަދި އެއް މަހު ލިބެންޖެހޭ އަދަދުގެ ތެރެއިން ބައެއް ކަމަށެވެ.

ރައީސް ވިދާޅުވީ ޑޮލަރު މާރުކުރުމުގެ ކަންކަން އެ އޮންނަ އުސޫލާ އެއްގޮތަށް ކުރިއަށްދާނަމަ، ރާއްޖޭގެ އިޤްތިސާދަށް އެކަމުން ވަރަށްބޮޑެތި ފަސޭހަތަކެއް ލިބިގެންދާނާ ކަމަށެވެ. އެގޮތުން ވިޔަފާރިވެރިންނަށާއި، އާއްމު ރައްޔިތުންގެ އިތުރުން ބޭރުގައި ދިރިއުޅެމުންދާ ދިވެހިންނަށާއި ކިޔަވާކުދިންނަށް ވަރަށްބޮޑު ފަސޭހައެއް ލިބިގެންދާނޭކަމަށެވެ. ރައީސް ވިދާޅުވީ ޑޮލަރުމާރުކުރުމުގެ ކަންކަން ރަނގަޅަށްދާނަމަ، ކުރިއަށްއޮތް 6 މަސްދުވަހުން ފެށިގެން ހެޔޮ ބަދަލުތައް އަންނަމުންދާނޭ ކަމަށެވެ.

އަޅުގަނޑުމެން ޤާނޫނު ފުރިހަމައަށް ތަންފީޒުކުރާނަން. އެ ޤާނޫނުގެ ދަށުން ޑޮލަރުމާރުކުރަންޖެހޭ ހަމައެއްވެސް ވިޔަފާރިއެއް އެކަމުން އިސްތިސްނާވިޔަކަ ނުދޭނަން. އެ ޤާނޫނުގެ ދަސުން ޑޮލަރު މާރުކުރަންޖެހޭ ހަމަ ކޮންމެ ފަރާތެއްވެސް ޖެހޭނީ އެކަންކުރަން

ރައީސް ޑރ.މުއިއްޒު ވިދާޅުވިއެވެ

އެމްއެމްއޭއިން ބޭރުފައިސާ މާރުކުރުމުގެ ޤަވާއިދަށް ގެނައި އިސްލާހާއެކު މިދިޔަ އަހަރުގެ އޮކްޓޯބަރުމަހު ޓޫރިސްޓް ވިޔަފާރިތަކުން ފަތުރުވެރިން އައި އަދަދަށް ބަލައިގެން ބޭންކަށް ޑޮލަރު މާރުކުރުމުގެ އެންމެ ފަހު ތާރީހެއްގެ ގޮތުގައި ކަނޑައެޅިފައިވަނީ އިއްޔެގެ ނިޔަލަށެވެ.

ބޭރުފައިސާ މާރުކުރާބެހޭ އައު ޤަވާއިދު މިދިޔަ އަހަރުގެ ޑިސެމްބަރުމަހުގެ 14 ވަނަ ދުވަހު ރައީސުލްޖުމްހޫރިއްޔާ ތަސްދީގުކޮށްފައިވާއިރު، އެ ޤަވާއިދަށް އަމަލުކުރަން ފަށާފައިވަނީ، މިހިނގާ ޖެނުއަރީމަހުގެ އެއްވަނަ ދުވަހުން ފެށިގެންނެވެ. ޤަވާއިދުގައިވާގޮތުން ބޭރުފައިސާގެ އާމްދަނީ ބޭންކަށް ޖަމާކޮށް މާރުކުރުން ލާޒިމްވަނީ، އަހަރެއްގެ މައްޗަށް މަދުވެގެން 15 މިލިއަން ޑޮލަރު އާމްދަނީގެ ގޮތުގައި ލިބޭ ޓޫރިޒަމް ވިޔަފާރިކުންފުނިތަކެވެ.

މި ޤަވާއިދުގައި އޮންނަ ގޮތުން ރިސޯޓްތަކުން، އެ ތަނަށް މަހެއްގެ މައްޗަށް އަންނަ ކޮންމެ ޓޫރިސްޓެއްގެ ބޮލަކަށް 500 ޑޮލަރު، ނުވަތަ އާމްދަނީގެ 20 އިންސައްތަ ޑޮލަރު މާކުރަން ޖެހެއެވެ. ގެސްޓްހައުސްތަކުން މާރުކުރަންޖެހެނީ ބޮލަކަށް 25 ޑޮލަރު، ނުވަތަ އެފަރާތަކަށް މަހެއްގެ މައްޗަށް ލިބޭ އާމްދަނީގެ 20 އިންސައްތަ ޑޮލަރެވެ.