"ރަޝްފޯޑަށް ހެރީ ކޭންއައި އެއް ފެންވަރަކަށް ދެވިދާނެ"
މެންޗެސްޓާ ޔުނައިޓެޑުގެ ޒުވާން ފޯވަޑް މާކަސް ރަޝްފޯޑަށް ޓޮޓެންހަމްގެ ތަރި ހެރީ ކޭންއައި އެއް ފެންވަރަކަށް ދެވިދާނެ ކަމަށް ޔުނައިޓެޑުގެ ކެއާ ޓޭކާ މެނޭޖަރ ޝޯލްޝާ ބުނެފިއެވެ.
އިނގިރޭސި ޕްރިމިއާ ލީގުގައި ޔުނައިޓެޑް އަދި ޓޮޓެންހަމް ކުޅުމަށް ހަމަޖެހިފައިވާ މެޗުގެ ކުރިން ވާހަކަ ދައްކަމުން ޝޯލްޝާ ބުނީ ހެރީ ކޭންއަކީ ދުނިޔޭގެ ފެންވަރުގެ ކުޅުންތެރިޔެއް ކަމަށައި އެ ހިސާބަށް ވާސިލްވުމަށް ރަޝްފޯޑުގެ ޕޮޓެންޝިއަލް ހުރި ކަމުގައެވެ.
ޔުނައިޓެޑް އަދި ޓޮޓެންހަމް ލީގުގައި މިރޭ ބައްދަލުކުރާ މެޗުގައި ފޯމުގައި ތިބި ރަޝްފޯޑް އަދި ހެރީ ކޭން އެ ކުޅުންތެރިންގެ ޓީމުގެ ފުރަތަމަ އެގާރައިން ފެނުން ވަރަށް ގާތެވެ. ވެމްބްލީގައި ކުޅުމަށް ހަމަޖެހިފައިވާ މި މެޗް ފަށާނީ ރާއްޖެ ގަޑިން 21:30 ގައެވެ.
އިދިކޮޅު ޑިފެންޑަރުން ބިރު ގަންނަވަރުގެ ބާރު ދުވެލި ރަޝްފޯޑްގެ ހުންނަ ކަމަށައި ފާއިތުވެ ދިޔަ ދުވަސްތަކުގައި އޭނާވަނީ ހަށިގަނޑު ވަރުގަދަކޮށް އިދިކޮޅު ހާފްތެރޭ ގިނަވަގުތު ބޯޅަ ގެންގުޅެން ދަސްކޮށްފަކަމަށްވެސް ނޯވޭއަށް ނިސްބަތްވާ ޝޯލްޝާ ބުނެފައިވެއެވެ.
އުމުރުން 21 އަހަރުގެ ޝޯލްޝާވަނީ މި ސީޒަނުގައި ޔުނައިޓެޑަށް 7 ލަނޑު ކާމިޔާބުކޮށްދީފައެވެ. ރަޝްފޯޑަށްވުރެ ގިނައިން ޔުނައިޓެޑަށް މި ސީޒަނުގައި ލަނޑުތައް ކާމިޔާބުކޮށްދީފައިވަނީ ހަމައެކަނި މާޝިއަލް، ލުކާކޫ، އަދި ޕޮގްބާއެވެ.
ޝޯލްޝާ ޔުނައިޓެޑައި ހަވާލުވުމަށްފަހު އޭނާ ރަޝްފޯޑްގެ ބޭނުން ބޮޑަށް ހިފަމުން އަންނަނީ ސެންޓްރަލް ސްޓްރައިކަރެއްގެ ގޮތުގައެވެ. ޝޯލްޝާގެ އިރުޝާދުގެ ދަށުން ރަޝްފޯޑް މިހާތަނަށް ފަސް މެޗުގައި ތިން ލަނޑު ޖަހާފައިވާއިރު މޮރީނިއޯގެ ބެލުމުގެ ދަށުން ރަޝްފޯޑަށް 22 މެޗުން ކާމިޔާބު ކުރެވުނީ އެންމެ ހަތަރު ލަނޑެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
