މިދިޔަ ސަރުކާރުން އިންޑިޔާއިން ނެގި 50 މިލިއަން ޑޮލަރުގެ ލޯނު ދައްކައިފި
ލިޔުންތެރިޔާ
ޚަދީޖާ އަރުފާ
ނިމިދިޔަ ސަރުކާރުން ނަގާފައިވާ 50 މިލިއަން ޑޮލަރުގެ ލޯނެއް މިއަދު ދައްކައި ޚަލާސްކުރައްވާފައިވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
މިއަދު ނޫސްވެރިންނާ ބައްދަލުކުރައްވައި ވާހަކަދައްކަވަމުން ރައީސް ވިދާޅުވީ މި ސަރުކާރުން އަންނަނީ މީގެ ކުރީ ސަރުކާރުތަކުން ނަގާފައިވާ ދަރަނިތައް ދައްކަމުން ކަމަށާ އެގޮތުން މީގެ ކުރިން 524 މިލިއަން ޑޮލަރުގެ ސުކޫކާއި 400 މިލިއަން ޑޮލަރުގެ ސްވަޕްވެސް ދައްކަވާފައިވާ ކަމަށެވެ
އަދި މިއަދަށް ޑިޔުވެފައިއޮތް 50 މިލިއަން ޑޮލަރުގެ ލޯނުވެސް މިއަދު ޕޭ ކޮށްފިން. 11 މެއިގައި ޕޭ ކުރާ ގޮތަށް މިދިޔަ ސަރުކާރުން ނަގާފައި އޮތް 50 މިލިއަން ޑޮލަރު. އެވެސް މިއަދު ހެނދުނު ސެޓްލް ކޮށްފިން. ވޭތުވެދިޔަ 40 ދުވަސް ތެރޭގައި 974 މިލިއަން ޑޮލަރު، ދިވެހި ރައްޔިތުންގެ ބޮލުގައި އަޅުވާފައިވާ ދަރަނި އަޅުގަނޑުމެން ދައްކައި ޚަލާސްކޮށްފިން. މިއީ މިދިޔަ ސަރުކާރުން ރައްޔިތުންގެ ބޮލުގައި އެޅުވި ދަރަނި ދަންތުރަ. އެއިން މިދަނީ ރައްޔިތުން ސަލާމަތް ކުރަމުން.
ރައީސް މުޢިއްޒު
ރައީސް އިތުރަށް ވިދާޅުވީ މިދިޔަ ސަރުކާރުން ތިން ފަހަރެެއްގެ މަތީން އިންޑިޔާއިން 50 މިލިއަން ޑޮލަރުގެ ލޯނު ނަގާފައިވާ ކަމަށެވެ. އެއީ
1) 17 މާރިޗު 2019
2) 26 ޖޫން 2019
3) 1 އޮކްޓޯބަރު 2019
2019 ގައި ނެގި އެ 150 މިލިއަން ޑޮލަރުގެ ދަރަނި، އެ ސަރުކާރުން އައީ ރޯލް ކުރަމުން ކަމަށާ، އޭގެ ތެރެއިން އެއް 50 މިލިއަން ޑޮލަރުގެ ދަރަނި މި ސަރުކާރުން ދެއްކީ 2024 ވަނަ އަހަރުގެ ކުރީ ކޮޅުގައި ކަމަށް ރައީސް ވިދާޅުވިއެވެ. އަދި ބާކީ 100 މިލިން ރޯލް ކުރަމުން އައިސް މިއަދު އޭގެ ތެރެއިން 50 މިލިއަން ދެއްކެވީ ކަމަށްވެސް ވިދާޅުވިއެވެ.
ރައީސް ވިދާޅުވިގޮތުން ދެން ބަކީއޮތް 50 މިލިއަން ޑޮލަރުގެ ލޯނު ދައްކަންޖެހެނީ 17 ސެޕްޓެމްބަރުގައެވެ. އަދި، އެދުވަހު އެ ދަރަނިވެސް ދައްކަވާނެ ކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
