ގާނޫނާ ހިލާފަށް ބިދޭސީން ގެންނަ މީހެއް; ދިވެހީންގެ ނެޓްވޯކެއް، އެކައުންޓްގައި 8 މިލިއަން

ގާނޫނާއި ގަވާއިދާ ހިލާފަށް ރާއްޖެއަށް ބިދޭސީން ރާއްޖެ ގެނެސް ޖިނާއީ ކުށްކޮށްގެން ފައިސާ ހޯދަމުންދާ ކަމަށް ތުހުމަތު ކުރެވޭ މައްސަލައަކާ ގުޅިގެން ބިދޭސީއަކު ހައްޔަރުކޮށް އެ މައްސަލައާ ގުޅުންހުރި ދިވެހީންގެ މައްސަލަތަކެއް ފުލުހުން ތަހުގީގު ކުރަން ފަށައިފި އެވެ.

ފުލުހުން ބުނީ މި މައްސަލައާ ގުޅިގެން ޝަހާދަތު ހަސަން ނަމަކަށް ކިޔާ ބަންގާޅު މީހަކު ހައްޔަރު ކޮށް އޭނާގެ މައްސަލަ ތަހުގީގުކޮށް ދައުވާ ކުރަން ފޮނުވާފައިވާ ކަމަށެވެ. އޭނާގެ މައްޗަށް ކުރަނީ ގާނޫނާއި ގަވާއިދާ ހިލާފަށް ރާއްޖެއަށް ބިދޭސީން ރާއްޖެ ގެނެސް ޖިނާއީ ކުށްކޮށްގެން ފައިސާ ހޯދާ މަނީލޯންޑަރިންގެ އަމަލުތައް ހިންގުމެވެެ.

މި މައްސަލާގައި ގިނަ ބަޔަކާ ސުވާލުކޮށް ބަޔާން ވަނީ ނަގާފަ އެވެ. އަދި ބިދޭސީ މީހާގެ މޯބައިލްފޯނާއި އިލެކްޓްރިކް ޑިވައިސްތައް ހިފަހައްޓާ ހެއްކާއި ގަރީނާ ވަނީ ހޯދާފަ އެވެ. އަދި އެހެނިހެން ގޮތްގޮތުންވެސް މައްސަލައާ ގުޅޭ ގިނަ ހެކިތަކެއް ލިބިފައިވާ ކަމަށާ މައްސަލައިގެ ތަހުގީގު ނިންމާ ދައުވާ ކުރަން ފޮނުވާަފައިވާ ކަމަށް ފުލުހުން ވަނީ ބުނެފަ އެވެ.

ރާއްޖެ އަންނަނީ އޮފީސް ބޯއީއަކަށް, އުޅެނީ ލަގްޒަރީ ދިރިއުޅުމެއް

ފުލުހުން މިއަދު ބުނީ ޝަހާދަތު ހަސަން ހަތަރު ވޯކް ޕާމިޓެއްގައި ރާއްޖޭގައި އުޅެފައިވާ ކަމަށެވެ. އޭނާ ފުރަތަމަ ރާއްޖެ އައީ 2014 ވަނަ އަހަރު އެވެ. އަދި 2019 ވަނަ އަހަރު މާލެ އައިސް ބެންކު އޮފް މޯލްޑިވްސްގައި ހަތަރު އެކައުންޓެއް އޭނާ ހުޅުވާފައިވާ ކަމަށެވެ.

އަދި ބުނީ 2019 ވަނަ އަހަރުގެ އޮކްޓޫބަރު މަހުން ފެށިގެން އޭނާގެ އެކައުންޓްތަކަށް 8 މިލިއަނަށް ވުރެ ގިނަ ރުފިޔާ ޖަމާވެ ދައުރުކޮށްފައިވާ ކަމަށެވެ.

ޝަހާދަތު އެންމެ ފަހުން ރާއްޖެ އެތެރެވީ އޮފީސް ބޯއީއެއްގެ ވަޒީފާއަށް ނަމަވެސް އޭނާއަށް 3,000 ޑޮލަރުގެ ބޮޑު މުސާރަ ލިބޭ ކަމަށް ފުލުހުންގެ ތަހުގީގަށް ވަނީ ހޯދިފަ އެވެ. އަދި އޭނާ އުޅެމުން ގެންދިޔައީ 18,000 ރުފިޔާއަށް ދެ ކޮޓަރީގެ އެޕާޓްމަންޓެއް ގައި ކަމަށް ވެސް ބުންޏެވެ.

ފުލުހުން ބުނީ ޝަހާދަތުގެ ލެޕްޓޮޕުން މައްސަލައާ ގުޅޭ ވަރަށް ގިނަ ލިޔުންތަކާއި އެކި ކުންފުނިތަކުގެ ސްޓޭޕާއި ދިވެހީންގެ އައިޑީކާޑު ކޮޕީތައް ފެނިފައިވާ ކަމަށެވެ.

"މިތަކެތި ފެނިފައިވުމުން ތަހުގީގަށް ހާމަވާ ކަމަކީ ޝަހާދަތު ޙުސައިން އަކީ ވަރަށް ފުޅާ ދާއިރާއެއްގައި ބިދޭސީން ރާއްޖެ އެތެރެކޮށް އޭގެން މާލީ މަންފާ ހޯދާ ފަރާތެއްްކަން," ފުލުހުން މިއަދު ބުންޏެވެ.

އިމިގްރޭޝަން މުވައްޒިފުންނާއި ދިވެހީންގެ ބައިވެރިވުން

މި މައްސަލައިގެ ތަހުގީގަށް މިހާތަނަށް ހޯދާފައިވާ މައުލޫމާތުން މިއީ ވަރަށް ފުޅާ ދާއިރާއެއްގައި ބިދޭސީން އެތެރެކޮށް މާލީ މަންފާ ހޯދަމުންދާ ނެޓްވޯކެއް ކަން އެނގިފައިވާ ކަމަށް ފުލުހުން ބުނެފައިވެ އެވެ.

މި ނެޓްވޯކުން އެކި ކުންފުނިތަކުގެ ކޯޓާ ނަގާ ބިދޭސީން އެތެރެކޮށް އެ މީހުން މާލެތެރެއަށް ދޫކޮށްލާފައިވެ އެވެ. އަދި ސައްހަ ނޫން ވޯކްޕާމިޓް ހަދާ ބަންގްލަދޭޝްގައި ތިބޭ މީހުންނަށް ފޮނުވާ ޝަހާދަތު ބުނާ އެކައުންޓަކަށް ފައިސާ ޖަމާކުރަން އަންގާ ކަމަށް ބުނެފައިވެ އެވެ.

މި ކަމުގައި ދިވެހީންގެ ގިނަ ބަޔަކާއި އިމިގްރޭޝަންގެ ބައެއް މުވައްޒިފުންގެ ބައިވެރިވުން އޮތް ކަަމަށް ވެސް ފުލުހުން ވަނީ ބުނެފަ އެވެ.

"ޝަހާދަތު ހުސައިން މި މަަސައްކަތް ކުރަމުން މިގެންދަނީ ދިވެހީންގެ ގިނަ ބަޔަކާއި މީގެ އިތުރުން މޯލްޑިވްސް އިމިގްރޭޝަންގައި މަސައްކަތް ކުރާ ބަޔަކާއި ގުޅިގެން ކަން ޝަހާދަތު ހުސައިންގެ ފޯނުން ފެނިފައިވާ ޗެޓް ލޮގްތަކާއި ޑޮކިއުމަންޓްތަކުން އެނގޭ,"

މި މައްސަލާގައި ބައިވެރިވާ ދިވެހީންގެ މައްސަލަ ވަކި މައްސަލައެއްގެ ގޮތުގައި ތަހުގީގު ކުރަމުންދާ ކަމަށް ވެސް ބުންޏެވެ.