ޑްރަގް މައްސަލަ ހައްލުކުރެވޭނެ، މި ސަރުކާރުން މި މައްސަލަ ހައްލުކުރަން ބޭނުން: މިނިސްޓަރ އިހްސާން

ޑްރަގުގެ މައްސަލަ ހައްލުކޮށް، އޭގެ ވިޔަފާރިކުރަން ހިތަށް އަރާ މީހާ، އެކަން ކުރުމުގެ ކުރިން ވިސްނާލާފައި ބިރުގަންނަން ޖެހޭވަރު ކުރައްވާނެ ކަމަށް ދާޚިލީ ސަލާމަތާއި ބެހޭ ވަޒީރު ޢަލީ އިހްސާން ވިދާޅުވެއްޖެއެވެ.

ފުލުހުންގެ ސްޓްރެޓެޖިކް އެކްޝަން ޕްލޭން އުފްތިތާހް ކުރުމަށް މިއަދު ބޭއްވި ރަސްމިއްޔާތުގައި ވާހަކަ ދައްކަވަމުން އިހްސާން ވިދާޅުވީ، އެ ޕްލޭންގައި ކްރައިމް ފޯލަސްޑް ޕޮލިސީގައި އިސްކަމެއްދޭ 10 ކަމެއް ހިމަނުއްވާފައިވާނެ ކަމަށެވެ. އޭގެ ތެރެއިން އެންމެ މުހިންމު ކަމަކީ ގޭންގުތައްް ހަދައިގެން ރާއްޖޭގެ އަމާންކަން ނަގާލާފައި އޮތް އޮތުން ނިމުމަކަށް ގެނައުންކަން އިހްސާން ފާހަގަކުރެއްވިއެވެ.

އަޅުގަނޑުމެންގެ އަމާޒެއްނޫން މިއަދު އޮތީ 10 ގޭންގު ކަމަށް ވަންޏާ އޭތި 3 އަށް ބަދަލު ކުރުން. އަޅުގަނޑުމެންގެ އަމާޒަކީ 10 ގޭންގުވެސް އެއްކޮށް ދިޔުން މިތަނުން. އަޅުގަނޑުމެންގެ ޓަގެޓަކީ މިކަހަލަ ކްރައިމްގައި ޒީރޯ ޓޯލަރެންސް. ނަން އެކްސެޕްޓެންސް.

ޢަލީ އިހްސާން

މިއާއެކު އިހްސާން ވިދާޅުވީ ޑްރަގުގެ މައްސަލައަކީ ހައްލު ނުކިރެވޭނެ ކަމެއް ކަމަށް ގިނަ ފަރާތްތަކަށް ހީވާ ކަމަށެވެ. އަދި އެހެން ހީވުމުގެ ސަބަބުންވެސް އެ މައްސަލަ ހައްލު ކުރުމަށް މަސައްކަތް ނުކުރެވޭ ކަމަށާ، އެހެން ނަމަވެސް އެއީ ވާނެ ކަމެއް ކަމަށް ގަބޫލު ކޮށްގެން މަސައްކަތް ކުރަންޖެހޭ ކަމަށެވެ.

އިހްސާން ވިދާޅުވިގޮރުގައި މީގެ ކުރީ ސަރުކާރުތަކަށް އެ މައްސަލަ ހައްލު ނުވީ “ޕޮލޮޓިކަލް ވިލް” ނެތުމުން ކަމަށާ، އެހެން ނަމަވެސް، މިސަރުކާރުގެ “ޕޮލިޓިކަލް ވިލް” އޮތް ކަމަށެވެ.

އިހްސާން އިތުރަށް ވިދާޅުވީ، މަސްތުވާތަކެތީގެ ވިޔަފާރިއަކީ ޓްރޭޑް ކުރުމުގެ ވިޔަފާރި ފަދައިން ހުއްދަ ކަމެއްގެ ގޮތުގައި ރާއްޖޭގައި ކުރަމުންދާ ކަމެއް ކަމަށެވެ. އެގޮތުން “ކަންމަތީ ފިހާރަ ހިންގާ އުސޫލުން” ޑްރަގް ވިޔަފާރި ހިންގަމުންދާކަން ވަޒީރު ފާހަގަކުރެއްވިއެވެ.

މިކަން ހުއްޓެންޖެހޭނެ ރާއްޖޭގައި. ޑްރަގް ވިޔަފާރިއަށް ވަންނަން ހިތަށް އަރާ މީހާ ތިން ހަތަރުފަހަރު ވިސްނާލާފައި އޭނާ ބިރުގަންނަންޖެހޭނެ ތިމަންނައަކަށް ރާއްޖޭގައި މިކަން ކުރުމަށް ފުރުސަތެއް ނޯންނާނެކަން. އެރިސްކަކީ ވެލިޑް ރިސްކަކަށް ހަދަންޖެހޭނެ ފުލުހުން.

ޢަލީ އިހްސާން

މިއާއެކު އިހްސާން ވިދާޅުވީ، މަސްތުވާތަކެތި ވިއްކާ މީހާއަށް ނުވަތަ އެ ބޭނުން ކުރާ މީހާއަށް މިއަދު މިބރާއްޖޭގައި އެއްވެސް ބިރުވެރިކަމެއް ނެތް ކަމަށެވެ. އެހެން ނަމަވެސް އެ މާހައުލު ނައްތާލަންޖެހޭ ކަމަށާ. ރާއްޖޭގައި ޑްރަގުގެ މާހައުލަކީ އޮވެގެންވާނެ މާހައުލެއް ނޫންކަމަށް ވަޒީރު ވިދާޅުވިއެވެ. އަދި އެއީ މި ސަރުކާރުން “ޓްލަރޭޓް” ކުރާ ކަމެއް ނޫން ކަމަށާ، ސަރުކާރުގެ ފަސް އަހަރު ނިމޭއިރު އެ މައްސަލަ ހައްލު ކުރުމަކީ އަމާޒު ކަމަށްވެސް އިހްސާން ވިދާޅުވުއެވެ.