އެމްޑީޕީގެ މައްޗަށް އަދިވެސް އަޅުގަނޑު އިސްކުރާނީ ރައީސް މުޢިއްޒު: ރައީސް ޔާމީން
ލިޔުންތެރިޔާ
ޚަދީޖާ އަރުފާ
އިދިކޮޅު އެމްޑީޕީއާ ރައީސް ޑރ. މުޙައްމަދު މުޢިއްޒުއާ ދެ ފަރާތުން ފަރާތެއް އިޚްތިޔާރު ކުރަން ޖެހިއްްޖެ ޙާލަތުގައި އަދިވެސް އިހުތިޔާރުކުރައްވީ ރައީސް މުޢިއްޒު ކަމަށް ކުރީގެ ރައީސް ޢަބްދުالله ޔާމީން ޢަބްދުލްޤައްޔޫމް ރޭ ވިދާޅުވެއްޖެއެވެ.
ޕީޕަލްސް ނެޝަނަލް ފްރަންޓް (ޕީއެންއެފް) އިން ސިލްސިލާކޮށް ބާއްވަމުން ގެންދާ ބައްދަލުވުންތަކުގެ ތެރެއިން ރޭ ރައީސް ޔާމީންގެ ގެކޮޅުގައި ބޭއްވި ޖަލްސާގައި ވާހަކަފުޅު ދައްކަވަމުން އެމަނިކުފާނު ވަނީ މިހާރުގެ ސަރުކާރަށް ބޮޑެތި ފާޑުކިޔުންތަކެއް އަމާޒުކުރައްވައިފައެވެ.
ނަމަވެސް، ކުރީގެ ރައީސް ޞާލިޙްގެ ވެރިކަމާ އެއް ތިލަފަތަކަށް ލައި ކިރާ ނަމަ، ކޮންމެ ހާލެއްގައި ވެސް ހޮއްވަވާނީ ރައީސް މުއިއްޒު ކަމަށް ޔާމީން ވިދާޅުވިއެވެ.
"އަޅުގަނޑު މިދަންނަވަނީ އަނެއްކާވެސް އަޅާކިޔުން އިނގޭތޯ. ދެން ދާން އޮތީ އަނެއްކާވެސް އިބްރާހިމް މުހައްމަދު ސޯލިހަށޭ. އަދިވެސް އެނީ ޓައިމް އޮފް ދަ ޑޭ އެނީ ޓައިމް އޮފް ދަ އިޔާ އަޅުގަނޑު ޗޫޒް ކުރާނީ މުއިއްޒު އިނގޭތޯ އެމްޑީޕީގެ މައްޗަށް އިނގޭތޯ. އެމްޑީޕީގެ މައްޗަށް އަޅުގަނޑު ޗޫޒް ކުރާނީ މުއިއްޒު އިނގޭތޯ،"
ރައީސް ޔަމީން
އެމަނިކުފާނު ސިފަކުރެއްވި ގޮތުގައި އެމްޑީޕީއަކީ ޑިމޮކްރަސީގެ އެންމެހައި އަސާސްތަކަށް ފާޅުގައި އަރައިގަންނަމުންދާ ޕާޓީއެކެވެ.
ދާދި ފަހުން "ސަންގު" ޓީވީއަށް ދެއްވި ޚާއްޞަ އިންޓަވިއުއެއްގައި ވެސް ރައީސް ޔާމީން ވަނީ އެމަނިކުފާނުގެ ރުޅިވެރިކަން އޮތީ ހަމައެކަނި ރައީސް ޞާލިޙާ މެދުގައި ކަމަށް ވިދާޅުވެފައެވެ. ސަބަބަކީ ރައީސް ޞާލިޙްގެ ވެރިކަމުގައި އެމަނިކުފާނަށް ބޮޑެތި އަނިޔާތަކެއް ދީ، ޖަލަށްލައި، ރިޔާސީ ރޭހުން ފުރުޞަތު ބަންދުކޮށްފައިވާތީ ކަމަށް އެމަނިކުފާނު ވިދާޅުވިއެވެ.
އެމަނިކުފާނު ވިދާޅުވީ ރައީސް މުއިއްޒަކީ އެމަނިކުފާނު އަރިހުގައި މަސައްކަތް ކުރެއްވި ބޭފުޅެއް ކަމަށާއި، އެހެންކަމުން މީގެ ކުރިން ވެރިކަން ކުރައްވާފައި ހުރި ރައީސަކަށް ރައީސް މުއިއްޒު އަނިޔާވެރިވާނެ ކަމަށް ޤަބޫލުފުޅު ނުކުރައްވާ ކަމަށެވެ.
"އަޅުގަނޑެއް ޤަބޫލެއް ނުކުރަން ރައީސް މުޢިއްޒަކީ އެގޮތަށް އަނިޔާވެރި ބޭފުޅަކަށް ވެދާނެ ކަމަށް. ރައީސް މުޢިއްޒަށް ސަރުކާރު ހިންގުމުގެ ކަންކަން ނުކުރެވި ހިނގައިދާނެ... އެކަމު މުޢިއްޒު ނުކުރައްވާނެ ކަމަށް އަޅުގަނޑަށް ހަމަ ޤަބޫލު ކުރެވޭތީ އެހެން މި ދެންނެވީ،" ޔާމީން ވިދާޅުވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
