އެމްޑީޕީން ރައްޔިތުންނަށް އެއްޗެއް ދޭކަށް ބޭނުމެއް ނުވޭ: ޖާބިރު
އެމްޑީޕީން މަސައްކަތް ކުރަނީ ރައްޔިތުންނަށް ލިބޭ އެއްޗެހި ހުއްޓުވަން ކަމަށް، ރައްޔިތުންގެ މަޖިލީހުގެ ކާށީދޫ ދާއިރާގެ މެމްބަރު އަބްދުﷲ ޖާބިރު ވިދާޅުވެއްޖެއެވެ.
19 ވަނަ ރައްޔިތުންގެ މަޖިލީހުގެ 21 ވަނަ ޖަލްސާގައި ވާހަކަ ދައްކަވަމުން، ޖާބިރު ވިދާޅުވީ މަޖިލީހުގެ މެޖޯރިޓީ ލިބުމުން، ރައްޔިތުންނަށް ކަންތައް ކޮށްދޭކަށް އެމްޑީޕީން ބޭނުން ނުވާ ކަމަށެވެ. އަދި އޭގެ ބަދަލުގައި މަސައްކަތް ކުރަނީ ރައްޔިތުންނަށް ލިބޭ އެއްޗެހި ހުއްޓުވަން ކަމަށް ޖާބިރު ތުހުމަތު ކުރެއްވިއެވެ.
ޖާބިރު ވިދާޅުވީ، ރައްޔިތުންގެ މަޖިލީހުގައި މެމްބަރުން މަސައްކަތް ކުރައްވަން ވާނީ އިހްލާސްތެރި ކަމާއިއެކީގައެވެ. ރައްޔިތުން ހާލުގައި އުޅޭއިރު، ސަރުކާރުގެ ޚަރަދުތައްވެސް ބޮޑުކަން ފާހަގަ ކުރައްވާ މެމްބަރު ޖާބިރު ވަނީ ކަންބޮޑުވުން ފާޅު ކުރައްވާފައެވެ. މިސާލެއްގެ ގޮތުން އޭނާ ވަނީ ރައީސުލްޖުމްހޫރިއްޔާ ގެންގުޅުއްވާ ސްޕީޑް ބޯޓުތަކުގެ އަދަދު ގިނަކަމަށް ވިދާޅުވެ، ސަރުކާރަށް ފާޑު ކިޔުއްވާފައެވެ.
"ކީއްވެގެންތޯ ކޮސްޓް އޮފް ޕްރޮޑަކްޝަން މިހާ ހައި ވެގެން މިއުޅެނީ؟ ކީއްވެގެންތޯ 13 ވަޒީރުން މި ގެންގުޅެން ޖެހެނީ؟" ޖާބިރު ވިދާޅުވިއެވެ.
ޖާބިރު ވިދާޅުވީ، ސަރުކާރުން އެއްވެސް ޕްރޮޖެކްޓެއް ހިންގާ މަންޒަރު ނުފެންނަ ކަމަށާއި، ހަމައެކަނި ފެނިގެންދަނީ މަޝްރޫއުތައް ހަވާލު ކުރާ މަންޒަރު ކަމަށެވެ. އަދި ޗައިނާ ފަދަ އިޤްތިސާދީ ގޮތުން ކުރިއަރާފައިވާ ގައުމަކާއި ރާއްޖެއާއި ދެމެދު އޮންނަ ގުޅުން ކަނޑާލާފައިވާތީ ޖާބިރު ވަނީ ކަންބޮޑުވުން ފާޅު ކުރައްވާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
