އިންޑިއާއިން އަރަބި ޤައުމުތަކާއެކު ބައްދަލުވުމެއް ބާއްވަނީ

މި މަހުގެ ފަހުކޮޅު އަރަބި ލީގުގެ ޚާރިޖީ ވަޒީރުންގެ ސަމިޓެއް އިންޑިއާގެ ވެރިރަށް ނިއުދިއްލީގައި ބޭއްވުމަށް އެގައުމުން މަސައްކަތްކުރަމުން އަންނަކަމަށް އިންޑިއާގެ މީޑީއާ ރިޕޯޓްތައް ބުނެފިއެވެ.

މި މަހުގެ 30 އާއި 31 ގައި ބޭއްވުމަށް ހަމަޖެހިފައިވާ މި ސަމިޓުގައި ގާތްގަނޑަކަށް 20 ގައުމެއްގެ ޚާރިޖީ ވަޒީރުން ބައިވެރިވެވަޑައިގަންނަވާނެ ކަމަށް ބެލެވެއެވެ. އޭގެ ތެރޭގައި ސައުދީ އަރަބިއްޔާ، މިސްރު، ޔޫއޭއީ، އަލްޖަޒާއިރު، އުރުދުން އަދި މޮރޮކޯ ފަދަ މުހިންމު ގައުމުތައް ހިމެނޭކަމަށް "ދަ ޕްރިންޓް" ނޫހުން ވަނީ ރިޕޯޓްކޮށްފައެވެ. އައު ސަރުކާރާއެކު ސޫރިޔާއިން ވެސް މި ސަމިޓުގައި ބައިވެރިވުމަކީ އެކަށީގެންވާ ކަމެކެވެ. މިއީ ބައްޝާރުލް އަސަދުގެ ވެރިކަން ވެއްޓުނު ފަހުން އިންޑިއާއާއި ސޫރިޔާގެ ވަޒީރުންގެ ފެންވަރުގައި ބޭއްވޭ ފުރަތަމަ ބައްދަލުވުމަށް ވެގެންދާނެއެވެ.

އިންޑިއާއިން އިސް ނަގައިގެން މި ބައްދަލުވުން ބާއްވަނީ އަރަބި ޤައުމުތަކާއެކު އޮންނަ ގުޅުން ބަދަހިކުރުމަށް އިންޑިއާގެ ބޮޑުވަޒީރު ނަރެންދްރަ މޯދީ ގެންގުޅުއްވާ ސިޔާސަތުގެ ދަށުންނެވެ. ބޮޑުވަޒީރު މޯދީ ވަނީ ފާއިތުވި އަހަރުތަކުގައި އަރަބި ގައުމުތަކަށް ގިނަ ދަތުރުފުޅުތަކެއްވެސް ކުރައްވާފައެވެ. އެންމެ ފަހުން ޑިސެމްބަރު 2025 ގައި އުރުދުންއާއި އޮމާނަށް ދަތުރުފުޅު ކުރެއްވިއިރު، ސައުދީ އަރަބިއްޔާ، ކުވެއިތު، ޔޫއޭއީ އަދި ގަތަރަށް ވެސް މޯދީ ވަނީ ޒިޔާރަތްކުރައްވާފައެވެ.

އިންޑިއާއިން ވަނީ ޔޫއޭއީ އަދި އޮމާނާއެކު މިނިވަން ވިޔަފާރީގެ އެއްބަސްވުންތަކުގައި ސޮއިކޮށްފައެވެ. އަދި ގަލްފުގެ ގައުމުތަކާއެކު ވެސް މިފަދަ އެއްބަސްވުމަކަށް ދަނީ މަޝްވަރާ ކުރަމުންނެވެ. އަރަބި ގައުމުތަކުގައި އިންޑިއާގެ ގާތްގަނޑަކަށް 9 މިލިއަން ރައްޔިތުން ދިރިއުޅެމުންދެއެވެ.

އިންޑިއާގައި އަރަބި ޤައުމުތަކާއެކު ސަމިޓު ބާއްވަނީ ޗައިނާއިން ވެސް އަރަބި ގައުމުތަކާއެކު ދެވަނަ ސަމިޓެއް ބޭއްވުމަށް ތައްޔާރުވަމުންދާ ދަނޑިވަޅެއްގައެވެ. ޗައިނާއިން ވެސް ދަނީ އެ ސަރަހައްދުގައި އިންވެސްޓްމަންޓްތައް އިތުރުކޮށް، އަސްކަރީ މަރުކަޒުތައް ގާއިމުކުރަމުންނެވެ.

މި މަހު ބާއްވާ ސަމިޓުގެ އެޖެންޑާގައި ހުޅަނގު އޭޝިއާގެ މަސްރަހާއި، އިގްތިސާދީ ގުޅުންތަކާއި، ހަކަތައިގެ ރައްކާތެރިކަމުގެ އިތުރުން އަރަބި ގައުމުތަކުގައި އުޅޭ އިންޑިއާ ރައްޔިތުންގެ ހާލަތާ ގުޅޭގޮތުން މަޝްވަރާކުރުމަށް ވަނީ ހަމަޖެހިފައެވެ.

ބާވީސް މެންބަރު ގައުމު ހިމެނޭ އަރަބި ލީގަކީ ހުޅަނގު އޭޝިއާއާއި އުތުރު އެފްރިކާ އަދި ގަލްފުގެ ގައުމުތައް ހިމެނޭ ސަރަހައްދީ ޖަމިއްޔާއެކެވެ. 1945 ވަނަ އަހަރު އުފެއްދި މި ޖަމިއްޔާގެ މައި މަރުކަޒު ހުންނަނީ މިސްރުގެ ވެރިރަށް ގާހިރާގައެވެ.