ނޫސްވެރިކަމުގެ އިނާމަށް 74 ފަރާތަކުން ނަން ހުށަހަޅައިފި
މީޑިއާ ކައުންސިލުން ކޮންމެ އަހަރަކު ދެމުން އަންނަ ނޫސްވެރިކަމުގެ އިނާމަށް މިއަހަރު 74 ފަރާތަކުން ކުރިމަތިލާފައިވާ ކަމަށް މީޑިއާ ކައުންސިލުން ބުނެފިއެވެ.
މީޑިއާ ކައުންސިލުން މިއަދު ބުނެފައިވަނީ އެކައުންސިލުންދޭ ނޫސްވެރިކަމުގެ އިނާމަށް ހުށަހަޅާފައިވާ 74 ފޯމްތަކުގެ ތެރޭގައި ހިމެނެނީ ނޫސްވެރިކަމުގެ އިނާމަށް 9 ދާއިރާއަށް 45 ހުށަހެޅުމާއި، އެކައުންސިލުން ދޭ ނޫސްވެރިކަމުގެ ޚާއްސަ އިނާމަށް 29 ހުށަހެޅުންކަމަށެވެ.
އެކިދާއިރާކުން ހުށަހެޅުން ލިބިޖފައިވާ ގޮތް ބަޔާން ކުރަމުން އެކައުންސިލުން ބުނެފައިވަނީ ޕްރިންޓް އަދި އޮންލައިން ކެޓަގަރީން33 ހުށަހެޅުމާއި، ބްރޯޑްކާސްޓިން ދާއިރާއިން 7 ހުށަހެޅުމުގެ އިތުރުން އެންމެ އުއްމީދީ ނޫސްވެރިޔާއަށް ފަސްފަރާތެއް ހުށަހަޅާފައިވާ ކަމަށެވެ.
މިއަހަރު ބާއްވާ ނޫސްވެރިކަމުގެ އެވޯޑު ދިނުމުގެ ޙަފްލާގައި ޖުމްލަ ނުވަ ދާއިރާއަކުން އެވޯޑު ދިނުމަށް ވަނީ ހަމަޖެހިފައެވެ. އެގޮތުން، އިޖްތިމާޢީ ދާއިރާ، ސިޔާސީ ދާއިރާ، ޝަރުޢީ އަދި ޤާނޫނީ ދާއިރާ، ވިޔަފާރިއާއި އިޤްތިޞާދުގެ ދާއިރާ، ކުޅިވަރުގެ ދާއިރާ، ޕޮޓޯ ގްރަޕީ ގެ ދާއިރާ، ވީޑިޔޯ ގްރަފީގެ ދާއިރާ އަދި ފީޗާ ދާއިރާ ހިމެނެއެވެ. މީގެ އިތުރުން އެންމެ އުންމީދީ ނޫސްވެރިޔާގެ އެވޯޑުވެސް މި ޙަފްލާގައި ދިނުމަށް ވަނީ ހަމަޖެހިފާކަމަށް އެކައުންސިލުން ބުނެފައިވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
