ދިރާގުގެ ސީއީއޯ އިސްމާޢީލް ރަޝީދު ރިޓަޔާކުރައްވަނީ؛ ބަދަލުގައި ވަލްޑެމާރ ފެރަޑާޒް

ގާތްގަނޑަކަށް 40 އަހަރު ދިރާގަށާއި ރާއްޖޭގެ ޓެލެކޮމިއުނިކޭޝަންސް ދާއިރާއަށް ޚިދުމަތް ކުރެއްވުމަށްފަހު ދިރާގުގެ ޗީފް އެގްޒެކެޓިވް އޮފިސަރ އަދި މެނޭޖިންގ ޑިރެކްޓަރ އިސްމާޢީލް ރަޝީދު ރިޓަޔާކުރެއްވުމަށް ނިންމެވުމާ ގުޅިގެން އެ މަގާމަށް އަންނަ ބަދަލުތައް ދިރާގުން އިއުލާންކޮށްފިއެވެ.

ދިރާގުން ހާމަކޮށްފައިވާ ގޮތުގައި ސައުތު އެފްރިކާގެ ރައްޔިތެއް ކަމަށްވާ ވަލްޑެމާރ ފެރަޑާޒް (ވާލްޑޭ) ވަނީ ޗީފް އެގްޒެކެޓިވް އޮފިސަރ ޑެޒިގްނޭޓްގެ ގޮތުގައި 1 ޖުލައި 2026 ގައި ދިރާގާ ގުޅިވަޑައިގެންފައެވެ. މި މަގާމަކީ ދިރާގުގެ މައި ހިއްސާދާރު ބިޔޯންއިން އައްޔަންކުރާ މަގާމެއް ކަމަށާއި އައު ސީއީއޯ ހޯދުމުގެ މަސައްކަތް ލީޑުކުރީ ބިޔޯންއިން ދިރާގުގެ ޑިރެކްޓަރުންގެ ބޯޑުގެ ރެމިއުނަރޭޝަން ނޮމިނޭޝަން އެންޑް ގަވަރނަންސް ކޮމިޓީގެ ބެލުމުގެ ދަށުން ކަމަށް އެ ކުންފުނިން ބުނެފައިވެއެވެ.

އިސްމާޢީލް ރަޝީދަކީ 1988 ވަނަ އަހަރު ދިރާގު އުފެދުނުއިރު އެ ޓީމުގައި ހިމެނިވަޑައިގެންނެވި ބޭފުޅެކެވެ. އެ ބޭފުޅާގެ ފާހަގަކޮށްލެވޭ ކާމިޔާބީތަކުގެ ތެރޭގައި ރާއްޖޭގައި މީހުން ދިރިއުޅޭ ހުރިހާ ރަށެއް ގުޅުވާލަދިން ނެޓްވޯކް ރޯލްއައުޓް ޕްރޮގްރާމް ކާމިޔާބުކަމާއެކު ހިންގެވުމާއި ޖީ.އެސް.އެމް މޯބައިލް ޚިދުމަތް ތައާރަފުކުރެއްވުމާއި 2006 ގައި ދިރާގު-އެސް.އެލް.ޓީ ސަބްމެރީން ކޭބަލް ސިސްޓަމް ގާއިމުކުރެއްވުމާއި 2011 ގެ އައި.ޕީ.އޯ ކާމިޔާބުކަމާއެކު މެނޭޖްކުރެއްވުން ހިމެނެއެވެ. 2015 ގައި ސީއީއޯގެ މަގާމަށް އައްޔަންވެވަޑައިގެންނެވި ފަހުން ރާއްޖޭގެ މީހުން ދިރިއުޅޭ ހުރިހާ ރަށަކަށް 100 އިންސައްތަ ފައިބަރ-ޓު-ދަ-ހޯމް ކަވަރެޖް ފޯރުކޮށްދީފައިވެއެވެ.

ވާލްޑޭ ދިރާގާ ގުޅިވަޑައިގަންނަވަނީ 30 އަހަރަށްވުރެ ގިނަ ދުވަހުގެ ބައިނަލްއަގުވާމީ ޓެލެކޮމިއުނިކޭޝަންސް ތަޖުރިބާއާއެކުގައެވެ. އެ ބޭފުޅާގެ ތަޖުރިބާ އެފްރިކާ ޔޫރަޕް އޭޝިއާ އަދި ކެރީބިއަންގެ ޓެލެކޮމް ދާއިރާތަކާ ގުޅިފައިވާއިރު ދެކުނު އެފްރިކާގެ ފުރަތަމަ މޯބައިލް ނެޓްވޯކް ތައާރަފުކުރުމުގައި މުހިންމު ދައުރެއް އަދާކުރައްވާފައިވެއެވެ. މީގެ އިތުރުން ޑިޖިސެލް ސެލް ސީ ވޮޑަފޯން ފަދަ ބޮޑެތި ކުންފުނިތަކުގެ ސީނިއަރ ލީޑަރޝިޕް މަގާމުތައް ފުރުއްވާފައިވެއެވެ.

ކުންފުނީގެ ބޯޑުން ހާމަކުރައްވާފައިވާ ގޮތުގައި މި އިންތިގާލީ މަރުހަލާގައި ވާލްޑޭ އިސްމާޢީލާ ގާތުން މަސައްކަތް ކުރައްވާނެއެވެ. ވިޔަފާރީގެ ހިންގުމަށް އެއްވެސް މެދުކެނޑުމެއް ނައިސް ކުންފުނީގެ ސްޓްރެޓެޖީތަކަށް ބަދަލެއް ނުގެނެސް މި ބަދަލުވުން ކުރިއަށް ގެންދާނެ ކަމުގެ ޔަގީންކަން ބޯޑުން ދެއްވާފައިވެއެވެ.