ކަނޑުފަޅުގެ މާހައުލަށް ކުޑަކުދިންނާއި ޒުވާނުން ހޭލުންތެރިކުރުވަން ދިރާގާއި ސީޑް ގުޅިއްޖެ

ކުޑަކުދިންނާއި ޒުވާނުންގެ މެދުގައި ކަނޑުފަޅުގެ ދިރުންތަކަށް އޮންނަ ހޭލުންތެރިކަން އިތުރުކޮށް، "އޯޝަން ލިޓްރެސީ" އަށް ބާރުއެޅުމުގެ މަޤްޞަދުގައި ސީޑް އިނީޝިއޭޓިވްއާ ގުޅިގެން މަސައްކަތްކުރަން ފަށައިފި ކަމަށް ދިރާގުން ހާމަކޮށްފިއެވެ.

ދިރާގުން ނެރުނު ނޫސްބަޔާނެއްގައި ބުނީ، ސީޑް (ސައިންސް، އެކްސްޕްލޯރ، އެކްޓް އެންޑް ޑިސްކަވަރ) އިނީޝިއޭޓިވް އަކީ ތިމާވެށީގެ ދާއިރާއިން ތައުލީމާއި އަމަލީ ތަޖުރިބާ ފޯރުކޮށްދިނުމަށް މަސައްކަތްކުރާ ޖަމިއްޔާއެއް ކަމަށެވެ.

އެގޮތުން ސިޓިޒެން ސައިންސްގެ ޒަރީއާއިން ކަނޑުގެ މައުލޫމާތު އެއްކުރުމާއި، ހޭލުންތެރިކަން އިތުރުކުރުމަށާއި ގުދުރަތީ ވެށި ހިމާޔަތްކޮށް ދެމެހެއްޓުމަށްޓަކައި ކަނޑުފަޅުތަކާ ގުޅުންހުރި މުހިންމު ހަރަކާތްތައް ހިންގުމަށް އެ ޖަމިއްޔާއިން ހާއްސަ އިސްކަމެއް ދޭކަމަށް ދިރާގުން ފާހަގަކުރެއެވެ.

މި އެއްބާރުލުމުގެ ދަށުން ސީޑް އިނީޝިއޭޓިވްގެ ހުޅުމާލެ އަރބަން ހަބަށާއި އެކި ރަށްރަށުގައި ހިންގާ ހަރަކާތްތަކަށް ދިރާގުން ކަނެކްޓިވިޓީގެ އެހީތެރިކަން ފޯރުކޮށްދޭނެއެވެ. އަދި ދެ ފަރާތް ގުޅިގެން ތިމާވެށީގެ ހޭލުންތެރިކަން އިތުރުކުރުމަށާއި ކަނޑުފަޅުތައް ރައްކާތެރިކުރުމުގެ މުހިންމުކަމަށް މުޖުތަމައުގެ ސަމާލުކަން އިތުރުކުރުމަށް ގިނަ މަސައްކަތްތަކެއް ކުރިއަށް ގެންދިއުމަށް ވަނީ ހަމަޖެހިފައެވެ.

އެގޮތުން ސީޑް އިނީޝިއޭޓިވްގެ ދަށުން ހިންގާ "އިކޯ ގާޑިއަން" ޕްރޮގްރާމްގެ ތެރެއިން ހުޅުމާލެ، ކ. ކާށިދޫ އަދި ބ. ގޮއިދޫގައި ކަނޑުފަޅުތަކާ ބެހޭ ޚާއްޞަ ސެޝަންތަކާއި މޫދުގައި ހިންގާ އަމަލީ ހަރަކާތްތައް ކުރިއަށް ގެންދާނެއެވެ. ދާއިރާގެ މާހިރުންނާއި މެރިން ބައިއޮލޮޖިސްޓުންގެ އެހީތެރިކަމާއެކު ކުރިއަށްގެންދާ މި ހަރަކާތްތަކުގެ ތެރެއިން ކަނޑުގެ ދިރުންތަކުގެ ނިޒާމާއި، މޫދުވިނަ އާއި ޗަސްބިންތަކުގެ މުހިންމުކަމުގެ އިތުރުން، ދެމެހެއްޓެނިވި އުސޫލުތަކާއި އީކޯސިސްޓަމް އާލާކުރުން ފަދަ މުހިންމު ދާއިރާތަކުން ބައިވެރިންނަށް މައުލޫމާތު ފޯރުކޮށްދެވޭނެއެވެ.

ދިރާގުން ބުނި ގޮތުގައި، ދިވެހިރާއްޖެ ފަދަ ޖަޒީރާ ގައުމަކަށް ކަނޑުފަޅުގެ މާހައުލާ ބެހޭގޮތުން ހޭލުންތެރިވުމަކީ ނުހަނު މުހިންމު ކަމެކެވެ. ސަބަބަކީ ކަނޑުތަކަކީ ދިވެހިންގެ ދިރިއުޅުމާއި، މުޖުތަމައުތަކާއި އަދި މުސްތަގުބަލާ ނުހަނު ބޮޑަށް ގުޅިލާމެހިފައިވާ މައިގަނޑު ވަސީލަތަށް ވާތީއެވެ. އެހެންކަމުން ޒުވާނުންނަށް ކަނޑުފަޅުގެ މާހައުލާ ބެހޭ މައުލޫމާތު އުނގަންނައިދީ، އަމަލީ ގޮތުން އެ މާހައުލު ތަޖުރިބާކުރުމުގެ ފުރުސަތު ފަހިކޮށްދިނުމަކީ ކަނޑުތަކާ މެދު އޮންނަ ގުޅުން އިތުރަށް ބަދަހިވެގެންދާނެ ކަމެއް ކަމަށް އެ ކުންފުނިން ދެކެއެވެ.

ދިރާގުން އަބަދުވެސް އަންނަނީ ތިމާވެށި ހިމާޔަތްކުރުމަށާއި، ކަނޑުފަޅުތައް ރައްކާތެރިކުރުމަށް މުޖުތަމައު ހޭލުންތެރިކުރުވައި ބާރުވެރިކުރުމަށް ހާއްސަ އިސްކަމެއް ދީގެން އެކި މަސައްކަތްތައް ކުރަމުންނެވެ.