މަސްތުވާތަކެތީގެ 12 ނެޓްވަރކެއް ދެކުނުގައި ހަރަކާތްތެރިވަމުންދޭ: ފުލުހުން
ލިޔުންތެރިޔާ
އަބްދުﷲ ހުސައިން
ދެކުނުގެ އަތޮޅުތަކުގައި ހަރަކާތްތެރިވަމުން އަންނަ މަސްތުވާތަކެތީގެ 12 ނެޓްވަރކެއް ދެނެގަނެވިފައިވާކަމަށް ދެކުނު ޕޮލިސް ޔުނިޓުން ބުނެފިއެވެ.
ރާއްޖޭގެ އެންމެ ދެކުނުގެ އަތޮޅުތަށްކަމަށްވާ އައްޑޫސިޓީ، ފުވައްމުލަކް އަދި ހުވަދުއަތޮޅުގެ ފުލުހުން ކުރަމުންގެންދާ މަސައްކަތްތަކާ ބެހޭ މައުލޫމާތު ނޫސްވެރިންނާ ހިއްސާކުރަމުން އެސިސްޓެންޓް ކޮމިޝަނަރ އޮފް ޕޮލިސް އަދި ސައުތު ރީޖަން ކޮމާންޑަރ އަޙްމަދު ޝަމީމް ވިދާޅުވީ، ވެށި ރައްކަލުގެ ނަމުގައި ފުލުހުން ފެށި އޮޕަރޭޝަން ދެކުނުގެ 3 އަތޮޅަށް ފުޅާކޮށް ކުރިއަށްގެންގޮސްފައިވާކަމަށެވެ. ޝަމީމް ވިދާޅުވީ އެ ސަރަހައްދުގައި ކުރިއަށްގެންދިޔަ އޮޕަރޭޝަންތަކަށްފަހު މަސްތުވާތަކެތީގެ 12 ނެޓްވަރކެއް އުޅޭކަމަށް ދެނެގަނެވިފައިވާކަމަށެވެ.
ދެކުނުގެ އަތޮޅުތަކަށް ބަލާއިރު، އެންމެގިނައިން ހުށަހެޅެނީ މަސްތުވާތަކެތީގެ މައްސަލަތަކާއި ވައްކަމުގެ މައްސަލަތަކެވެ.
ފުލުހުން އެ ސަރަހައްދުގައި ކުރިއަށްގެންދިޔަ އޮޕަރޭޝަންތަކުގެ ތެރެއިން އެންމެ ފާހަގަކޮށްލެވެނީ ފުވައްމުލަކުގައި ކުރިއަށްގެންދިޔަ އޮޕަރޭޝަނެވެ. މި އޮޕަރޭޝަނުގައި ގިނަ އަދަދެއްގެ މީހުން ހައްޔަރުކުރިއިރު ބައެއް މީހުންގެ މައްޗަށް ދައުވާކުރުމަށް ވަނީ ޕީޖީ އޮފީހަށް ފޮނުވާފައެވެ. ފުވައްމުލައް ސިޓީގައި ފުލުހުން ކުރިއަށްގެންދިޔަ ފުރަތަމަ ފިޔަވައްސަށްފަހު ދެވަނަ ފިޔަވަހީގެ އޮޕަރޭޝަންތައް ވަނީ ފަށާފައެވެ. އެގޮތުން މިހާރު މަގުތައް ފަދަ ތަންތަނުގައި މަސްތުވާތަކެތި ވިއްކުމުގެ ވިޔަފާރީގެ މުއާމަލާތްތައް ހިންގާކަމުގެ އަޑު މަޑުވިނަމަވެސް، ސިއްރުން އެކަން ކުރާ ފަރާްތްތައް ހޯދާނެކަމަށް ފުލުހުން ވަނީ ބުނެފައެވެ.
ނޫސްވެރިންގެ ބައްދަލުވުމުގައި ފުލުހުން ވަނީ މައްސަލަތައް ތަހްގީގްކުރުމުގައި ހުރި ބައެއް ގޮންޖެހުންތަކުގެ ވާހަކަވެސް ހިއްސާކޮށްފައެވެ. އެގޮތުން ތަހްގީގަށް ރަށްތަކަށް ދަތުރުކުރުމުގެ ހުރަސްތައް ހުރިއިރު، އެތަނަކަށް ގޮސްގެން ނޫނީ ސްޓޭޓްމަންޓް ނެގެން ނޯންނަކަންވެސް ފާހަގަކުރިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
