އަންހެން ހެދުންއަޅައި މޫނު ފޮރުވައިގެން، 67،000ރ.ގެ ގަޑިއެއް ވަގަށް ނެގި ފިރިހެނަކު ހައްޔަރުކޮށްފި
ލިޔުންތެރިޔާ
ޚަދީޖާ އަރުފާ
އަންހެން ހެދުންއަޅައި މޫނު ފޮރުވައިގެން ފިހާރައަކަށް ވަދެ، 67،000ރ.ގެ ގަޑިއެއް ވަގަށް ނެގި ފިރިހެނަކު ހައްޔަރުކޮށްފިއެވެ.
މި މައްސަލާގައި ހައްޔަރުކޮށްފައިވަނީ އުމުރުން 47 އަހަރުގެ ފިރިހެނެކެވެ.
އޭނާގެ ބަންދު އަމުރުގައި ވާގޮތުން، އޭނާވަނީ 67،500ރ ގެ އޮމެގާ ބްރޭންޑްގެ އަގުހުރި ގަޑިއެއް ފިހާރައަކުން ވަގަށް ނަގާފައެވެ. އަދި އެ ގަޑި ވަގަށް ނަގާފައިވަނީ 3 މީހަކު ގުޅިގެން ރާވައިގެން ކަމަށް ފުލުހުން ބުނެފައިވާ ކަމަށް އަމުރުގައިވެއެވެ.
ސީސީޓީވީ ފޫޓޭޖް ތަކާއި، މީހުންގެ ބަޔާންތަކުން އެނގޭ ގޮތުން، އެ މީހާ ވައްކަން ކުރީ އަންހެން ހެނދުން އަޅަައި، މޫނު ބުރުގާ އަޅައިގެންހުރެ ކަމަށާ، އަދިވެސް އެ ގަޑި ހޯދިފައި ނުވާ ކަމަށް ފުލުހުން މައުލޫމާތު ދޭ ކަމަށް އަމުރުގައި ވެއެވެ. އަދި އެ ގަޑި އެހެން މީހަކަށް ވިއްކާލާފައިވާ ކަމަށް ބެލެވޭ ކަމަށްވެސް ބުނެފައިވެއެވެ.
މީގެ އިތުރުން، ހައްޔަރު ކުރި މީހާއަކީ ކުށުގެ ރިކޯޑް ގިނަ މީހެއްކަން އަމުރުގައި ފާހަގަކޮށްފައިވެ އެވެ. އެގޮތުން، ފިހާރަތަކުން ވައްކަން ކުރުމާއި، މަސްތުވާތަކެތި ވިއްކުމާއި ގަތުން އަދި ބޭނުންކުރުމާއި، ވަގު ފައިސާ ގެންގުޅުމާއި، ސައިކަލު ވަގަށް ނެގުމުގެ އިތުރުން ހަތިޔާރު ބޭނުންކޮށްގެން ފޭރުން ފަދަ ކުށްތަކުގައި އޭނާ ބަންދުކޮށްފައިވާ ކަމަށް ބުނެފައިވެއެވެ.
މައްސަލަ ބެއްލެވި ކްރިމިނަލް ކޯޓުގެ ގާޒީ ސަފްހަތު ހަބީބު ވަނީ އެ މީހާ 15 ދުވަހަށް ބަންދު ކުރުމަށް އަމުރުކޮށްފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
