11 ރަށެއްގައި އައިސްޕްލާންޓް އެޅުމުގެ މަސައްކަތް ފެށުމަށް ތައްޔާރުވެއްޖެ
11 ރަށެއްގައި އައިސްޕްލާންޓް އެޅުމުގެ މަސައްކަތް ފެށުމަށް ތައްޔާރުވެއްޖެއެވެ.
މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސް އިން މިއަދު ވިދާޅުވީ މަސް ދޯނިފަހަރަށް އައިސް ލިބުން ދަތިވާތީ، ދިމާވާ މައްސަލަތަކަށް ހައްލު ހޯދުމަށް ކުރަމުންދާ މަސައްކަތްތަކުގެ ތެރެއިން، އިތުރު 11 ރަށެއްގައި އައިސް ޕްލާންޓު ގާއިމްކުރަން ފެށުމަށް ވާންޖެހޭ ތައްޔާރީތައްވެ ނިމި ޢަމަލީ މަސައްކަތްތައް ފެށުމަށް ތައްޔާރުވެފައިވާ ކަމަށެވެ.
އެގޮތުން އައިސްޕްލާންޓް ގާއިމުކުރަން ހަމަޖެހިފައިވާ ރަށްތަކަކީ:
- ހއ.ދިއްދޫ
- ހދ.ކުޅުދުއްފުށި
- ށ.ފުނަދޫ
- ށ.ކޮމަންޑޫ
- ޅ.ނައިފަރު
- އއ.ރަސްދޫ
- މ.ވޭވަށް
- ދ.ބަނޑިދޫ
- ދ.މީދޫ
- ހއ.އިހަވަންދޫ
- ގދ.ރަތަފަންދޫ
މީގެތެރެއިން 6 އައިސްޕްލާންޓް ސަރުކާރުގެ ޚަރަދުގައި ގާއިމުކުރާއިރު، ބާކީ 5 އައިސް ޕްލާންޓަށް ފަންޑު ހަަމަޖެހިފައިވަނީ ސައުދީ ފަންޑު ފޮރ ޑިވެލޮޕްމަންޓުންނެވެ.
އައިސް ޕްލާންޓްތައް ޤާއިމުކުރުމުގެ މަޝްރޫޢުގެ މަސައްކަތް ޙަވާލުކުރުމަށް ނިންމާފައިވަނީ މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ ލޓޑ (މިފްކޯ) އާ އެވެ.
މިފްކޯއަކީ ސަރުކާރުން މީގެ ކުރިންވެސް ހިންގާފައިވާ އައިސް ޕްލާންޓު ގާއިމްކުރުމުގެ ޕްރޮޖެކްޓުތައް ކާމިޔާބުކަމާއެކީގައި ނިންމާފައިވާ ކުންފުންޏެކެވެ. އެހެންކަމުން އަލަށް ގާއިމުކުރާ އައިސްޕްލާންޓްތަކުގެ އިތުރުން، މިހާރު ގާއިމްކުރެވިފައިވާ ބައެއް އައިސް ޕްލާންޓުތަކުން ޚިދުމަތް ދިނުމުގައި ދިމާވެފައިވާ މައްސަލަތަކަށް އަވަސް ހައްލެއް ހޯދުމުގެ މަސައްކަތްތައްވެސް މިނިސްޓްރީއިން ދަނީ މިފްކޯއާ ގުޅިގެން ކުރައްވަމުންނެވެ.
މީގެ އިތުރުން ފެނަކަ ކޯޕަރޭޝަންގެ ބެލުމުގެ ދަށުން އޮަޕަރޭޓް ކުރަމުންދާ އައިސްޕްލާންޓްތައްވެސް މިފްކޯއާއި ހަވާލުކުރުމުގެ މަސައްކަތް ކުރެވެމުން ދާކަމަށް މިނިސްޓްރީއިން ވިދާޅުވިއެވެ.
ސަރުކާރުން މިހާތަނަށް 25 ރަށެއްގައި އައިސް ޕްލާންޓުތައް ގާއިމްކޮށްފައިވާއިރު، އިތުރު 11 އައިސް ޕްލާންޓެއް ގާއިމުވުމަކީ މަސްވެރިންނަށް އަމާޒުކޮށްގެން ގާއިމްކުރެވިފައިވާ އައިސް ޕްލާންޓުތަކުގެ ނެޓުވޯކުގެ ކެޕޭސިޓީ ވަރަށް ބޮޑުތަނުން އިތުރުވެގެން ދާނެކަމެކެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
