އިންޑިއާގައި، ކޯލް މައިންއެއް ގޮވައި، 27 މީހުން މަރުވެއްޖެ

އިންޑިއާގެ އިރުއުތުރުގެ ސްޓޭޓެއް ކަމަށްވާ މޭގަލާޔާގައި ޤަވާޢިދާ ޚިލާފަށް ހިންގަމުންދިޔަ ކޮއިލް މައިންއެއް ގޮވާ، 27 މީހުން މަރުވެއްޖެއެވެ.

މި ހާދިސާ ހިނގާފައިވަނީ މި މަހުގެ 5 ވަނަ ދުވަހު އީސްޓް ޖައިންތިއާ ހިލްސް ޑިސްޓްރިކްޓްގެ އެކަހެރި ސަރަހައްދެއް ކަމަށްވާ ތަންގްސްކޫގައެވެ.

މި ހާދިސާއާ ގުޅިގެން "ނޭޝަނަލް ޑިޒާސްޓަރ ރެސްޕޮންސް ފޯސް" (އެން.ޑީ.އާރް.އެފް) އާއި ސްޓޭޓް ޑިޒާސްޓަރ ރެސްޕޮންސް ފޯސް އަދި ކަމާބެހޭ އިދާރާތަކުން ދަނީ ހުއްޓުމެއްނެތި މަސައްކަތް ކުރަމުންނެވެ. ނަމަވެސް، ގޮވާފައި ވަނި "ރެޓް ހޯލް" މައިނިންގ ޓަނަލްއެއް ކަމަުން ބޮޑެތި އުނދަގޫ ތަކާއި ދަނީ ކުރިމަތިވަމުންނެވެ.

"ރެޓް ހޯލް" މައިނިންގ ޓަނަލްތަކޭ އެ ތަންނަނަށް ކިޔަނީ އެ ތަންތަން ހުންނަ ގޮތުންނެވެ. މި ތަންތަނަކީ މީހަކަށް ކިރިޔާ ވަދެވޭވަރުގެ ހަނި ތަންތަން ކަމަށްވުމުން، ކޯލް ހުންނަ ހިސާބަށް ދިއުމަށްޓަކައި މަސައްކަތްތެރިންނަށް ޖެހެނީ މީދަލެއް ފަދައިން ފިރުކެމުން ނުވަތަ ގުދުވެގެން ދާށެވެ. މި ބާވަތުގެ މައިންތަކަކީ އެއްވެސް ރައްކާތެރިކަމުގެ މިންގަނޑެއް ނެތި، ވަރަށް ނުރައްކާތެރިކޮށް ހިންގާ ތަންތަނެވެ.

މިސަބަބާއިހުރެ، ސަލާމަތީ ބާރުތަކަށް މިތަނުން މީހުން ސަލާމަތްކުރުމުގެ މަސައްކަތަށް ބޮޑެތި ހުރަސްތަކެއް ވަނީ ކުރިމަތިވެފައެވެ. އޮފިޝަލުން ހާމަކުރާ ގޮތުގައި، ހާދިސާ ހިނގި ފުރަތަމަ ދުވަހު 18 މީހެއްގެ ހަށިގަނޑު ފެނިފައިވާއިރު، އޭގެ ފަހުން ކުރިއަށްގެންދިޔަ އޮޕަރޭޝަންތަކުގައި އިތުރު ހަށިގަނޑުތައް ފެނި، މިހާތަނަށް މަރުވި މީހުންގެ ޖުމްލަ އަދަދު ވަނީ 27 އަށް އަރާފައެވެ.

ޤާނޫނީ ހުއްދައެއް ނެތި ހިންގަމުންދިޔަ މި މައިންގައި ގޮވުން ހިނގުމާއެކު ބޮޑު އަލިފާންގަނޑެއް އުފެދި، ވިހަ ގޭސްތައް ބޭރުވުމުގެ ސަބަބުން އެތައް މަސައްކަތްތެރިންނެއް ވަނީ ބިމުގެ އަޑީގައި ތާށިވެފައެވެ. މި ހާދިސާގައި ޒަޚަމްވި ބައެއް މީހުންނަށް މިހާރު ދަނީ ހޮސްޕިޓަލުތަކުގައި ފަރުވާ ދެމުންނެވެ. ނަމަވެސް، ހާދިސާ ހިނގިއިރު މައިންގެ ތެރޭގައި ތިބީ ޖުމްލަ ކިތައް މީހުން ކަމެއް އަދި ސާފެއް ނުވެއެވެ.

މި މައްސަލައިގައި ފުލުހުން ވަނީ ޤަވާޢިދާ ޚިލާފަށް މައިން ހިންގުމާއި ގޮވާތަކެތި ބޭނުންކުރުމުގެ މައްސަލައިގައި މައްސަލަ ރަޖިސްޓްރީކޮށް، އެކަމާ ގުޅުންހުރި ދެ މީހަކު ހައްޔަރުކޮށްފައެވެ. މޭގަލާޔާގެ ޗީފް މިނިސްޓަރ ކޮންރަޑް ކޭ ސަންގްމާ ވަނީ މި ހާދިސާގެ ފުރިހަމަ ތަޙުޤީޤެއް ހިންގުމަށް އަމުރުކުރައްވައި، މީގައި އިހުމާލުވި ފަރާތްތަކަށް ހަރުކަށި އަދަބު ދޭނެ ކަމަށް ވިދާޅުވެފައެވެ.

މި ހިތާމަވެރި ހާދިސާއާއެކު، ނުރައްކާތެރި މައިން ކުރުމުގެ އުޞޫލުތައް މަނާކޮށްފައި އޮތް ނަމަވެސް އެކަން ކުރިއަށްދާ މައްސަލައިގައި އަނެއްކާވެސް ބޮޑެތި ބަހުސްތަކެއް ވަނީ އުފެދިފައެވެ. އިންޑިއާގެ ރައީސާއި ބޮޑުވަޒީރު ވަނީ މި ހާދިސާގައި މަރުވި މީހުންގެ އާއިލާތަކަށް ތައުޒިޔާ ފޮނުއްވައި، ހާލުގައި ޖެހިފައިވާ ފަރާތްތަކަށް އެހީތެރިކަން ފޯރުކޮށްދިނުމަށް ގޮވާލައްވާފައެވެ.