އެހެން ޕާޓީތަކުން އެޖެންޑާ ކަނޑައަޅަނީ އެމްޑީޕީގެ އެޖެންޑާއަށް ބަލައިގެން: ޝާހިދު
ލިޔުންތެރިޔާ
ޚަދީޖާ އަރުފާ
އެމްޑީޕީގެ ފަހަތުން މަސައްކަތްކުރާ އެހެން ޕާޓީތަކުން އެޖެންޑާ ކަނޑައަޅަނީ އެމްޑީޕީގެ އެޖެންޑާއަށް ބަލައިގެން ކަމަށް އެޕާޓީގެ ރައީސް އަބްދުالله ޝާހިދު ވިދާޅުވެއްޖެއެވެ.
އެމްޑީޕީގެ 20 ވަނަ އަހަރީ ދުވަހާއި ގުޅިގެން ދެއްވި ވީޑިއޯ މެސެޖެއްގައި ޝާހިދު ވިދާޅުވީ، ފާއިތުވި 20 އަހަރުގެ ތެރޭގައި އެމްޑީޕީން ވަނީ، ރާއްޖެ އެދޭ ބަދަލު ރާއްޖެއަށް ގެނެސްދީފައި ކަމަށެވެ. އެގޮތުން ރާއްޖެއަށް އިސްލާޙީ ބަދަލުތައް ގެނެސް، ސިޔާސީ އަދި އިޖުތިމާޢީ އެޖެންޑާ ކަނޑައަޅައި ދިނީ އެމްޑީޕީން ކަމަށް އޭނާ ވިދާޅުވިއެވެ.
މިއަދުގެ ޙާލަތަށް ބަލާއިރު ރާއްޖެއަށް އެމްޑީޕީގެ އިސްލާހީ އެޖެންޑާ ނުހަނު ބޭނުންކަން ފާހަގަކުރައްވައި ޝާހިދު އިތުރަށް ވިދާޅުވީ، އެމްޑީޕީގެ ފަހަތުން މަސައްކަތް ކުރާ ހުރިހާ ޕާޓީއެއްވެސް އެޖެންޑާ ކަނޑައަޅަނީ އެމްޑީޕީގެ އެޖެންޑާއަށް ބަލައިގެން ކަމަށެވެ.
އަޅުގަނޑުމެންގެ ފަހަތުން މަސައްކަތް ކުރާ ސިޔަސީ ޕާޓީ ތަކުން، މިއަދު އެޖެންޑާ ކަނޑައަޅުއްވަނީ އަޅުގަނޑުމެންގެ އެޖެންޑާ ބައްލަވައިގެން. އެއީ އެމްޑީޕީއަށް ހޯދިފައުވާ އެންމެ ބޮޑު ކުރިއެރުން. ބޯހިޔާވަހިކަން، ދަތުރުފަތުރު، ހިލޭ ބޭސްފަރުވާ، ހިލޭ ޑިގްރީ، ރަށްރަށުގެ ތަރައްގީ، ކުޑަރަށެއް ބޮޑު ރަށެއް ބެލުމެއްނެތި ތަރައްގީ ކުރަމުން ގެންދިޔުން. ވެރިކަމުގެ ބާރުތައް ބަހާލެވިފައިވުން، އެއްބާރުން އަނެއް ބާރަށް ފާރަވެރިވުމުގެ ނިޒާމް، ސިޔާސީ ވާދަވެރި ހަރަކާތް ސުލްހަވެރިކަމާއެކު ހިންގުމުގެ ޖާގަ ހޯދައިދިނުން، ހިޔާލު ފާޅުކުރުމުގެ މިނިވަންކަން، މިހެން ގޮސް މި ހުރިހާ ކަމަކީވެސް އެމްޑީޕީން ރައްޔިތުންނަށް ހޯދައިދިން ފުރުސަތުތައް
އެމްޑީޕީގެ ރައީސް އަބްދުالله ޝާހިދު
މިއާއެކު ޝާހިދު ވިދާޅުވީ، ހުރިހާ ގައުމަކާއި ގުޅިގެން މަސައްކަތްކޮށް، ދުނިޔޭގެ އިހްތިރާމް ރާއްޖެއަށް ހޯދައިދިނީވެސް އެމްޑީޕީން ކަމަށެވެ.
އަދި މި 20 އަހަރު ފާހަގަކުރާއިރު ދެން އަންނާނެ އެންމެ ބޮޑު އިންތިޚާބަކީ ލޯކަލް ކައުންސިލް އިންތިޚާބު ކަމަށާ، އެ އިންތިޚާބު ބޮޑު ތަނުން ކާމިޔާބު ކުރުމަކީ އެ ޕާޓީގެ އަޒުމް ކަމަށެވެ.
އެމްޑީޕީއަށް 20 އަހަރު ފުރުން ފާހަގަކުރަން އެޕާޓީން ވަނީ މުޅި އަހަރަށް ދެމިގެންދާ ގޮތަށް ގިނަ ހަރަކާތްތަކެއް ރާވާލާފައެވެ. އެގޮތުން، މިއަދު ހަރަކާތްތައް ފަށާފައިވަނީ ހެނދުނު ސަޔާއިއެކު ދިދަ ނެގުމުގެ ހަރަކާތަކުންނެވެ. އެފަހުން، އަހަރީ ދުވަހުގެ ކޭކުފެޅުން ބާއްވާފައިވާއިރު، އެމްޑީޕީ މެންބަރުންގެ މެދުގައި ފުޓްސަލް މުބާރާތެއް ބޭއްވުމަށްވެސް ވަނީ ހަމަޖެހިފައެވެ. އަދި ޒުވާނުންގެ ރޫހުގެ ފަރާތުން ”ލައުޑް އެންޑް ލޯކަލް“ ޕޮޑްކާސްޓެއް ވެސް މިރޭ ކުރިއަށް ދާނެ ކަމަށް އެ ޕާޓީން ބުނެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
