އަދުހަމް ފޭރެން މަސައްކަތްކުރީ މަސްތުވާތަކެއްޗަށް ފައިސާ ހޯދަން: ފުލުހުން

ޓެކްސީ ޑްރައިވަރު، އދ. މާމިގިލީ ކަނީރުމާގެ، ގާސިމު ހަސަން 59، މަރާލީ އަދުހަމް މުހައްމަދު އޭނާ މަރާލީ މަސްތުވާތަކެއްޗާއި އެހެނިހެން ބޭނުންތަކަށް ބޭނުންވާނެ ފައިސާ ހޯދުމަށް ފޭރެން މަސައްކަތް ކުރުމުގެ ތެރޭގައިކަމަށް ފުލުހުން ބުނެފިއެވެ.

މިއަދު ބޭއްވި ނޫސްވެރިންގެ ބައްދަލުވުމުގައި ފުލުހުން ބުނީ، ގާސިމް މަރާލި ކަމަށް އިއުތިރާފުވެފައިވާ ޅ. ހިންނަވަރު، ބޮޑުހިޔާގެ، އުމުރުން 21 އަހަރުގެ އަދުހަމް މުހައްމަދު ޓެކްސީއަށް އެރީ އެއާޕޯޓުން ޓެކްސީ ކިޔޫއިން ކަމަށެވެ. ޓެކްސީއަށް އެރުމުގެ ކުރިން އޭނާ ބަލާފައިވަނީ އުމުރުން ދުވަސްވީ މީހުންނަށް ކަމަށް ފުލުހުން ބުންޏެވެ.

ޓެކްސީއަށް އރުމަށްފަހު ހުޅުމާލެ ހާފްވެއާ ހައުސްއަށް ގެންގޮސް ދިނުމަށް އެދުމުން، އެތަނަށް ގެންގޮސް ދިނުމުން އެވަގުތު އޭނާއަތުގައި އެތަނުގެ ކާޑު ނެތް ކަމަށާއި ކާޑު ބަލައި އެހެން ތަނަކަށް ދިއުމަށް އަދުހަމް އެދުނު ކަމަށް ފުލުހުން ބުންޏެވެ.

އެގޮތުން ހުޅުމާލޭގެ އެކި ސަރަހައްދުތަކުގައި ދުއްވުމަށްފަހު، 20:54 ހާއިރު، އަނބުރާ ހާފުވެއާ ހައުސް އަށް ގެންގޮސް ދިނުމަށް އަދުހަމް އެދުނު ކަމަށް ފުލުހުން ބުންޏެވެ.

ފުލުހުން ބުނީ ހާފުވެއާ ހައުސް އަށް ދިއުމަށް ނިންމީ އެސަރަހައްދަކީ އަނދިރި ހިސާބަކަށް ވުމުން ކަމަށް ބެލެވޭ ކަމަށެވެ.

އެގޮތުން ހާފުވެއާ ހައުސް އަށް ދެވަނަ ފަހަރަށް ގޮސް ގޯޅި އަޅާން އުމުނު ވަގުތު އަދުހަމްގެ ޖީބުގައި އޮތް ވަޅި، ކަނާތުން ނެގުމަށްފަހު، ވައަތުން ގާސިމުގެ ކަރާއި ދިމާކޮށް، ބިރުދެއްކި ކަމަށާއި އެވަގުތު ގާސިމް ޓެކްސީގެ ދޮރުހުޅުވައި، ހަޅޭއްލަވަމުން ދާތީ އެ އަޑު ކަނޑުވައިލުމަށް ގާސިމުގެ ކަރަށް ހަރާލީ ކަމަށް އަދުހަމް އިއުތިރާފުވެފައިވާކަމަށެވެ. ވަޅީ ހަރާފައިވަނީ އެއް ފަހަރު ކަމަށް ފުލުހުން ބުންޏެވެ.

އެވަގުތު ގާސިމު ސަލާމަތްވުމަށް ކުރި މަސައްކަތުގައި ދެއަތުން ވަޅީގައި ހިފުމުގެ ސަބަބުން ދެ އަތް ޒަހަމްވެފައި ހުރި ކަމަށް ފުލުހުން ބުންޏެވެ.

ފުލުހުން ބުނި ގޮތުގައި އަދުހަމް އެވަގުތު އެސަރަހައްދުގެ ވަލުތެރެއަށް ވަދެ، ލައިގެން ހުރި ގަމީސް ބަދަލު ކުރުމަށްފަހު މާލެ ދިޔަކަމަށާއި ގަމީހަކީ މީހަކު ދިން ގަމީހެއް ކަމަށެވެ. އަދި ވަޅި ހޯދީ މަސްކަނޑަން ކަމަށްބުނެ ގެޔަކުން ކަމަށާއި އެކަމުގައި އެއްވެސް މީހެއްގެ ބ ައިވެރިވުމެއް އޮތްކަމަށް ތަހުގީގަށް އެނގިފައި ނުވާކަމަށް ފުލުހުން ބުނެއެވެ.

ފުލުހުން ބުނީ ގާސިމްގެ ގާތިލް އަދުހަމް މުހައްމަދުގެ މަގްސަދަކީ ފޭރުން ކަމަށް އޭނާ ބުނާ ކަމަށާ ވަޅިން ހަމަލާދިނީ ފޭރެން ކުރި މަސައްކަތް ނާކާމިޔާބުވުމުން ކަމަށެވެ. އަދި ވަޅިއެއް ހިފައިގެން ނިކުމެ ފޭރެން މަސައްކަތް ކުރީ މަސްތުވުމަށާއި އެހެނިހެން ބޭނުން ތަކަށް ފައިސާ ހޯދުމަށް ކަމަށް އަދްހަމް ބުނެފައިވާ ކަމަށެވެ.

ފުލުހުން ބުނީ، އަދުހަމް މުހައްމަދު، މި މައްސަލައިގައި އިއުތިރާފުވެފައި ވީ ނަމަވެސް، މައްސަލަ ބިނާ ކުރާނީ އެ އިއުތިރާފު މައްޗަށް އެކަނި ނޫން ކަމަށާއި ހެއްކާއި ގަރީނާގެ މައްޗަށް ކަމަށެވެ. އެ ގޮތުން މިހާ ތަނަށް އައި އިރު، ހުޅުމާލެ، މާލެ، އަދި ހުޅުލެ ހިމެނޭ ގޮތުން 67 ތަނަކުން، 103 ފުޓޭޖެއް ބަލާފައިވާ ކަމަށާއި އިތުރު ފުޓޭޖު ހޯދައި ބެލުމުގެ މަސައްކަތް އަދިވެސް ކުރަމުން އަންނަ ފުލުހުން ބުނެ އެވެ.

އަދި އެމައްސަލައިގެ ތަހުގީގު ނިންމައި ދައުވާކުރަން ވަރަށް އަވަހަށް ޕީޖީއަށް ފޮނުވާނެ ކަމަށްވެސް ފުލުހުން ބުންޏެވެ.

އަނިޔާވެރި ގޮތަކަށް ޒަހަމްކޮށްލާފައި ވަނިކޮށް، ގާސިމް ފެނިފައިވަނީ މި މަހުގެ ހަތަރު ވަނަ ދުވަހުގެ ރޭ 9:00 އެހާކަންހާއިރު ހުޅުމާލެ ރީތިގަސްމަގުގައި އޮއްވައެވެ. ގާސިމް ހޮސްޕިޓަލަށް ގެންދިޔަތާ މާގިނަ އިރުތަކެއްނުވެ ވަނީ މަރުވެފަ އެވެ.