އެމޭޒަން އިން ދައްކާ "ހަޒްބިން ހޮޓެލް" ކާޓޫނުގައި ކުފުރާއި ޝިރުކު؛ ދަރިން ރައްކާތެރިކުރަންޖެހޭ!
ލިޔުންތެރިޔާ
ޚަދީޖާ އަރުފާ
އެމޭޒަން އިން ދާދިފަހުން ދައްކަން ފެށި، "ހަޒްބިން ހޮޓެލް" ގައި އިސްލާމް ދީނާއި ފުށުއަރާ ޝިރުކާއި ކުފުރު ހިމެނޭ އެތައް މަންޒަރުތަކެއް ދައްކާތީ އެ ކާޓޫން ބެލުމާއި ދުރުހެލިވެ، ދަރިންވެސް އެ ބެލުމުން ރައްކާތެރި ކުރުމަށް ގިނަ ބަޔަކު ގޮވާލާފައިފިއެވެ.
އޮންލައިންކޮށް އެކިއެކި ކާޓޫން ތަކާއި ފިލްމުތައް ބެލުމުގެ ފުރުސަތު ތަން މިނަށް ހުޅުވާލެވިފައިވާ މި ޒަމާނުގައި، ގިނަ ޒުވާނުންނާއި ކުދިންވެސް އަންނަނީ އެކިއެކި އޮންލައިން ޕްލެޓްފޯމް ތަކުން ފިލްމުތަކާއި ކާޓޫންތައް ބަލަމުންނެވެ.
އެފަދަ، ޕްލެޓްފޯމް ތަކުގައި ކުޑަކުދިންނާއި، އަދި ޚާއްސަކޮށް މުސްލިމުންނާއި ނުގުޅޭ ފާހިޝް އެކިއެކި މަންޒަރުތަކާއި، އިސްލާމްދީނާއި ބީރަށްޓެހި ސަގާފަތްތަކާއި، ދީނާއި ޚިލާފް އެކިއެކި ފިލްމު ތަކާއި ކާޓުންތައްވެސް މިހާރު ބެލެން ހުންނަ އިރު، އެކަމަކީ އެ ޕްލެޓްފޯމް ތަކުން އެއްޗެހި ބަލާ މީހުންނާއި، އަދި ކުދިންގެ ބެލެނިވެރިންވެސް ވަރަށް ސަމާލުވާންޖެހޭ ކަމެއްކަން ފާހަގަކޮށްލަންޖެހެއެވެ.
އެގޮތުން ދާދިފަހުން އެމޭޒަން އިން ދައްކަންފެށި "ހަޒްބިން ހޮޓެލް" އަކީ ބެލެނިވެރިންނާއި އެނޫން ފަރާތްތައްވެސް ވަރަށް ބޮޑަށް ސަމާލުވާންޖެހޭ ކާޓޫން ފިލްމެކެވެ.
އާދަމް ޢަލައިހިއްސަލާމް އާއި ހައްވާގެފާނާއި، ސުވަރުގެއާއި، ނަރަކަ، މަލާއިކަތް ބޭކަލުން އަދި އިބިލީހުގެ ވާހަކަވެސް މި ކާޓޫން ފެށިގެން އަންނައިރު ދައްކާއިރު، އެއިން ބުނެދޭން މަސައްކަތް ކުރަނީ އިބިލީހުގެ ރަނގަޅު ވާހަކައެވެ. އަދި އާދަމް ޢަލައިހިއްސަލާމް އާއި ހައްވާގެފާނާއި މަލާއިކަތުން "ވިލަން" އެއްގެ ގޮތަށް ސިފަކޮށް އެއިން އެ ދައްކާ މަންޒަރު ތަކުގެ ތަފްސީލަށް ދިޔުމަކީވެސް ކޮށްގެން ހެޔޮ ވާނެ ކަމެއް ކަމުގައި ނުދެމެވެ.
އެހެންކަމަށް ވާއިރު، އަހަރެމެންގެ ދަރިންނާއި، އަމިއްލަ ނަފްސްތައްވެސް އެފަދަ ކަންކަމަށް ހޭލުންތެރިކޮށް، ޣައިރު މުސްލިމުން، އެމީހުންގެ ފިކުރާއި، އެމީހުންގެ ޕްރޮޕެގެންޑާ ތައް، މުސްލިމުންގެ މެދުގައި ފަތުރައި، މުސްލިމުން ދީނާއި ދުރަށް ޖައްސައި، މުސްލިމުންގެ ހިތް ތަކުގައި ދީނާއި މެދު ނަފްރަތު އުފެއްދުމަށް ކުރަމުންދާ މަސައްކަތް ތަކުން ސަލާމަތްވާންޖެހެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
