މަޖިލިސް މުވަޒަފުންގެ އަގު ވަޒަންކޮށްފި

ރައްޔިތުންގެ މަޖިލީހުގައި ހިދުމަތްކުރައްވާ މުއައްޒަފުންގެ އަގު ވަޒަންކޮށް އެ މުއައްޒަފުންގެ ތެރެއިން ފާހަގަކޮށްލެވޭ ޚިދުމަތްތެރިނަށް އެވޯޑް ދީފިއެވެ.

ޚިދުމަތްތެރިންނަށް އެވޯޑް ދީފައި ވަނީ އެކަމަށް ހާއްޞަކޮށްގެން ރޭ ދަރުބާރުގޭގައި ބޭއްވި އެ އިދާރާގެ އިދާރީ މުއައްޒަފުންގެ ސްޓާފް ނައިޓުގައެވެ.

ރޭގެ މި ސްޓާފް ނައިޓް ޝަރަފުވެރިކޮށްދެއްވީ މަޖިލީހުގެ ކުރީގެ ރައީސް އަދި ކުރީގެ ފޮރިން މިނިސްޓަރ އަބްދު ﷲ ޝާހިދުއެވެ.

އޭގެ އިތުރުން އެ ހަފްލާގައި މަޖިލީހުގެ މިހާރުގެ ރައީސް މުހައްމަދު އަސްލަމް އާއި މަޖިލީހުގެ މެމްބަރުންނާއި މަޖިލީހުގެ އިދާރާގެ މުވައްޒަފުންނާއި އިސްވެރިން ބައިވެރިވެވަޑައިގެންނެވިއެވެ.

ރައްޔިތުންގެ މަޖިލީހުގެ ސޯޝަލް ކްލަބް ، ޕީޕަލްސް މަޖިލިސް ރެކްރިއޭޝަން ކްލަބް (ޕެމާ) އިން އިސްނަގައިގެން ބޭއްވި ރޭގެ ހަފްލާގައި ވަނީ 25 އަހަރަށްވުރެ ދިގު މުއްދަތަކަށް ޚިދުމަތް ކޮށްފައިވާ 5 މުވައްޒަފަކަށް ގޯލްޑް މެޑައްޔާއި ހަނދާނީ ފިލާ ހަވާލުކޮށްފައެވެ.

އޭގެ އިތުރުން މަޖިލިހަށް 15 އަހަރާއި 20 އަހަރާ ދެމެދުގެ މުއްދަތަކަށް ޚިދުމަތް ކުރި މުވައްޒަފުންގެ ތެރެއިން 57 މުވައްޒަފަކަށް ބްރޯންޒް މެޑައްޔާއި ހަނދާނީ ފިލާ، އަދި މަޖިލީހުގައި 20 އަހަރާއި 25 އަހަރާ ދެމެދުގެ މުއްދަތަކަށް ޚިދުމަތް ކޮށްފައިވާ 10 މުވައްޒަފަކަށް ސިލްވަރ މެޑައްޔާއި ސެޓްފިކެޓް ރޭގެ ހަފްލާގައި ވަނީ ހަވާލުކޮށްފައެވެ.

ސާދަތިރީސް އަށެއް ބޮޑުބެރު ގްރޫޕްގެ ބޮޑުބެރާއި ދަ ޓައިމްގެ ނެށުންތައް ހުށަހަޅައިދިން ރޭގެ ހަފްލާގައި ވަނީ މަޖިލީހުގެ މުވައްޒަފުންގެ ގޮތުގައި 5 އަހަރާއި 10 ދެމެދުގެ މުއްދަތަކަށް ޚިދުމަތް ކުރި 58 މުވައްޒަފަކަށް ޚިދުމަތުގެ ސެޓްފިކެޓް ދީފައެވެ. އަދި 10 އަހަރާއި 15 އަހަރާ ދެމެދުގެ މުއްދަތަކަށް ޚިދުމަތް ކުރި 7 މުވައްޒަފަކަށް ހަނދާނީ ފިލާ ދިނުމުގެ އިތުރުން ، 34 މުވައްޒަފަކަށް އެމްޕްލޯއީ އެވޯޑް ވެސް ދީފައެވެ.

މަޖިލިހުގެ އިދާރާއިން މަޢުލޫމަތު ދެއްވާފައިވާ ގޮތުގައި ރޭގެ ހަފްލާއަކީ އެތަނުގެ އިދާރީ މުއައްޒަފުން ކުރައްވާ ބުރަ މަސައްކަތްތައް ފާހަގަކޮށް އެފަރާތްތަކުގެ ޚިދުމަތުގެ އަގު ވަޒަން ކުރުމުގެ ގޮތުން ބޭއްވުނު ހަފްލާއެކެވެ.

"މިއީ 12 އަހަރުފަހުން މަޖިލީހުގެ އިދާރީ މުވައްޒަފުންގެ އަގު ވަޒަންކުރުމަށް މި ގޮތަށް ބޭއްވި ހަފްލާއެއް. ޕެމާއިން މިފަދަ ހަފްލާއެއް ބޭއްވުމުގެ މަޤްސަދަކީ މުވައްޒަފުންކުރާ ބުރަ މަސައްކަތް ފާހަގަކޮށް އެބޭފުޅުންގެ ހިދުމަތުގެ އަގު ވަޒަންކުރުން." ޕެމާގެ ނައިބު ރައީސް އަދި މަޖިލީހުގެ ޑިރެކްޓަރ އޮފް މީޑިއާ އެންޑް ކޮމިއުނިކޭޝަން ޙަސަން ޒިޔާޢު ވިދާޅުވިއެވެ.

ޕެމާގެ ނައިބު ރައީސް އަދި މަޖިލީހުގެ ޑިރެކްޓަރ އޮފް މީޑިއާ އެންޑް ކޮމިއުނިކޭޝަން ޙަސަން ޒިޔާޢު ވިދާޅުވިއެވެ.