ޕީއެސްޖީއާއެކު ހަދާފައިވާ އެއްބަސްވުން ޑި މާރިއާ އާކޮށްފި

އާޖެންޓީނާގެ ތަރި އޭންޖެލް ޑި މާރިއާ ޕީއެސްޖީއާއެކު ހަދާފައިވާ އެއްބަސްވުން އިތުރު ތިން އަހަރަށް އައު ކޮށްފިއެވެ. ޕީއެސްޖީއިން ވަނީ މިކަން ކްލަބުގެ ޓްވިޓާ އެކައުންޓް މެދުވެރިކޮށް ކަށަވަރުކޮށްދީފައެވެ.

އެހެންކަމުން 2021 ވަނަ އަހަރުގެ ނިޔަލަށް ޕީއެސްޖީގައި ޑި މާރިއާ މަޑުކުރާނެއެވެ.

ނޭމާ، އެމްބައްޕޭ، އަދި ކަވާނީ ފަދަ މޮޅު އަދި ހުނަރުވެރި ތަރިން ޕީއެސްޖީގައި ތިބި ނަމަވެސް ޑި މާރިއާ ދަނީ އޭނާއަކީ މުހިންމު ކުޅުންތެރިޔެއްކަން ސާބިތުކޮށްދެމުންނެވެ. އެގޮތުން މި ސީޒަނުގައި ޕީއެސްޖީގެ މައިގަނޑު އަމާޒު ކަމުގައިވާ ޗެންޕިއަންސް ލީގުގައިވެސް ޑި މާރިއާ ދަނީ މޮޅު ކުޅުމެއް ދައްކަމުންނެވެ.

ފްރާންސްގެ ޗެންޕުއަނުންނަށް މި ސީޒަނުގައި މިހާތަނަށް 15 މެޗުން 7 ގޯލް ޖަހާދީފައިވާ ޑި މާރިއާގެ އެއްބަސްވުން ހަމަވާއިރު އޭނާއަށް ވާނީ 33 އަހަރެވެ.