އަނެއްކާވެސް ޗައިނާ-ފިލިޕީންސް ކުރިމަތިލުމެއް

މިލްކުވެރިކަމާމެދު ހައިޖާނު ބޮޑުވެފައިވާ ދެކުނު ޗައިނާ ކަނޑުގައި އަނެއްކާވެސް ޗައިނާއާއި ފިލިޕީންސްއާ ދެމެދު ކުރިމަތިލުމެއް ހިނގައިފިއެވެ.

މިފަހަރުގެ ކުރިމަތިލުންތައް ހިނގީ ދެކުނު ޗައިނާ ކަނޑުގެ ސަރަހައްދުގެ އޮންނަ ސޫބީ ރީފްއާއި ސޭންޑީ ކޭ ސަރަހައްދަށް ފިލިޕީންސްގެ ފިޝަރީޒް ބިއުރޯގެ ދިރާސާ ޓީމެއް ދިޔުމުންނެވެ. ޗައިނާއިން އެގައުމުގެ ސަރަހައްދުގެ ގޮތުގައި ކަނޑައަޅައި، ފަޅު ހިއްކައިގެން ރަށްތަކެއް ގާއިމްކޮށް ތަރައްޤީކޮށްފައިވާ މިސަރަހައްދަކީ ޗައިނާއިން އަތްގަދަކޮށްފައިވާ، އެގައުމުގެ ސަރަހައްދުގެ ބައެއްގެ ގޮތުގައި އެގައުމުން ބުނަމުންދާ ސަރަހައްދެކެވެ. ފިލިޕީންސްއާއި ބައިނަލްއަގްވާމީ މުޖްތަމައުން ދަނީ އެސަރަހައްދަށް ޗައިނާގެ ބާރު ގާނޫނީ ގޮތުން ނުހިނގާނެކަމަށް ބުނަމުންނެވެ.

ޗައިނާއިން ނެރުނު ބަޔާނެއްގައި ބުނީ ޗައިނާގެ ސަރަހައްދަށް ގަވާއިދާއި ޚިލާފަށް ވަތް ފިލިޕީންސްގެ ދެ އުޅަނދަކަށް ހުރަސް އަޅާފައިވާނެކަމަށެވެ. އަދި ޗައިނާ ކޯސްޓްގާޑުގެ އުޅަނދުތައް އެސަރަހައްދު ދޫކޮށް ދިޔުމަށް ފިލިޕީންސްގެ އުޅަނދުތަކަށް އެންގުމުން، ދެކަމާ ދެކޮޅު ހަދައި ޗައިނާގެ ކޯސްޓްގާޑަށް ނުރައްކާކުރިކަމަށް ޗައިނާއިން ތުހުމަތު ކުރެއެވެ.

އަނެއްކޮޅުން ފިލިޕީންސްއިން ބުނަނީ ފިލިޕީންސްގެ އުޅަނދުތަކަށާއި، އުޅަނދުތަކުގައި ތިބި މީހުންގެ ފުރާނައަށް ޗައިނާ ކޯސްޓްގާޑުން ނުރައްކާ ކުރިކަމަށެވެ. އަދި ޗައިނާގެ ކޯސްޓްގާޑު އުޅަނދުން ފިލިޕީންސްގެ އުޅަނދުތަކަށް ޕްރެޝަރުގައި ފެންވެސް ޖެހި ކަމަށް ފިލިޕީންސްއިން ބުނެއެވެ. ޗައިނާއިން ނެރުނު ބަޔާނުގައި އެވާހަކައެއް ނެތެވެ.

މެނީލާގައި ހުންނަވާ އެމެރިކާގެ ސަފީރު، ޗައިނާގެ އަމަލުތައް ސިފަކުރެއްވީ ނުރައްކާތެރި އަދި ސަރަހައްދުގެ ހަމަޖެހުން ނަގާލުމުގެ އަމަލެއްގެ ގޮތުގައެވެ.