ކްލާސްރޫމް ތަކުގެ އިތުރުން، ސްކޫލްތަކުގެ ހޯލްތައްވެސް އޭސީ ކުރެވޭނެ: ރައީސް މުޢިއްޒު

މި ސަރުކާރުން ފަށާފައިވާ ކޫލް ސްކޫލް ޕްރޮޖެކްޓްގެ ދަށުން ސުކޫލް ތަކުގެ ހޯލްތައްވެސް އޭސީ ކުރެވިގެންދާނެ ކަމަށް ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ރައީސް އޮފީހުން ކުރިއަށް ގެންދާ ”ރައްޔިތުންނާއެކު“ ޕޮޑްކާސްޓްގެ ތިންވަނަ އެޕިސޯޑުގައި ވާހަކަ ދައްކަވަމުންނެވެ.

މުދައްރިސުން ކްލާސްރޫމްގައި ތިބޭއިރު އިހުސާސްކުރެވޭ ހޫނުމިނުގެ ދަރަޖަ މަތިވެ، އޭގެ ސަބަބުން ތަޙައްމަލު ކުރަންޖެހޭ އުނދަގޫތަކަށް ދާއިމީ ޙައްލެއް ހޯދައިދިނުމަށް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ރާއްޖޭގެ ހުރިހާ ސްކޫލެއް އޭސީ ކުރެއްވުމަށް ވަޢުދުވެވަޑައިގެންފައެވެ.

އެ ވަޢުދުފުޅާ އެއްގޮތަށް ކޫލް ސްކޫލް ޕްރޮޖެކްޓް އިފްތިތާޙް ކުރެވިގެންދިޔައީ މިދިޔަ އަހަރުގެ ޖޫން މަހުގައެވެ.

މި ޕްރޮޖެކްޓްގެ އާއި ގުޅިގެން، މިއަދުގެ ޕޮޑްކާސްޓްގައި ވާހަކަ ދައްކަވަމުން ރައީސް މުޢިއްޒު ވިދާޅުވީ، ރިޔާސީ އިންތިޚާބުގެ ތެރެއިން ރަށް ރަށަށް ޒިޔާރަތް ކުރެެއްވިއިރު ކިޔަވާ ކުދިންގެ އެދުނު އެންމެ ބޮޑު އެއް އެދުމަކީ ކްލާސް ރޫމްތައް ހޫނު މައްސަލަ ހައްލުކޮށްދިނުން ކަމަށެވެ. އަދި އެއީ ހަގީގަތުގައިވެސް ބޮޑު މައްސަލައެއް ކަމަށާ، ހޫނު ކަމުގައި ކިޔެވުމަކީ އުނދަގޫ ކަމެއް ކަމަށެވެ.

އެހެންކަމުން ހުރިހާ ކްލާސްރޫމެއް އޭސީ ކުރައްވަން ނިންމެވު ކަމަށާ، އަދި އޭސީ ކުރާއިރު އިއާދަކުރުވަނިވި ހަކަތައިން އެކަން ކުރެވޭ ގޮތަށް އެކަން ކުރިއަށް ގެންދަން ނިންމެވި ކަން އެމަނިކުފާނު ފާހަގަކުރެއްވިއެވެ.

ރައީސް މުޢިއްޒު އިތުރަށް ވިދާޅުވީ، ރާއްޖޭގައި މިވަގުތު ގާތްގަނޑަކަށް 3604 ކްލާސްރޫމް ހުރި ކަމަށާ، އެ ހުރިހާ ކްލާސްރޫމެއް މި އަހަރުގެ ސެޕްޓެމްބަރ މަސް ނޫނީ، މިއަހަރު ނިމުމުގެ ކުރިން އޭސީ ކުރުމަކީ ސަރުކާރުގެ އަމާޒު ކަމަށެވެ.

އޭގެ ތެރެއަށް އެބަ އިތުރުކޮށްލަން އެބަ ހޯލްތައްވެސް. އެއީ ކުރިން އަޅުގަނޑު ވަޢުދުވީ ކަމެއް ނޫން. ހޯލްތައްވެސް ވަރަށް މުހިންމު. ހޯލްތަކުގައި ކުދިންގެ އެކިއެކި އެކްޓިވިޓީސްތައް އެބަ ކުރިއަށް ގެންދޭ. ގިނަ ރަށްތަކުގައި އެއީ ހަމައެކަނި ސުކޫލްގެ ބޭނުމަށް ބޭނުން ކުރާ ތަނެއްވެސް ނޫން. ބައެއް ރަށް ރަށުގައި ނުހުރޭ އިންޑޯ ހަރަކާތްތައް ހިންގާނޭ ތަނެއްވެސް. ޖަލްސާއެއް ބާއްވާލާނެ ތަނެއްވެސް. ނޫނީ ބައްދަލުވުމެއް ބާއްވާލަންވެސް ހުންނަ ތަނަކީ މަލްޓިޕާޕަސް ހޯލް ގޮތަށް ހުންނަ ހޯލްތައް.

ރައީސުލްޖުމްހޫރިއްޔާ ޑރ މުޙައްމަދު މުޢިއްޒު

ރައީސް ވިދާޅުވީ، ސުކޫލްތަކުގެ ހޯލްތައް އޭސީ ކުރުމުގެ މަސައްކަތް މި އަހަރު ނިންމާ ނުލެވުނު ނަމަވެސް، ކްލާސްރޫމްތައް އޭސީ ކުރުމުގެ ކަންކަން ނިންމަވާލައްވާނެ ކަމަށެވެ.

ކޫލް ސްކޫލް ޕްރޮޖެކްޓްގެ ފޭސް 2 ގައި ސްކޫލުގައި ސޯލަރ ޕެނަލް ހަރުކުރުމަށް ނިންމާފައިވާއިރު މީގެ ސަބަބުން ސްކޫލުގައި ބޭނުންކުރާ ކަރަންޓުގެ %30 ސޯލަރ ހަކަތައަށް ބަދަލުވެ، ކަރަންޓަށް ދާ ޚަރަދު ކުޑަވެގެންދާނެ ކަމަށް އެޑިޔުކޭޝަން މިނިސްޓްރީން މީގެ ކުރިން ބުނެފައިވެއެވެ. ެ