ޑިޕާޗާ ޓެކްސްގެ ގޮތުގައި އަހަރުގެ މިހާތަނަށް 789.8 މިލިއަން ރުފިޔާ ބަލައިގަނެފި
ލިޔުންތެރިޔާ
އަބްދުﷲ ހުސައިން
އެއާޕޯޓުން ފުރާ ފަސެންޖަރުންގެ އަތުން އަހަރުގެ މިހާތަނަށް ދައުލަތުގެ ބައިތުލްމާލަށް 789.8 މިލިއަން ރުފިޔާ ލިބިފައިވާކަމަށް މޯލްޑިވްސް އިންލަންޑް ރެވެނިއު އޮޓޯރިޓީގެ ތަފާސްހިސާބުތަކުން ދައްކައިފިއެވެ.
މީރާއިން އާއްމުކުރި ޖޫންމަހު ދައުލަތަށް ޓެކްސްގެ ގޮތުގައި ލިބުނު އާމްދަނީގެ ތަފާސްހިސާބަށް ބަލާއިރު، މިދިޔަމަހު އެކަނިވެސް ޑިޕާޗާ ޓެކްސްގެ ގޮތުގައި 133 މިލިއަނަށްވުރެ ގިނަ ރުފިޔާ ވަނީ ލިބިފައެވެ. ޖޫންމަހު ޑިޕާޗާ ޓެކްސްގެ ގޮތުގައި ބޭރުފައިސާއިން ވަނީ 8.6މިލިއަން ޑޮލަު ލިބިފައެވެ. އަދި އަހަރުގެ މިހާތަނަށް ވަނީ 57.2 މިލިއަން ޑޮލަރު ލިބިފައެވެ.
މިއަހަރުގެ މިހާތަނަށް އެއާޕޯޓް ޑިވެލޮޕްމަންޓް ފީގެ ގޮތުގައިވެސް ލިބުނު އަދަދުވެސް ވަނީ މިދިޔަ އަހަރު ލިބުނު އަދަދަށްވުރެ އިތުރުވެފައެވެ. އެއާޕޯޓް ޑިވެލޮޕްމަންޓް ފީގެ ގޮތުގައި ޖޫންމަހުގެ ނިޔަލަށް 885,8 މިލިއަން ރުފިޔާ ލިބުނުއިރު އޭގެ ތެރޭގައި ބޭރުފައިސާގެ ގޮތުގައި 57.4 މިލިއަން ޑޮލަރު ހިމެނެއެވެ.
އެއާޕޯޓުން ފުރާ ފަސެންޖަރުންގެ އަތުން ނަގާ ޓެކުހާއި، އެއާޕޯޓް ޑިވެލޮޕްމަންޓް ފީގެ ގޮތުގައި މިއަހަރު ލިބުނު އާމްދަނީ އިތުރުވި މައިގަނޑު ސަބަބަކީ ގާނޫނަށް ގެނައި ބަދަލާއެކު މިދިޔަ ޑިސެމްބަރުމަހުގެ ތެރޭގައި އެ ދެބައިން ނަގާ ފީތައް ބޮޑުކުރުމެވެ.
ޑިޕާޗާފީއަށް އެންމެފަހުން ގެނައި ބަދަލާއެކު، މިދިޔަ ޑިސެމްބަރުމަހުން ފެށިގެން އެއާޕޯޓުން އިކޮނޮމީ ކްލާހުގައި ފުރާ ކޮންމެ ފަސެންޖަރެއްގެ އަތުން 50 ޑޮލަރު ނަގައެވެ. އޭގެ ކުރިން އިކޮނޮމީ ކްލާހުން ދަތުރުކުރާ ބިދޭސީން އަތުން ނަގަމުން އައިސްފައިވަނީ 30 ޑޮލަރެވެ. އިކޮނޮމީ ކްލާހުން ދަތުރުކުރާ ބިދޭސީންގެ އަތުން ނެގިނަމަވެސް އިކޮނޮމީ ކްލާހުން ފުރާ ދިވެހިންގެ އަތުން ނަގާ ޓެކްސް ބޮޑުކޮށްފައެއް ނުވެއެވެ.
ބިޒްނަސް ކުލާހުން ދަތުރުކުރާނަމަ، ފުރާ ދިވެހިންނާއި ބިދޭސީންގެ އަތުން ކުރިން ނަގަމުން އަންނަ 60 ޑޮލަރުގެ ބަދަލުގައި ޑިސެމްބަރުމަހުން ފެށިގެން ނަގަމުން އަންނަނީ 120 ޑޮލަރެވެ. އަދި އަމިއްލަ ޖެޓްތަކުގައި އަންނަ މީހުންގެ އަތުން 480 ޑޮލަރު ނަގައެވެ.
އައު ޓާމިނަލް ހުޅުވުމާއެކު ވީއައިއޭއިން ހިދުމަތް ހޯދާ ދަތުރުވެރިންގެ އަދަދު އިތުރުވެގެން ދިއުމާއެކު ޑިޕާޗާ ޓެކްސްގެ ގޮތުގައި މިހާރު ލިބެމުން އަންނަ އަމްދަނީ އިތުރުވެގެންދާނޭކަމަށް އެމްއޭސީއެލުން ފާހަގަކުރެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
